Read Xitsonga Isaiah 50 Bible Online

Isaiah 50 - Xitsonga bible

Isaiah 50

¹Yehovha u vula a ku: “Ri kwihi papila ra ku tshika mana wa n'wina leri ndzi n'wi tshikeke ha rona xana? Kumbe ndzi mi xavisele mani wa lava ndzi nga va ni nandzu eka vona? Vonani, mi xavisiwile hikwalaho ka swidyoho swa n'wina, mana wa n'wina u hlongoriwile hikwalaho ka swivi swa n'wina!

²Ndzi tile, kasi a ku nga ri na munhu ha yini-ke? Ndzi huwelerile, a ku hlamulanga munhu ha yini-ke? Xana voko ra mina ri komile leswaku ndzi nga swi koti ku mi ponisa, kumbe a ndzi na matimba ya ku mi ponisa xana? Vona, hi ku ri wumeta ndza omisa lwandle, milambu ndza yi endla emananga; tinhlampfi ta yona ti ta bola hi ku pfumala mati, ti fa hi torha;

³ndzi ta ambexa matiko hi munyama, kutani ndzi ma funengeta hi saka.”

⁴Hosi, Yehovha, u ndzi nyikile ririmi ra mudyondzisi leswaku ndzi ta kota ku tiyisa hi rito ra mina loyi a heleke mbilu, ri xa nimpundzu, a pfuxa ndleve ya mina leswaku ndzi n'wi yingisa hilaha ku yingisaka vadyondzisiwa.

⁵Hosi Yehovha u ndzi pfule ndleve, kutani a ndzi alanga, a ndzi tlhelelanga endzhaku;

⁶ndzi nyiketile nhlana wa mina eka lava nga ndzi ba, ni marhama ya mina eka lava nga ndzi hluvelela malebvu; a ndzi fihlanga mombo wa mina loko va ndzi rhuketela, ni loko va ndzi tshwutela hi marhi emahlweni.

⁷Leswi Hosi Yehovha a taka ndzi pfuna, a ndzi helanga mbilu loko va ndzi rhuketela; ndzi endlile mombo wa mina swa nga hi ribye, hikuva ndza swi tiva leswaku ndzi nga ka ndzi nga heri mbilu.

⁸U kusuhi la ndzi khanisaka, la nga ta ndzi mangalela i mani? A hi humeni swin'we! La ndzi mangalelaka i mani? A a ndzi tshinelele!

⁹Vonani, Hosi Yehovha u ta ndzi pfuna, la nga ta ndzi avanyisa i mani? Vona, va ta hlakala hinkwavo tanihi nguvu, nsumba yi ta va herisa!

¹⁰I mani exikarhi ka n'wina la chavaka Yehovha, la yingisaka rito ra nandza wa yena xana? I mani la fambaka emunyameni, la pfumalaka ku vonakala, a a tshembe vito ra Yehovha, a a titiyise eka Xikwembu xa yena.

¹¹Vonani, n'wina hinkwenu lava tshivelaka ndzilo, mi ri karhi mi tirhendzele hi swisa leswi pfurhaka, yanani emalangavini ya ndzilo wa n'wina, mi lwa hi swisa leswi mi swi lumekeke! Swilo leswo swi ta mi humelela swi huma evokweni ra mina; mi ta etlela eku vavisekeni!