Read Xitsonga Isaiah 55 Bible Online

Isaiah 55 - Xitsonga bible

Isaiah 55

¹“N'wina hinkwenu lava nga ni torha, tanani ematini hambi n'wina lava pfumalaka mali! Tanani, mi ta xava, mi dya; tanani, mi xava vhinyo ni ntswamba, hambi mi nga ri na mali, a mi nga hakeri!

²Xana mi xavela yini hi mali, leswi swi nga riki vuswa xana? Xana mi tirhela yini, leswi nga xurhisiki xana? Ndzi yingiseni, mi ta dya leswo nandziha; mimoya ya n'wina yi ta titsakela endzalweni.

³Rhiyani tindleve, tanani eka mina, yingisani, kutani mimoya ya n'wina yi ta hanya: ndzi ta endla na n'wina ntwanano lowu nga heriki, ku tiyisa tintswalo ta mina eka Davhida.

⁴Waswivo, ndzi n'wi vekile mbhoni exikarhi ka matiko, hosi, ni mufambisi wa matiko.

⁵Waswivo, u ta Vitana tiko leri u nga ri tivangiki, kutani matiko lama nga ku tivangiki, ma ta tsutsumela eka wena, hikwalaho ka Yehovha, Xikwembu xa wena, hikwalaho ka Mukwetsimi wa Israele, la ku dzunisaka.

⁶“Lavani Yehovha loko a ha kumeka; huwelelani eka yena, loko a ha ri ekusuhi!

⁷Lowo biha a a tshike ndlela ya yena, ni wa lunya miehleketo ya yena; a a tlhelele eka Yehovha, la nga ta n'wi twela vusiwana; ni ka Xikwembu xa hina, lexi rivalelaka, ku nga ri hi mpimo.

⁸Hikuva miehleketo ya mina, a hi miehleketo ya n'wina, ni tindlela ta n'wina a hi tindlela ta mina,” ku vula Yehovha.

⁹“Hilaha matilo ma tlakukeke ehenhla ka misava, hi sweswo tindlela ta mina ti tlakukeke ehenhla ka tindlela ta n'wina, ni miehleketo ya mina ehenhla ka miehleketo ya n'wina.

¹⁰Ku fana ni mpfula ni gamboko loko swi xika hi le tilweni, a swi tlheleri kona, swi nga si cheleta misava, ni ku mirisa, ni ku hlukisa leswi milaka, swi nga si nyika mbewu eka mubyari, ni swakudya eka loyi a dyaka,

¹¹swi tano ni rito ra mina, le ri humaka enon'wini wa mina: Ri nga ka ri nga tlheleri eka mina ri nga si tirha nchumu, ri nga si endla ku rhandza ka mina, ri nga si hetisa makungu ya mina.

¹²“Kunene mi ta huma hi ku tsaka mi ta fambisiwa hi ku rhula, tintshava ni switsunga swi ta tsaka ngopfu emahlweni ka n'wina, kutani mirhi hinkwayo ya nhova yi ta phokotela.

¹³Ematshan'weni ya mitwa ku ta kula kipresi, ematshan'weni ya mphasamhala, ku ta kula mirta; swi ta twarisa Yehovha, xi ta va xikombiso lexi nga heriki, lexi nga herisiwiki.”