Read Xitsonga Isaiah 54 Bible Online

Isaiah 54 - Xitsonga bible

Isaiah 54

¹“Huwelela hi ku tsaka, wena mhika la nga velekangiki. Tsaka, u tsaka ngopfu, wena la nga siki lumiwaka eku velekeni! Hikuva vana va la tshikiweke va tele ku tlula vana va la tekiweke,” ku vula Yehovha.

²“Anamisa vutshamo bya ntsonga wa wena, u lehisa tinguvu ta tende ra wena: u nga feleli, lehisa tingoti ta wena, tiyisa timhandze ta wena.

³Hikuva u ta hangalaka tlhelo ra xinene ni tlhelo ra ximatsi, kutani vatukulu va wena va ta hlula matiko, va ta aka emitini leyi tshikiweke.

⁴“U nga chavi, u nga ka u nga vi na tingana, u nga tshutshali, hikuva u nga ka u nga soriwi; hikuva u ta rivala tingana ta vuntshwa bya wena, kutani u nga ka u nga tsundzuki xisandzu xa vunoni bya wena.

⁵Hikuva nuna wa wena, hi loyi a ku endleke, vito ra yena i Yehovha wa tinyimpi. Mukutsuri wa wena hi la hlawulekeke wa Israele, u ta vuriwa Xikwembu xa misava hinkwayo.

⁶Hikuva Yehovha wa ku vitana tanihi nsati la tshikiweke, la nga enhlomulweni, kukota mulovoriwa la hlongoriweke, ku vula Xikwembu xa wena.

⁷Ndzi ku tshikile nkarhinyana, kambe etintswalweni ta mina letikulu ndzi ta ku amukela.

⁸Eku pfurheni ka vukari bya mina ndzi ku fihlele mombo wa mina nkarhinyana, kambe etintswalweni leti nga heriki ndzi ta ku tsetselela,” ku vula Mukutsuri wa wena, Yehovha.

⁹“Hikuva ku ta va eka mina tanihi mati ya Nowa, loko ndzi hlambanya leswaku mati ya Nowa ma nga ka ma nga ha hangalaki emisaveni. Ndzi hlambanyile leswaku ndzi nga ka ndzi nga ha ku kariheli ni ku ku wumeta.

¹⁰Hambi tintshava ti nga suka, ni switsunga swi nga tsekatseka, tintswalo ta mina ti nga ka ti nga suki eka wena, ni ntwanano wa mina wu nga ka wu nga tsekatsekisiwi,” ku vula loyi a ku twelaka vusiwana, yena Yehovha.

¹¹“Nsati wa khombo, wena la biweke hi xidzedze, la pfumalaka muchaveleri! Vona, ndzi ta bombisa maribye ya wena hi lexo basa, ndzi ta ku endlela masungulo ya safiri.

¹²Ndzi ta endla khokholo ra wena hi rubi, ni timbanti ta wena hi karbunkele, ni xivava hinkwaxo xa wena hi maribye ya risima.

¹³Vana va wena va xinuna hinkwavo va ta va vadyondzisiwa va Yehovha, ku rhula ka vona ku ta va lokukulu.

¹⁴U ta tiyisiwa hi ku lulama; tshineta ekule na wena mahlomulo, hikuva a ku faneri ku chava nchumu, ni ku tshuka, hikuva leswi chavisaka swi nga ka swi nga ku tshineleri.

¹⁵Hambi va ta ku etlelela, swi nga ka swi nga humi ka mina, la ku tumbelelaka u ta wa emahlweni ka wena.

¹⁶Vona, hi mina la endleke mufuri la pfurhetaka pfundze, kutani a fula tlhari lowu nga ntirho wa yena; kambe hi mina la vumbeke mulovisi la lovisaka.

¹⁷Fumu rin'wana ni rin'wana leri va ri fulaka ku ku onha, ri nga ka ri nga pfuni nchumu kambe ririmi rin'wana ni rin'wana leri nga tikurisa ku kanetana na wena, u ta ri avanyisa. Hi yona ndzhaka ya malandza ya Yehovha, ni ku lulama loku ndzi nga ta va nyika,” ku vula Yehovha.