Read Xitsonga Leviticus 16 Bible Online

Leviticus 16 - Xitsonga bible

Leviticus 16

¹Yehovha a vulavula na Muxe endzhaku ka rifu ra vana vambirhi va Aroni lava feke siku va tshineleke emahlweni ka Yehovha.

²Yehovha a ku eka Muxe: “Byela Aroni, makwenu, a nga tshuki a nghena hi mikarhi hinkwayo evukwetsimelweni, endzeni ka nguvu ya xisirhelo emahlweni ka vukhongelelo lebyi nga earekeni, a nga ta tshuka a fa; hikuva ndzi ta tikombisa epapeni ehenhla ka vukhongelelo.

³“Aroni u ta nghena evukwetsimelweni hi mukhuva wolowo: u ta teka nkunzi ya gandzelo ra xidyoho, ni khuna ra holokosta.

⁴U ta ambala hembe leyi hlawuriweke ya ntsembyana, a ambala ni buruku ra ntsembyana ku funengeta vuhava bya yena, a tikhama hi vamba ra ntsembyana, a tifunengeta nhloko hi xihuku xa ntsembyana. Hi tona tinguvu leti hlawulekeke; u ta rhanga a hlamba ematini, kutani u ta ti ambala.

⁵U ta nyikiwa hi nhlengeletano ya vana va Israele swiphongo swimbirhi swa gandzelo ra xidyoho, ni khuna ra holokosta.

⁶Aroni u ta humesa nkunzi ya gandzelo ra xidyoho, a tiphahlela mhamba swin'we ni yindlu ya yena.

⁷U ta teka swiphongo swimbirhi, a swi tisa emahlweni ka Yehovha, enyangweni ya tabernakela ya nhlengeletano.

⁸Kutani Aroni u ta hlahluva hi vuhlolotwana ehenhla ka swiphongo swimbirhi, vuhlolotwana byin'wana byi va bya Yehovha, byin'wana bya Azazele.

⁹Kutani Aroni u ta tshineta xiphongo lexi vuhlolotwana bya Yehovha byi xi hlawuleke, u ta endla ha xona gandzelo ra xidyoho.

¹⁰Xiphongo lexi vuhlolotwana bya Azazele byi xi hlawuleke, xi ta tisiwa xi ri karhi xi hanya emahlweni ka Yehovha, ku ta endla mhamba ehenhla ka xona ni ku xi tshika xi famba emananga, xi va xa Azazele.

¹¹“Aroni u ta tisa nkunzi ya gandzelo ra xidyoho leyi nga ya yena, a tiphahlela mhamba swin'we ni va yindlu ya yena; u ta tlhava nkunzi leyi nga ya yena ya gandzelo ra xidyoho.

¹²Kutani u ta teka nhlambeto leyi teleke hi makala lama vombeke lama humaka ealitarini, emahlweni ka Yehovha, ni swandla swimbirhi swa mapa ya mirhi ya risuna: u ta tisa swilo leswi endzeni ka nguvu ya xisirhelo,

¹³a veka mirhi ya risuna emakaleni, emahlweni ka Yehovha, kutani papa ra musi wa mirhi ri ta funengeta vukhongelelo lebyi nga ehenhla ka vumbhoni, leswaku a nga ti fa.

¹⁴U ta teka hi ritiho ngati ya nkunzi, a xuva ha yona ehenhla ka vukhongelelo, evuxeni kutani u ta xuva hi ngati eka ntlhanu na kambirhi hi ritiho, emahlweni ka vukhongelelo.

¹⁵“Kutani u ta tlhava xiphongo xa gandzelo ra vudyoho, leri nga ra tiko, a va a tisa ngati ya xona endzeni ka nguvu ya xisirhelo; u ta endla hi ngati leyi kukotisa leswi a swi endleke hi ngati ya nkunzi; a xuva ha yona ehenhla ka vukhongelelo, ni le mahlweni ka byona.

¹⁶“U ta phahlela vukwetsimelo mhamba hikwalaho ka leswi nga tengangiki swa vana va Israele, ni ka swidyoho swa vona, hambi wu ri nandzu wihi ni wihi. U ta endlela sweswo tabernakela ya nhlengeletano leyi tshamaka na vona exikarhi ka leswi nga tengangiki eka vona;

¹⁷ku nga ka ku nga vi na munhu etabernakeleni ya nhlengeletano siku a nghenaka ku phahla mhamba evukwetsimelweni, a ko a huma kona; u ta tiphahlela mhamba ni va yindlu ya yena, ni nhlengeletano hinkwayo ya Israele.

¹⁸Kutakuloko a humile, u ta ya ealitarini leyi nga emahlweni ka Yehovha, u ta phahlela alitari mhamba; u ta teka ngati ya nkunzi, ni ngati ya xiphongo, a yi tota etimkondzweni ta alitari hi matlhelo hinkwawo.

¹⁹Kutani u ta xuva hi ngati hi ritiho kantlhanu ni kambirhi ealitarini, a yi basisa ni ku yi kwetsimisa hikwalaho ka swidyoho swa vana va Israele.

²⁰“Kuteloko a hetile ku phahlela vukwetsimelo mhamba, ni tabernakela ya nhlengeletano, ni alitari, u ta tshineta xiphongo lexi hanyaka.

²¹Aroni u ta tlhandlekela mavoko ya yena enhlokweni ya xiphongo lexi hanyaka, kutani u ta vula ehenhla ka xona ku dyoha hinkwako ka vana va Israele, ni milandzu hinkwayo ya vona, hambi swi ri swidyoho swihi ni swihi a swi veka enhlokweni ya xiphongo kutani xi ta yisiwa emananga hi munhu la hlawuleriweke ntirho lowo.

²²Xiphongo xi ta rhwala ehenhla ka xona ku dyoha hinkwako ka vona emananga; kutani munhu loyi u ta tshiketa xiphongo emananga.

²³“Aroni u ta nghena etabernakeleni ya nhlengeletano, kutani u ta hluvula tinguvu ta ntsembyana leti a ti ambaleke ku nghena evukwetsimelweni, a ti veka kona.

²⁴Kutani a hlamba miri ematini, exivandleni lexo kwetsima, a engeta a ambala tinguvu ta yena; kutani u ta huma, a ya humesa holokosta ya yena ni holokosta ya tiko, a va a tiphahlela mhamba swin'we ni tiko;

²⁵kutani u ta hisa mafurha ya gandzelo ra xidyoho ealitarini.

²⁶“Loko a ri la yiseke xiphongo xa Azazele, u ta hlantswa tinguvu ta yena, a hlamba ematini; u ta nghena emixaxeni kutani.

²⁷Va ta rhwala ehandle ka mixaxa nkunzi ni xiphongo, swi ri swa gandzelo ra xidyoho, leswi ngati ya swona yi nga yisiwa evukwetsimelweni ku ta phahla mhamba; madzovo ya swona, ni tinyama, ni swanyi wa swona swi ta hisiwa endzilweni.

²⁸Loyi a swi hiseke u ta hlantswa tinguvu ta yena a hlamba miri ematini, a ta tlhela a nghena emixaxeni kutani.

²⁹“Hi wona nawu lowu nga heriki eka n'wina; hi n'hweti ya ntlhanu na timbirhi, hi siku ra khume ra n'hweti, mi ta va ni nhlomulo etimbilwini ta n'wina, mi nga endli ntirho ni wun'we hambi a ri warikwenu, hambi a ri wa matiko la akeke exikarhi ka n'wina.

³⁰Hikuva hi siku leri, mi ta phahleriwa mhamba leswaku mi basisiwa; mi ta basisiwa eka swidyoho hinkwaswo swa n'wina emahlweni ka Yehovha.

³¹Ri ta va siku ra ku wisa eka n'wina, ni ra nhlomulo etimbilwini ta n'wina; i ku lerisa loku nga heriki.

³²Mhamba yi ta phahliwa hi muprista la hlawuriweke ematshan'weni ya tata wa yena; u ta ambala tinguvu leti hlawuriweke ta ntsembyana.

³³U ta phahlela vukwetsimelo lebyi hlawuriweke mhamba, a phahlela ni tabernakela ya nhlengeletano ni alitari mhamba; a phahlela vaprista ni tiko hinkwaro ra nhlengeletano mhamba.

³⁴Leswi swi ta va ka n'wina ku lerisa loku nga heriki, hileswaku kan'we hi lembe, vana va Israele va ta phahleriwa mhamba, leswaku va rhuliwa swidyoho hinkwaswo swa vona.” Ku endliwa hilaha Yehovha a leriseke Muxe hakona.