Read Xitsonga Isaiah 64 Bible Online

Isaiah 64 - Xitsonga bible

Isaiah 64

¹O! Loko ngi u handzula matilo, u xika, tintshava a ti ta tsekatseka emahlweni ka wena,

²ku fana ni ku pfurha ka ndzilo wa tihunyi leti omeke, hilaha ndzilo wu virisaka mati; valala va wena va ta tiva vito ra wena, matiko ma ta rhurhumela emahlweni ka wena.

³[Loko u endlile masingita lawa hi nga ma langutelangiki, u xikile, kutani tintshava ti tsekatseka emahlweni ka wena.]

⁴A ku nga si twiwa, a ku nga si yingisiwa ni siku ni rin'we, a ku nga si voniwa, ni siku ni rin'we, Xikwembu xin'wana ehandle ka wena lexi tirhaka ku pfuna lava xi langutelaka.

⁵U tile ku hlanganisa loyi a endlaka hi ku tsaka leswi lulameke, ni lava ku tsundzukaka, va ri karhi va famba emitileni ya wena. Waswivo, u karihile, hikuva hi ku dyoherile a swi ri tano ni khale, hi ta pona xana?

⁶A hi fana hinkwerhu ni munhu la nyamisiweke, kutani ku lulama ka hina hinkwako a ku fana ni nguvu leyi nyamisiweke; a hi vunile hinkwerhu tanihi tluka, kutani swidyoho swa hina swi hi hundzisa tanihi mheho.

⁷A ku nga ri na munhu la khongelaka hi vito ra wena, la pfukaka a namarhela eka wena; hikuva u hi fihlele mombo wa wena, kutani u hi tshika hi fa eku dyoheni ka hina.

⁸Kambe sweswi, o Yehovha, u tata wa hina; hina hi vumba, wena u loyi a hi vumbeke, hinkwerhu hi ntirho wa mavoko ya wena.

⁹U nga tshuki u hlundzuka ku tlurisa, o Yehovha, u nga tshuki u tsundzuka hi masiku ku dyoha. Vona, pfumela ku languta, hikuva hinkwerhu hi tiko ra wena!

¹⁰Miti ya wena leyi hlawulekeke yi hundzukile mananga; Siyoni u hundzukile mananga, Yerusalema, i rhumbi.

¹¹Yindlu ya hina leyi hlawulekeke, leyo kwetsima, leyi vatata wa hina va ku dzuniseke eka yona, yi herisiwile hi ndzilo, kutani hinkwaswo leswi ngi hi swi tsakerile swi onhiwile.

¹²Endzhaku ka sweswo hinkwaswo, u ta tikhoma xana, o Yehovha? U ta miyela-ke, u hi vavisa ku tlurisa xana?