Read Xitsonga Isaiah 65 Bible Online

Isaiah 65 - Xitsonga bible

Isaiah 65

¹“Ndzi laviwa hi lava ngi va nga ndzi vitani, ndzi pfumela ku kumiwa hi lava ngi va nga ndzi lavi; a ndzi ku: ‘Hi mina loyi, hi mina loyi!’ Eka tiko leri nga riki na vito ra mina.

²Ndzi tshambulutile mavoko ya mina siku hinkwaro eka tiko leri tiarisaka, eka lava fambaka hi ndlela yo homboloka, va ri karhi va landzelela miehleketo ya vona;

³eka tiko leri nga tshikiki ku ndzi pfuka hi ku humesa magandzelo emitangeni, hi ku humesa mirhi leyi nun'hwelaka eswitineni;

⁴hi ku tshama emasirheni, hi ku peta vusiku emabakweni, hi ku dya nyama ya nguluve, ni swakudya leswi nyameke eswibyeni swa vona;

⁵va ku: ‘Tlhelela endzhaku, u nga tshineli ekusuhi na mina, hikuva ndzi hlawulekile eka wena!’ “Valavo, i musi etinhompfini ta mina, i ndzilo lowu pfurhaka hi masiku.

⁶Waswivo leswi swi tsariwile emahlweni ka mina: Ndzi nga ka ndzi nga miyeri, ndzi nga si tlherisela, kunene ndzi nga si tlherisela eka vona,

⁷swidyoho swa n'wina,” ku vula Yehovha, “swin'we ni swidyoho swa vatata wa n'wina, lava nga humesa mirhi ya risuna etintshaveni, lava ndzi sandzeke eswitsungeni; ndzi ta va pimela hakelo ya ku hanya ka vona ka khale.”

⁸Yehovha u vula sweswo, a ku: “Loko ku ri ni mati exidzumbeni xa vhinya, va ku: ‘U nga xi herisi, hikuva ka ha sele ku kateka kona!’ Na mina ndzi ta endlisa xisweswo hikwalaho ka rirhandzu ra malandza ya mina, leswaku ndzi nga herisi hinkwaswo.

⁹Ndzi ta humesa eka Yakobo rixaka, ni ka Yuda mudyandzhaka wa tintshava ta mina, vahlawuriwa va mina va ta ti fuma, ni malandza ya mina ma ta tshama eka tona.

¹⁰Rivala ra Xaroni ma ta va madyelo ya tinyimpfu, ni nkova wa Akora ma ta va madyelo ya tihomu, eka tiko ra mina leri ndzi lavaka.

¹¹Kambe n'wina, lava nga tshika Yehovha, lava nga rivala ntshava ya mina leyo kwetsima, lava andlalelaka Gadi tafula, lava chelelaka Meni ndzheko,

¹²ndzi mi nyiketa tlhari, kutani mi ta khinsama hinkwenu ku tlhaviwa, hikuva ndzi vitanile kasi a mi hlamulanga, ndzi vulavurile, kasi a mi yingisanga; kambe mi endlile leswi biheke emahlweni ka mina, mi titsakele eka leswi ndzi nga swi rhandziki.”

¹³Hikwalaho Hosi Yehovha u vulavula sweswo, a ku: “Maswivo, malandza ya mina ma ta dya, kambe n'wina mi ta va ni ndlala; maswivo, malandza ya mina ma ta nwa, kambe n'wina mi ta va ni torha; maswivo, malandza ya mina ma ta tsaka, kambe n'wina mi ta va ni tingana;

¹⁴maswivo, malandza ya mina ma ta yimbelela hi ku tsaka ka timbilu ta wona, kambe n'wina mi ta kolola eku vavisekeni ka timbilu ta n'wina, mi ta huwelela hi ku hela ka timbilu.

¹⁵Vito ra n'wina ri ta sala ri va ndzhukano exikarhi ka vahlawuriwa va mina; kutani Hosi Yehovha u ta ku dlaya kambe u ta thya vahlawuriwa va yena vito rin'wana.

¹⁶“Mani na mani la nga ta rhandza ku katekisiwa etikweni, u ta rhandza ku katekisiwa hi Xikwembu xa ntiyiso, kutani un'wana na un'wana la nga ta hlambanya, u ta hlambanya hi Xikwembu xa ntiyiso; hikuva nhlomulo wo sungula wu ta rivariwa, wu ta va wu hundzile emahlweni ka mina.

¹⁷“Hikuva, maswivo, ndzi vumba matilo lamantshwa, ni misava leyintshwa: timhaka ta khale a ti nga ha tsundzukiwi, ti nga ka ti nga ha tlheleri emiehleketweni.

¹⁸Kambe hikwalaho ka leswi ndzi nga ta swi vumba, tsakani, mi tsakisisa hi masiku, hikuva Yerusalema, ndzi n'wi tumbuluxela ku tsaka, ni tiko ra yena ku tsakisisa.

¹⁹Kutani ndzi ta titsakela ha Yerusalema, ndzi ta tsaka hikwalaho ka tiko ra mina; kutani ku nga ka ku nga ha twakali rito ra swirilo, hambi ku ri ku huwelela ka ku chava.

²⁰Kona a ku nga ha vi na swihlangi leswi velekiweleke masiku ma nga ri mangani, hambi swikoxa leswi nga hetisiki ntsengo wa masiku ya swona; hikuva u ta fa a ri lontshwa, loyi a nga ta fa a ri ni dzana ra malembe, kambe ndzhukano wu ta wela xidyohi, loko xi ta va ni dzana ra malembe.

²¹“Va ta aka tindlu, va ta tshama eka tona; va ta byala tivhinya, va dya mihandzu ya tona.

²²Va nga ka va nga ha aki tindlu, leswaku un'wana a ta tshama kona, va nga ka va nga ha byari leswaku un'wana a ta dya, hikuva masiku ya tiko ra mina ma ta ringana ni masiku ya mirhi, kutani vahlawuriwa va mina va ta tsakela ntirho wa mavoko ya vona,

²³va nga ha tikarhateli swahava, a va nga ha veleki vana ku va vona va hatla va fa; hikuva va ta va rixaka leri katekisiweke hi Yehovha, kutani vana va vona va ta hanya na vona.

²⁴Ku ta humelela leswaku loko va huwelela, ndzi ta hlamula, loko va ha vulavula, ndzi ta va yingisa.

²⁵“Mhisi ni xinyimpfana swi ta dya swin'we, nghala yi ta dya byanyi tanihi homu; nyoka yi ta dya ntshuri; ku nga ka ku nga endliwi leswo biha, ni leswi onhaka, entshaveni hinkwayo ya mina leyo kwetsima,” ku vula Yehovha.