Read Xitsonga Leviticus 14 Bible Online

Leviticus 14 - Xitsonga bible

Leviticus 14

²“Hi wona nawu wa loyi a nga ni nhlokonho wa siku ra ku basisiwa ka yena.

³“Va ta n'wi tisa eka muprista, muprista u ta huma emixaxeni, a ta vonisisa leswaku wa nhlokonho a horile nhlokonhweni ya yena,

⁴kutani muprista u ta va lerisa ku tisela la fanelaka ku basisiwa, tinyanyana timbirhi leti hanyaka, leti tengeke, ni murhi wa kedari, ni karmesi, ni hisopa.

⁵Muprista u ta va lerisa leswaku yin'wana ya tinyanyana yi tlhaveriwa embiteni ya vumba leyi cheriweke mati layo tenga.

⁶Kutani u ta teka nyanyana leyi hanyaka, ni murhi wa kedari, ni karmesi, ni hisopa, a swi peta swin'we ni nyanyana leyi hanyaka engatini ya nyanyana leyi tlhaveriweke ehenhla ka mati layo tenga.

⁷Kutani u ta xuva ha yona kantlhanu ni kambirhi ehenhla ka loyi a faneleke ku basisiwa nhlokonho, u ta n'wi vula la tengeke, kutani a tshika nyanyana leyi hanyaka yi hahela emananga.

⁸La tibasisaka u ta hlantswa tinguvu ta yena, a byewula mavoya hinkwawo a va a hlamba, kutani u ta tenga, endzhaku ka swona, u ta nghena emixaxeni, kambe u ta tshama ehandle ka ntsonga wa yena hi masiku ya ntlhanu na mambirhi.

⁹Hi siku ra ntlhanu na mambirhi, u ta byewula mavoya ya yena hinkwawo, misisi, ni malebvu, ni tinxiyi; a byewula mavoya hinkwawo, a hlantswa tinguvu ta yena, a engeta a hlamba ematini, kutani u ta tenga.

¹⁰“Hi siku ra ntlhanu na manharhu, u ta teka swinyimpfana swimbirhi leswi nga riki na xivati, ni nyimpfu ya lembe rin'we leyi nga riki na xivati, ni ku avanyisa ka vukhume loku hlayiwaka kanharhu ka efa ya mapa layo saseka, lama pfuviweke hi mafurha, wu va nhlengo, ni loga yin'we ya mafurha.

¹¹Muprista la basisaka, u ta yisa munhu la tibasisaka swin'we ni swilo leswi emahlweni ka Yehovha, enyangweni ya tabernakela ya nhlengeletano.

¹²Kutani muprista u ta teka xin'wana xa swinyimpfana, a xi humesa ku phahla mhamba ya ku riha ni loga ya mafurha; a swi ndziwita yi va nyiko leyi ndziwitiweke emahlweni ka Yehovha.

¹³Kutani u ta tlhava xinyimpfana exivandleni lexi va tlhavaka eka xona mhamba ya nandzu ni holokosta, exivandleni lexi hlawuriweke hikuva mhamba ya ku riha yi ri ya muprista kukotisa mhamba ya nandzu; i xilo lexi hlawuriweke ngopfu.

¹⁴Muprista u ta teka ngati ya mhamba ya ku riha, a yi tota endleveni ya xinene ya la tibasisaka, ni le khudzwini ra voko ra xinene, ni le khudzwini ra nenge wa xinene wa yena.

¹⁵Kavaloko muprista u ta teka loga ya mafurha a yi chela exandleni xa yena xa ximatsi.

¹⁶Kutani muprista u ta peta ritiho ra yena ra voko ra xinene emafurheni lama nga exandleni xa yena xa ximatsi, a xuva hi ritiho leri nga ni mafurha kantlhanu ni kambirhi, emahlweni ka Yehovha.

¹⁷Loko ma ri mafurha lama seleke exandleni xa yena muprista u ta ma tota endleveni ya xinene ya la tibasisaka ni le khudzwini ra voko ra xinene, ni le khudzwini ra nenge wa xinene wa yena, ehenhla ka ngati ya mhamba ya ku riha.

¹⁸Mafurha lama nga ta sala exandleni xa yena u ta ma tota enhlokweni ya la tibasisaka kutani muprista u ta n'wi phahlela mhamba emahlweni ka Yehovha.

¹⁹Kutani muprista u ta humesa gandzelo ra xidyoho, a phahlela loyi a tibasiselaka thyaka ra yena mhamba kutani u ta tlhava holokosta.

²⁰Muprista u ta humesa holokosta ni nyiko ealitarini, kutani u ta phahlela munhu loyi mhamba, hi kona a nga ta tenga.

²¹“Kungakuloko xi ri xisiwana, ni loko swa yena swi nga ringani, u ta teka xinyimpfana xin'we lexi nga ta humesiwa ku endla gandzelo ra nandzu, yi va nyiko leyi ndziwitiwaka ku n'wi phahlela mhamba; u ta teka ni ku pambula ka vukhume bya efa ya mapa layo saseka, lama pfuviweke hi mafurha yi va nyiko, a teka ni loga ya mafurha,

²²ni matuva mambirhi, kumbe mavondlo mambirhi ya matuva, hilaha a swi kotaka; rin'wana yi va mhamba ya xidyoho, rin'wana ri endla holokosta.

²³U ta swi tisa eka muprista hi siku ra ntlhanu na manharhu, enyangweni ya tabernakela ya nhlengeletano emahlweni ka Yehovha, swi ta va swa ku tibasisa ka yena.

²⁴Muprista u ta teka xinyimpfana xa gandzelo ra nandzu ni loga ya mafurha, kutani u ta swi ndziwita, yi va nyiko leyi ndziwitiweke emahlweni ka Yehovha.

²⁵Kutani u ta tlhava xinyimpfana xa nandzu, muprista u ta teka ngati ya mhamba ya nandzu, a yi tota endleveni ya xinene ya la tibasisaka ni le khudzwini ra voko ra xinene, ni le khudzwini ra nenge wa xinene wa yena.

²⁶Muprista u ta tichela mafurha exandleni xa yena xa voko ra ximatsi,

²⁷kutani u ta xuva kantlhanu ni kambirhi emahlweni ka Yehovha hi mafurha lama nga exandleni xa ximatsi xa yena, a xi endla hi ritiho ra voko ra yena ra xinene.

²⁸Kutani muprista u ta tota hi mafurha lama nga exandleni xa yena, ndleve ya xinene ya la tibasisaka, ni le khudzwini ra voko ra yena ra xinene, ni le khudzwini ra nenge wa yena wa xinene, laha a nga tota ngati ya mhamba ya ku riha kona.

²⁹Mafurha lama nga ta sala exandleni xa muprista, u ta ya tota enhlokweni ya la tibasisaka ku n'wi phahlela mhamba emahlweni ka Yehovha.

³⁰Kutani u ta humesa tuva rin'wana, hambi vondlo hilaha a swi kumeke hakona.

³¹Loko ti ri tinyanyana leti a ti kumeke, u ta humesa yin'wana ya gandzelo ra xidyoho, yin'wana ya holokosta swin'we ni nyiko; hi mukhuva wulowo, muprista u ta phahlela la tibasisaka mhamba emahlweni ya Yehovha.

³²Hi wona nawu wa ku tibasisa ka wa nhlokonho loko rifuwo ra yena ri nga ringani.”

³³Yehovha a engeta a byela Muxe na Aroni, a ku:

³⁴“Kutakuloko mi nghenile etikweni ra Kanana leri ndzi mi nyikaka rona, loko ndzi nga ba hi nhlokonho yin'wana yindlu ya tiko leri nga ta va ra n'wina,

³⁵n'wini wa yindlu u ta ya tivisa muprista, a ku: ‘Ndzi vonile lexi fanaka ni xivati xa nhlokonho endlwini ya mina.’

³⁶Kutani muprista u ta va byela ku humesa swa le ndlwini a nga si nghena ku ya vona xivati, leswaku hinkwaswo swa le ndlwini swi nga yirisiwi, kutani u ta nghena ku kamba yindlu.

³⁷U ta langutisa xivati, loko xivati lexi nga ekhumbini ra yindlu, xi ni swivatinyana swa rihlaza, hambi swa ribungwanyana leswi celekeke ekhumbini;

³⁸muprista u ta huma endlwini, a yima enyangweni ya yindlu, kutani a pfala yindlu hi masiku ya ntlhanu na mambirhi.

³⁹Muprista u ta engeta a ya kona hi siku ra ntlhanu na mambirhi, kutakuloko a vona xivati xi anamile ekhumbini ra yindlu,

⁴⁰muprista u ta va byela ku susa maribye lama nga ni xivati, va ma cukumeta ehandle ka muti, exivandleni lexi nga tengangiki.

⁴¹Loko yi ri yindlu, va ta yi khwaya hinkwako endzeni, va halata ntshuri lowu khwayiweke ehandle ka muti, exivandleni lexi nga tengangiki.

⁴²Va ta lava maribye man'wana, va ma veka ematshan'weni ya layo sungula; va teka ni ndzhope wun'wana ku phama yindlu.

⁴³“Kambe loko xivati xi engeta xi humelela endlwini, maribye ma susiwile, ni loko va khwayile yindlu, va engete va yi phama,

⁴⁴muprista u ta ya kona, kutakuloko a vonisisile leswaku xivati xi anamile endlwini, i nhlokonho leyo leva leyi nga endlwini, yindlu yi yirisiwile.

⁴⁵Va ta hlanhla yindlu, kutani maribye, ni mapulangi, ni mabuwu, ni misava hinkwayo ya yindlu, hinkwaswo leswi swi ta yisiwa ehandle ka muti, exivandleni lexi nga tengangiki.

⁴⁶Hi masiku hinkwawo lawa yindlu yi pfariweke ha wona, la ngheneke eka yona, u ta va la yilaka ku fika nimadyambu.

⁴⁷La etleleke eka yona u ta hlantswa tinguvu ta yena, ni la dyeleke eka yona u ta hlantswa tinguvu ta yena.

⁴⁸“Kuteloko yindlu yi phamiwile, ni loko muprista u vonile leswaku xivati a xi anamanga endlwini, u ta yi vula yindlu leyi baseke, hikuva swo biha swi herile.

⁴⁹Ku basisa yindlu, u ta teka swinyanyana swimbirhi, ni murhi wa kedari, ni karmesi, ni hisopa;

⁵⁰kutani u ta tlhava yin'wana ya tinyanyana embiteni ya vumba leyi nga ni mati yo tenga.

⁵¹U ta teka murhi wa kedari, ni karmesi, ni hisopa, ni nyanyana leyi hanyaka, a swi peta engatini ya nyanyana leyi tlhaviweke, ni le matini yo tenga, kutani a xuva yindlu ha yona kantlhanu ni kambirhi.

⁵²U ta basisa yindlu hi ngati ya nyanyana, ni mati yo basa, ni nyanyana leyi hanyaka, ni murhi wa kedari, ni hisopa, ni karmesi.

⁵³Kutani u ta tshika nyanyana leyi hanyaka, yi hahela ehandle ka muti, emananga, u ta phahlela yindlu mhamba, kutani yi ta va leyi tengeke.”

⁵⁴Hi wona nawu lowu vekeriweke swivavi hinkwaswo swa nhlokonho, ni swa matshansi,

⁵⁵ni nhlokonho ya tinguvu, ni ya tindlu,

⁵⁶ni matshumba, ni swilondza, ni swivati,

⁵⁷leswaku ku ta kombisiwa loko xilo xi nga tenganga, ni loko xi tengile. Hi wona nawu hikwalaho ka nhlokonho.