Read Xitsonga Isaiah 52 Bible Online

Isaiah 52 - Xitsonga bible

Isaiah 52

¹Pfuka, pfuka, ambala matimba ya wena, Siyoni! Ambala tinguvu ta nkhuvo, Yerusalema, muti lowu hlawuriweke! Hikuva sweswi, khuna ni munhu wa thyaka va nga ka va nga ha ngheni eka wena.

²Phumunha ntshuri wa wena, pfuka u tshamisa, wena Yerusalema, hluvula timpecana ta nhamu ya wena, wena mukhomiwa, n'wana Siyoni!

³Hikuva u vula sweswo Yehovha a ku: “Mi xavisiwile hi swahava, a mi nga kutsuriwi hi mali.”

⁴Hikuva u vula sweswo Hosi Yehovha, a ku: “Tiko ra mina ri ngirimerile khale eEgipta, ri ta tshama kona; endzhaku ka swona, Asiriya u ri xanisile ntsena.

⁵Kutani sweswi, ndzi ni mhaka yihi laha,” ku vula Yehovha, “leswi tiko ra mina ri phangiweke, handle ka nandzu? Vaxanisi va yena va ba huwa,” ku vula Yehovha, “hi mikarhi hinkwayo, ni masiku hinkwawo, vito ra mina ra sandziwa!

⁶Hikwalaho, tiko ra mina ri ta tiva vito ra mina, ina, hi rona siku leri ri nga ta tiva ha rona leswaku hi mina la nge: Hi mina loyi!”

⁷Yi sasekile swonghasi etintshaveni, milenge ya loyi a tisaka timhaka to nandziha, la vulavulaka swo rhula, ya loyi a tisaka timhaka leti tsakisaka, loyi a vulaka swa vutomi, loyi a byelaka Siyoni, a ku: “Xikwembu xa wena xa fuma!”

⁸Yingisa tinhlori ta wena! Ti tlakusa rito, ti huwelela swin'we; hikuva hi mahlo ya tona, ti vona ku vuya ka Yehovha eSiyoni:

⁹Banani mikulungwana, n'wina hinkwenu swin'we, marhumbi ya Yerusalema; hikuva Yehovha u chavelerile tiko ra yena, u kutsule Yerusalema!

¹⁰Yehovha u funungurile voko ra yena leri hlawuriweke emahlweni ka matiko hinkwawo, kutani makumu hinkwawo ya misava ma ta vona ku hlayiseka ka Xikwembu xa hina.

¹¹Sukani! Sukani! Humani kona! Mi nga khumbi nchumu wa leswi yilaka, humani exikarhi ka wona. Tibasiseni, n'wina lava mi rhwalaka timbita ta Yehovha!

¹²Hikuva mi nga ka mi nga fambi hi ku hatlisa, mi nga ka mi nga suki hi ku tsutsuma, hikuva Yehovha wa mi rhangela, kutani Xikwembu xa Israele xi mi landza hi le ndzhaku!

¹³Vonani, nandza wa mina u ta kateka, u ta kula, u ta dzunisiwa, u ta tlakusiwa ehenhla!

¹⁴Hilaha va ku tala ingi va tsemeka mihlana loko va ku vona, hikuva mombo wa yena a wu khanyana ku tlula vanhu hinkwavo, a wu khanyana ku tlula un'wana ni un'wana wa vana va vanhu,

¹⁵hi mukhuva wolowo u ta tsakisa ngopfu matiko ya ku tala; tihosi ti ta pfala milomu ya tona, hikuva ti ta vona leswi ti nga siki tivisiwaka swona, ti ta dyondza leswi ti nga siki yingisaka swona.