Read Xitsonga Isaiah 62 Bible Online

Isaiah 62 - Xitsonga bible

Isaiah 62

¹Hikwalaho ka Siyoni, ndzi nga ka ndzi nga miyeri, hikwalaho ka Yerusalema, ndzi nga ka ndzi nga wisi, ku hlayiseka ka yena ku kondza ku vonakala kukota vurhonga, ni ku pona ka yena kukotisa rivoningo.

²Matiko ma ta vona ku hlayiseka ka wena, ni tihosi hinkwato ku twala ka wena, kutani u ta vuriwa hi vito lerintshwa, leri nomu wa Yehovha wu nga ta ri hlawula.

³U ta va harhi ya ku kwetsima evokweni ra Yehovha, xihuku xa vuhosi evokweni ra Xikwembu xa wena.

⁴U nga ka u nga ha vuriwi la tshikiweke va nga ka va nga ha vuri tiko ra wena swirilo kambe u ta vuriwa: Ndzi titsakele ha yena, ni tiko ra wena Mutekiwa; hikuva Yehovha u ta titsakela ha wena, ni tiko ra wena ri ta va ni nuna.

⁵Hilaha jaha ri tekaka wanhwana, hi sweswo vana va wena va ta hlangana na wena; hilaha muvutiwa a tsakisaka muteki, hi sweswo na wena u ta tsakisa Xikwembu xa wena.

⁶Erirhangwini ra wena, Yerusalema, ndzi vekile valanguteri; va nga ka va nga miyeri ni siku ni rin'we, nhlekanhi ni vusiku O! N'wina lava mi tsundzuxaka Yehovha, mi nga tshuki mi wisa!

⁷Mi nga tshuki mi n'wi nyika nkarhi, ku kondza a pfuxeta Yerusalema, a va a wu twarisa la emisaveni.

⁸Yehovha u hlambanyile hi voko ra yena ra xinene, hi voko ra matimba ra yena: “Ndzi nga ka ndzi nga ha nyiki valala va wena koro ya wena, leswaku va dya, kutani vana va n'eni va nga ka va nga ha nwi vhinyo ya wena, wu nga mbhandzu wa mitirho ya wena;

⁹hikuva lava nga ta va va tshoverile va ta dya, va ri karhi va tlangela Yehovha; na swona, lava nga ta va va hlengeletile vhinyo, va ta nwa emakupakupeni ya yindlu ya mina ya ku kwetsima.”

¹⁰Humani, humani etinyangweni! Mi lulamisa ndlela ya tiko! Boxani, boxani gondzo, susani maribye! Tlakusani mujeko ematikweni!

¹¹Maswivo, Yehovha u tivisile ku ya fika emakun'wini ya misava, a ku: “Byelani n'wana wa Siyoni: ‘Waswivo muponisi wa wena wa ta; waswivo, ku khensa ka yena ku na yena, ni hakelo ya yena yi le mahlweni ka yena.’ ”

¹²Va ta vuriwa tiko ro kwetsima, vakutsuriwa va Yehovha, kutani wena u ta thyiwa la laviwaka, muti lowu nga tshikiwiki.