Read Xitsonga Leviticus 18 Bible Online

Leviticus 18 - Xitsonga bible

Leviticus 18

¹Yehovha a byela Muxe, a ku:

²“Byela vana va Israele, u ku eka vona: ‘Hi mina Yehovha, Xikwembu xa n'wina.

³Mi nga tshuki mi endla leswi va swi endlaka etikweni ra Egipta, laha ingi mi akile kona; mi nga tshuki mi endla leswi va swi endlaka etikweni ra Kanana laha ndzi mi yisaka kona; mi nga tshuki mi landza mikhuva ya vona.

⁴Mi ta yingisa ku lerisa ka mina, mi landza milawu ya mina, mi famba ha yona. Hi mina Yehovha, Xikwembu xa n'wina.

⁵Mi ta yingisa milawu ya mina ni ku lerisa ka mina, munhu la swi endlaka u ta hanya ha swona; hi mina Yehovha.

⁶“ ‘Ku nga tshuki ku va ni wanuna la tshinelelaka xaka ra yena, leyi nga nyama ya yena, ku funungula vuhava bya yena: hi mina Yehovha.

⁷“ ‘U nga tshuki u funungula vuhava bya tata wa wena, ni vuhava bya mana wa wena; i mana wa wena, u nga fununguli vuhava bya yena.

⁸“ ‘U nga tshuki u funungula vuhava bya nsati wa tata wa wena; i vuhava bya tata wa wena.

⁹“ ‘U nga tshuki u funungula vuhava bya makwenu wa xisati, a nga n'wana wa tata wa wena, hambi a ri n'wana wa mana wa wena; hambiloko a velekiwile endlwini, hambiloko a velekiwile ehandle; u nga fununguli vuhava bya yena.

¹⁰“ ‘U nga tshuki u funungula vuhava bya ntukulu wa wena wa xisati, hikuva i vuhava bya wena.

¹¹“ ‘U nga tshuki u funungula vuhava bya makwenu, n'wana wa xisati wa tata wa wena, la nga velekiwa hi tata wa wena; i makwenu.

¹²“ ‘U nga tshuki u funungula vuhava bya hahani wa wena, hikuva i ngati ya tata wa wena.

¹³“ ‘U nga tshuki u funungula vuhava bya makwavo wa xisati wa mana wa wena, hikuva i nyama ya mana wa wena.

¹⁴“ ‘U nga tshuki u funungula vuhava bya makwavo wa tata wa wena; u nga tshuki u tshinela nsati wa yena; i hahani wa wena.

¹⁵“ ‘U nga tshuki u funungula vuhava bya n'wingi wa wena; i nsati wa n'wana wa wena, u nga fununguli vuhava bya yena.

¹⁶“ ‘U nga tshuki u funungula vuhava bya nsati wa makwenu; i vuhava bya makwenu.

¹⁷“ ‘U nga tshuki u funungula vuhava bya wansati ni n'wana wa yena; u nga tshuki u teka ntukulu wa yena ku funungula vuhava bya vona, i maxaka swinene; swi fana ni ku dlaya.

¹⁸“ ‘U nga tshuki u teka namu wa wena leswaku ku pfuxiwa ku vengana, i ku funungula vuhava bya namu wa wena swin'we ni bya nsati wa wena a ri karhi a hanya.

¹⁹“ ‘U nga tshuki u tshinelela wansati hi nkarhi wa n'hweti ya yena ku funungula vuhava bya yena.

²⁰“ ‘U nga tshuki u hlangana ni nsati wa warikwenu ku tinyamisa na yena.

²¹“ ‘U nga tshuki u nyiketa vana va wena leswaku ku phahliwa timhamba ta Moloko ha vona. U nga tshuki u sorisa vito ra Xikwembu xa wena. Hi mina Yehovha.

²²“ ‘U nga tshuki u etlela ni wanuna kukotisa loko u etlela ni wansati; i ku dyoha lokukulu ngopfu.

²³“ ‘U nga tshuki u etlela ni xifuwo ku tinyamisa ha xona. Wansati a nga tshuki a tshinelela xifuwo ku oswana na xona; i tingana leti chavisaka.

²⁴“ ‘Mi nga tshuki mi tinyamisa hi xilo xin'we swa swilo leswi: hikuva; matiko lawa ndzi ma hlongoleke emahlweni ka n'wina, ma tinyamisile hi swilo leswi hinkwaswo.

²⁵Tiko ri nyamisiwile hi swona; ndzi avanyisile ku dyoha ka rona, kutani misava yi hlantile vaaki va yona.

²⁶Loko mi ri n'wina, mi ta hlayisa milawu ya mina ni ku lerisa ka mina, mi nga tshuki mi endla ni xin'we xa swivi leswi, hambi a ri la tswariweke etikweni, hambi muluveri la luveleke exikarhi ka n'wina.

²⁷Hikuva swivi leswi, swi endliwe hi vanhu va tiko lava akeke kona, mi nga si va kona, kutani misava yi nyamisiwile hi swona.

²⁸Tilanguteleni leswaku misava yi nga tshuki yi mi hlanta loko mi yi nyamisile, kukotisa leswi yi hlanteke tiko leri ngi ri ri kona emahlweni ka n'wina.

²⁹Hikuva hinkwavo lava nga ta endla xin'wana xa swivi leswi, va ta susiwa exikarhi ka varikwavo.

³⁰Mi ta hlayisa milawu ya mina, leswaku mi nga tshuki mi landza ni wun'we wa mikhuva leyo biha leyi landziweke hi vona mi nga si va kona; mi nga tshuki mi tinyamisa ha yona.’ Hi mina Yehovha, Xikwembu xa n'wina.”