Read Xitsonga Isaiah 49 Bible Online

Isaiah 49 - Xitsonga bible

Isaiah 49

¹N'wina swihlale, mi ndzi yingisa, na n'wina matiko lama nga ekule, rhiyani tindleve! Yehovha u ndzi vitanile ndza ha ri ekhwirini ra manana; u ndzi thyile vito loko ndzi ri ekhwirini ra mana wa mina.

²U endle nomu wa mina banga lero kariha, u ndzi tshamisile endzhutini wa voko ra yena;

³u endle ha mina nseve lowo kariha; u ndzi fihlile egadzini ra yena. U te eka mina: “U nandza wa mina, Israele loyi ndzi nga ta tidzunisa ha yena.”

⁴Kambe mina ndzi te: “Ndzi tikarhatile mahala; ndzi helele matimba swi nga pfunanga nchumu; kambe ku lulama ka mina ku le ka Yehovha, ku hakela ka mina ku le ka Xikwembu xa mina.”

⁵Kutani sweswi Yehovha wa vulavula, yena la ndzi vumbeke ndza ha ri ekhwirini ra manana leswaku ndzi ta va nandza wa yena, ndzi n'wi vuyisela Yakobo, ndzi n'wi hlengeletela Israele. Hikuva ndza chaviseka emahlweni ka Yehovha, kutani matimba ya mina i Xikwembu xa mina.

⁶U ri: “A swi ringani leswaku u va nandza wa mina ku pfuxa tinxaka ta Yakobo ni ku vuyisa lava poneke va Israele; ndzi ta endla ha wena ku vonakala ka matiko, ku fikisa ku pona ka mina emakun'wini ya misava!”

⁷U vula sweswo Yehovha, Mukutsuri ni Muhlawuleki wa Israele, eka loyi a soriweke hi vanhu, la nyenyiweke hi tiko, eka khumbi ra lava fumaka u ri: “Tihosi ti ta n'wi vona ti va ti pfuka, ni tindhuna ti ta khinsama hikwalaho ka Yehovha la tshembekaka, ni hikwalaho ka Mukwetsimi wa Israele la ku hlawuleke.”

⁸U vula sweswo Yehovha: “Enkarhini wa tintswalo, ndzi ku yingisile, hi siku ra ku hlayiseka, ndzi ku pfunile; ndzi ku tumbuluxile, ndzi ku tiyisile leswaku u lulamisa ntwanano ni tiko, ni ku pfuxa tiko, ku nyika vanhu tindzhaka leti onhakeke,

⁹ku byela vabohiwa: ‘Humani!’ ni lava nga emunyameni: ‘Humelelani!’ “Va ta dya etindleleni, va ta kuma swakudya emitsungeni hinkwayo;

¹⁰va nga ka va nga vi na ndlala ni torha; mumu ni dyambu swi nga ka swi nga va hisi, hikuva loyi a va twelaka vusiwana u ta va fambisa, a va yisa ematini lama khulukaka.

¹¹Ndzi ta endla hi tintshava ta mina hinkwato magondzo, kutani tindlela ta mina ti ta pfuxiwa.

¹²“Vona, van'wana va huma ekule! Van'wana va huma edzongeni ni le vupeladyambu. Van'wana va huma etikweni ra va Sina!”

¹³N'wina matilo, huwelelani hi ku tsaka! Wena misava, pfuka u tsakisisa! N'wina tintshava, banani mikulungwana! Hikuva Yehovha u chavelerile tiko ra yena, u twerile va yena lava rilaka vusiwana.

¹⁴Siyoni u ri: “Yehovha u ndzi tshikile, Hosi yi ndzi rivarile!”

¹⁵“Xana mana wa munhu a nga rivala xihlangi xa yena, a nga tweri vusiwana la humeke ekhwirini ra yena xana? Hambiloko a n'wi rivala, mina ndzi nga ka ndzi nga ku rivari!

¹⁶Vona, ndzi ku tsarile eswandleni swa mina, makhumbi ya wena ma le mahlweni ka mina hi masiku.

¹⁷Vana va wena va ta hi ku tsutsuma vaonhi ni vahlanhli va wena va tshinela ekule na wena.

¹⁸Rhalarhala hinkwako, u languta; va hlengeletanile hinkwavo, va ta eka wena! Hi ku hanya, ndza hanya,” ku vula Yehovha, “u ta tibombisa ha vona, u tiendla ha vona vamba ra muvutiwa.

¹⁹Hikuva marhumbi ya wena, ni mananga ya wena, ni tiko leri onhakeke ra wena, swilo hinkwaswo sweswo swi nga ka swi nga ringani vaaki va wena. Lava nga ku vutla va fambile.

²⁰Kutani vana va wena lava u nga va pfumala, va ta ku eka wena: ‘Tiko a ri ndzi ringani; ndzi nyike tiko, ndzi ta aka eka rona.’

²¹Kutani u ta ku embilwini ya wena: ‘I mani la ndzi tswaleleke vona, a ndzi kala vana, a ndzi ri mhika la cukumetiweke, la tshikiweke, vona va kurisiwe hi mani? Vonani, a ndzi sele ndzi ri swanga, vona a va ri kwihi xana?’ ”

²²U vula sweswo Hosi Yehovha, u ri: “Ndzi ta tlakusela voko ra mina eka matiko, ndzi ta yimisa mujeko wa mina eka matiko kutani va ta vuyisa vana va wena va xinuna emavokweni ya vona, ni vana va wena va xisati emakatleni ya vona.

²³Tihosi ti ta va vawundli va wena, ni makosikazi va ta va vaan'wisi va wena, va ta korhamela ehansi emahlweni ka wena, va ta nantswa ntshuri wa milenge ya wena, kutani u ta swi tiva leswaku hi mina Yehovha, ni leswaku lava ndzi tshembaka va nga ka va nga vi na tingana.”

²⁴Xana nhenha yi ta vutleriwa leswi yi swi phangeke? Xana lava khomiweke lavo lulama va ta tshunxiwa-ke?

²⁵“Ina,” ku vula Yehovha, “leswi khomiweke hi munhu wa matimba, na swona swi ta tshunxiwa, ni leswi phangiweke hi munhu wa vukari swi ta vutleriwa yena! Mina, ndzi ta lwa ni valala va wena, ndzi ta ponisa vana va wena ndzi ri mina.

²⁶Ndzi ta dyisa vaxanisi va wena nyama ya vona, va ta pyopyiwa hi ngati ya vona, yi va tanihi vhinyo leyintshwa, kutani nyama hinkwayo yi ta tiva leswaku mina Yehovha, ndzi Muponisi wa wena, ni leswaku Mukutsuri wa wena hi Lowa matimba wa Yakobo.”