Read Xitsonga Isaiah 8 Bible Online

Isaiah 8 - Xitsonga bible

Isaiah 8

¹Kutani Yehovha a ku eka mina: “Teka xiphepherhele lexi anameke, u tsala kona hi matsalwa lama vonakaka, u ku: ‘A ku hatliwe ku phangiwa, ku hlengeletiwa hi ku angwetla!’

²“Kutani ndzi teka timbhoni leti tshembekaka, a nga muprista Uriya na Zakariya, n'wana Yeberekiya.”

³Kutani ndzi tshinelela nsati wa muprofeta; a xurha nyimba, a veleka n'wana wa wanuna. Kutani Yehovha a ku eka mina: “N'wi thye vito ra Mahere-Xalali-Haxi-Bazi.

⁴Hikuva n'wana a nga si tiva ku vula: ‘Tatana, manana!’ Xuma xa Damaska ni xuma xa Samariya swi ta yisiwa emahlweni ka hosi ya Asiriya.”

⁵Yehovha a engeta a vulavula na mina, a ku:

⁶“Leswi tiko leri, ri soleke mati ya Xilowa, lama khulukaka khwatsi, ri tsakela Resini, ni n'wana Remaliya,

⁷hikwalaho Hosi yi ta tisa ehenhla ka rona mati lamakulu, ya matimba ya nambu, yi nga hosi ya Asiriya, ni matimba hinkwawo ya yona; u ta tlula hinkwako timbuwu ta wona, u ta khulukela ehenhla ka tingingiri hinkwato ta yona,

⁸u ta nghena eka Yuda hi ndhambi u ta hangalaka a funengeta hinkwako, u ta fika emikolweni ya vanhu, ku tshambulutiwa ka timpapa ta yena ku ta funengeta ku anama hinkwako ka tiko ra wena, oho Emanuwele!”

⁹Hlengeletanani, n'wina matiko, mi va mi herisiwa! Rhiyani tindleve, n'wina hinkwenu lava akeke ematikweni lama nga ekule! Tilunghiseleni ku lwa, mi ta herisiwa!

¹⁰Kanelani makungu, ma ta hundzuka swahava! Lerisani milawu, kambe yi nga ka yi nga humeleri, hikuva Xikwembu xi na hina!

¹¹Ku vulavule sweswo Yehovha eka mina siku voko ra yena ri ndzi khomeke, a ndzi tsundzuxa leswaku ndzi nga tshuki ndzi famba hi mitila ya tiko leri, a ku:

¹²“Mi nga vuleni leswaku i ku hlambanyelana hinkwaswo leswi tiko leri ri vulaka ku hlambanyelana; mi nga tshuki mi tshuka hi lexi xi ri tshukisaka, mi nga chaveni.

¹³Yehovha wa tinyimpi, hi yena loyi mi fanelaka ku n'wi hlawula; a a ve yena xichaviso xa n'wina, ni xirhurhumeriso xa n'wina.

¹⁴Eka tindlu letimbirhi ta Israele u ta va vukwetsimelo, ni ribye leri khunguvanyisaka, ni ribye leri va khudlunyaka; kambe eka lava akeke eYerusalema, u ta va vurimba ni ntlhamu.

¹⁵Kutani lavo tala eka vona va ta khunguvanyeka, va wa, va tshoveka: va ta phasiwa, va khomiwa.”

¹⁶Phutsa vumbhoni byebyo; u tiyisa hi mfungho vuprofeta lebyi, eka vadyondzisiwa va mina!

¹⁷Ndzi tshembile Yehovha la fihlelaka yindlu ya Yakobo mombo wa yena, ndzi langutela eka yena.

¹⁸Vonani, hi mina loyi ni vana lava Yehovha a ndzi nyikeke vona, hi ta va swikombiso ni swifaniso eka Israele, hi ku lerisa ka Yehovha wa tinyimpi, la akeke entshaveni ya Siyoni.

¹⁹Loko va nga ku eka n'wina: “Vutisisani lava humesaka mimoya ya vafi, ni vabvumbi lava hlevetelaka, lava n'unun'utaka, mi ta ku: ‘Xana tiko a ri faneli ku vutisa Xikwembu xa rona xana? Xana ku nga vutisiwa vafi timhaka ta lava hanyaka xana?’ ”

²⁰A hi tlheleleni enawini ni le vumbhonini. Kungakuloko ku nga yiwi hi rito leri, tiko a ri nga ha tsuvukeriwi hi vurhonga byin'wana!

²¹Ri ta pepetseka emisaveni exikarhi ka masangu, ri ta xanisiwa ri twa ndlala; kutakuloko ri twa ndlala, ri ta kariha, ri rhuketela hosi ya rona ni Xikwembu xa rona; kutani ri ta languta ehenhla,

²²ri tlhela ri languta emisaveni, kutani vona, ku ta va ni masangu, ni munyama, ni mahlomulo lama chavisaka; kutani ri ta susumetiwa emunyameni.