Read Xitsonga Isaiah 7 Bible Online

Isaiah 7 - Xitsonga bible

Isaiah 7

¹Emikarhini ya Akazi, n'wana Yotamu, n'wana Uziya, hosi ya Yuda, Resini, hosi ya Siriya, swin'we na Peka, n'wana Remaliya, hosi ya Israele va ya wela eYerusalema; kambe va hluleka.

²Kutani yindlu ya Davhida yi byeriwa leswaku: “Tiko ra Siriya ri tiyimisile ku yima ni tiko ya Efrayimi.” Kavaloko mbilu ya hosi ni timbilu ta vanhu va yena ti tsekatseka, tanihi mirhi ya swihlahla loko yi tsekatsekisiwa hi mheho.

³Kutani Yehovha a ku eka Esaya: “Suka sweswi u ya hlangana na Akazi, wena na Xeyara-Yaxubu, n'wana wa wena, mi ta n'wi kuma emakun'wini ya mugerho wa tiva leri nga ehenhla, endleleni ya nsimu ya vahlantswi;

⁴u ku eka yena: ‘Tivone, titshamele, u nga chavi, mbilu ya wena yi nga tshuki yi tsana hikwalaho ka swisana leswimbirhi leswi mpukukaka, hikwalaho ka vukari lebyi pfurhaka bya Resini ni bya Siriya, ni bya n'wana Remaliya,

⁵leswi Siriya, na Efrayimi, ni n'wana Remaliya va kaneleke ku endla swo biha, va ku:

⁶“A hi weleni Yuda, hi n'wi sivelela, hi tiphangela muti, kutani hi veka n'wana Tabele hosi kona!” ’

⁷“Hosi Yehovha u ri: Mhaka leyi, a yi nga vi kona, yi nga ka yi nga humeleri.

⁸Hikuva nhloko ya Siriya i Damaska, kutani nhloko ya Damaska i Resini, kutani malembe ya 65, loko ma hundzile, Efrayimi a nga ka a nga ha hlayiwi exikarhi ka matiko.

⁹Kutani nhloko ya Efrayimi, i Samariya; ni nhloko ya Samariya, i n'wana Remaliya. Loko mi nga pfumeri, mi nga ka mi nga tiyi!”

¹⁰Yehovha a engeta a ku eka Akazi:

¹¹“Kombela xikombiso eka Yehovha, Xikwembu xa wena, u kombela leswaku xi humelela ehansi exivandleni xa vafi, hambi ku ri ehenhla etilweni.”

¹²Kambe Akazi a hlamula, a ku: “Ndzi nga ka ndzi nga kombeli nchumu, ndzi nga ka ndzi nga ringi Yehovha.”

¹³Esaya a ku: “Yingisani, n'wina va yindlu ya Davhida. Xana i mhaka leyitsongo loko mi karhata vanhu, leswi mi karhataka na xona Xikwembu xa mina?

¹⁴Hikwalaho-ke, Hosi yi ta mi nyika yi ri yona xikombiso: Vonani wanhwana u ta xurha nyimba, u ta veleka n'wana wa wanuna, kutani u ta n'wi thya vito ra Emanuwele, (Xikwembu xi na hina).

¹⁵U ta dya phehlwa ni vulombe, a ko a tiva ku ala leswo biha, ni ku hlawula leswo saseka;

¹⁶kambe loko n'wana a nga si tiva ku ala leswo biha ni ku hlawula leswo saseka, tiko rero u chavaka tihosi ta rona letimbirhi ri ta onhiwa.

¹⁷“Yehovha u ta tisa ehenhla ka wena ni le henhla ka tiko ra wena, ni le henhla ka yindlu ya tata wa wena, masiku lama nga siki humelelaka mpfhuka Efrayimi a avaneke na Yuda, i hosi ya Asiriya.

¹⁸Kutani emikarhini yoleyo Yehovha u ta ba noti eka tinhongana leti nge makumu ka milambu ya Egipta, ni tinyoxi ta tiko ra Asiriya.

¹⁹Ti ta ta, ti tshamisa hinkwato, ti ku dluva emikoveni ya mananga, ni le miceleni ya maribye, ni le mankun'hwini hinkwawo, ni le madyelweni hinkwawo.

²⁰Hi siku rero, Hosi yi ta byewula hi rikari leri a ri lombeke endzhandzheni wa nambu hi leswaku hosi ya Asiriya, yi ta byewula nhloko ni mavoya ya milenge, a susa ni malebvu.

²¹“Emikarhini yoleyo munhu un'wana ni un'wana u ta risa thokazi ri ri rin'we ni tinyimpfu timbirhi;

²²kutani hikwalaho ka ku tala ka ntswamba va ta dya phehlwa ntsena. Hikuva hinkwavo lava nga ta va va sele etikweni rero, va ta dya phehlwa ni vulombe.

²³Etinguveni teto, emasin'wini hinkwawo ya mirhi ya vhinya ya khume ra madzana, leyi ringanaka macheleni ya khume ra madzana, ku ta mila swigatlu ni mitwa.

²⁴Tiko rero ri ta ngheniwa hi miseve ni vurha, hikuva tiko hinkwaro ri ta tala swigatlu ni mitwa.

²⁵Kutani tintshava hinkwato leti ngi ti rimiwa hi xikomu, ku nga ka ku nga ha fambiwi eka tona hikwalaho ka ku chava swigatlu ni mitwa: ti ta endliwa madyelo ya tihomu, ti ta kandziyeriwa i hi tinyimpfu.”