Read Xitsonga Leviticus 19 Bible Online

Leviticus 19 - Xitsonga bible

Leviticus 19

¹Yehovha a byela Muxe, a ku:

²“Byela nhlengeletano ya vana va Israele, u ku eka vona: ‘Hlawulekani hikuva ndzi hlawulekile, mina Yehovha, Xikwembu xa n'wina.

³“ ‘Un'wana ni un'wana a a xixime mana wa yena ni tata wa yena; a a hlayise ni Tisavata ta mina. Hi mina Yehovha, Xikwembu xa n'wina.

⁴“ ‘Mi nga tshuki mi rhendzelekela eka swikwembu swa mavunwa, mi nga tshuki mi tiendlela swikwembu swa vumba. Hi mina Yehovha, Xikwembu xa n'wina.

⁵“ ‘Kutakuloko mi humesela Yehovha mhamba ya ku khensa, mi ta yi humesa hi mukhuva lowu fanelaka leswaku mi ta amukeriwa.

⁶Yi ta dyiwa hi siku mi yi humesaka ni leri tlhandlamaka; leswi nga ta salela siku ra vunharhu, swi ta hisiwa endzilweni.

⁷Loko swi dyiwa hi siku ra vunharhu, i ku dyoha lokukulu; gandzelo ri nga ka ri nga amukeriwi.

⁸La dyaka swona u ta rhwala nandzu wa yena, hikuva u onhile leswi hlawuleriweke Yehovha. Munhu loyi u ta susiwa exikarhi ka varikwavo.

⁹“ ‘Kutakuloko mi tshovela etikweni ra n'wina, u nga fiki emakun'weni ya nsimu ya wena hi ku tshovela, u nga ka u nga rholeli leswi seleke eku tshoveleni ka wena.

¹⁰U nga tshuki u kha leswi seleke evhinyeni ya wena, ni ku rholela mihandzu leyi weke ensin'wini ya wena U ta swi tshikela xisiwana ni muluveri. Hi mina Yehovha, Xikwembu xa n'wina.

¹¹“ ‘Mi nga tshuki mi yiva. Mi nga tshuki mi hembelana, hambi ku ri ku xisana.

¹²“ ‘Mi nga tshuki mi hlambanya hi vito ra mina hi ku hemba, hikuva mi ta va mi tlangile hi vito ra Xikwembu xa n'wina. Hi mina Yehovha.

¹³“ ‘U nga tshuki u endla wa rikwenu hi matimba, ni ku teka xilo xa yena hi matimba. U nga tshuki u khoma hakelo ya mutirhi ku fika siku ra mundzuku.

¹⁴“ ‘U nga tshuki u rhuketela la feke tindleve, u nga tshuki u veketela emahlweni ka lowo fa mahlo xilo lexi nga n'wi khunguvanyisaka; u ta chava Xikwembu xa wena: hi mina Yehovha.

¹⁵“ ‘Mi nga tshuki mi voyamisa ku lulama eku avanyiseni ka n'wina; u nga tshuki u ya hi nghohe ku lamulela xisiwana, ni ku languta nghohe ya nkulukumba; u ta avanyisa wa rikwenu hi ku lulama.

¹⁶“ ‘U nga tshuki u lumbeta loko u ri karhi u hungata exikarhi ka tiko ra wena. U nga tshuki u tiendlela mbhoni ya ngati ya warikwenu: hi mina Yehovha.

¹⁷“ ‘U nga tshuki u venga makwenu embilwini ya wena; u nga tshiki ku tshinya wa rikwenu leswaku u nga tirhwexi nandzu hikwalaho ka yena.

¹⁸“ ‘U nga tshuki u tirihisela, u nga tshami u va ni rivengo ni vana va tiko ra wena; u ta rhandza warikwenu kukotisa loko u tirhandza: hi mina Yehovha.

¹⁹“ ‘Mi ta hlayisa ku lerisa ka mina. U nga tshuki u hlanganisa swifuwo swa tinxaka timbirhi. U nga tshuki u byala timbewu ta tinxaka timbirhi ensin'wini ya wena. U nga tshuki u ambala nguvu leyi lukiweke hi mavoya ya tinxakaxaka.

²⁰“ ‘Kungakuloko munhu a etlela ni wansati la fuyiweke, la vutiweke hi wanuna un'wana, a nga si kutsuriwa ni ku tshunxiwa, va ta biwa havambirhi, kambe ku nga vi hi rifu, hikuva wansati a nga kutsuriwanga.

²¹Wanuna u ta tisa eka Yehovha enyangweni ya tabernakela ya nhlengeletano, khuna ra gandzelo ra nandzu.

²²“ ‘Muprista u ta n'wi phahlela mhamba emahlweni ka Yehovha hi khuna ra gandzelo ra nandzu, hikwalaho ka xivi lexi a xi endleke, kutani u ta rivaleriwa xivi lexi a xi endleke.

²³“ ‘Kuteloko mi nghenile etikweni, kutani mi byarile mirhi ya mihandzu ya tinxakaxaka; hi malembe manharhu mi ta ringanisa mihandzu leyi, kukotisa loko yi nga yimbanga; eka n'wina yi ta va leyi nga yimbangiki, mi nga tshuki mi dya yona.

²⁴Hi lembe ra vumune, mihandzu hinkwayo ya yona yi ta hlawuleriwa Yehovha hi ku khensa.

²⁵Hi lembe ra vuntlhanu, mi ta dya mihandzu ya yona leswaku mirhi yi tshama yi mi vekela mihandzu: hi mina Yehovha, Xikwembu xa n'wina.

²⁶“ ‘Mi nga tshuki mi dya xilo lexi nga ni ngati. Mi nga tshuki mi bvumbha, hambi ku ri ku hlahluva.

²⁷Mi nga tshuki mi byewula matlhelo ya tinhloko ta n'wina, mi rhendzelekela; u nga tshuki u byewula matlhelo ya malebvu ya wena.

²⁸Mi nga tshuki mi titlhavela miri hikwalaho ka mufi, mi nga ti tsali swifaniso emirini ya n'wina: hi mina Yehovha.

²⁹“ ‘U nga tshuki u khomisa n'wana wa wena wa wanhwana tingana hi ku n'wi nyiketa vuoswi, kambe tiko ri nga tshuki ri tinyiketa vuoswi, ri va ri tala hi ku dlayana.

³⁰“ ‘Mi ta hlayisa Tisavata ta mina; mi xixima vukwetsimelo bya mina: hi mina Yehovha.

³¹“ ‘Mi nga tshuki mi ya evangomeni ni ka lava hlahluvaka, mi nga tshuki mi va vutisisa timhaka leswaku mi nga tinyamisi ha vona: hi mina Yehovha, Xikwembu xa n'wina.

³²“ ‘U ta yima emahlweni ka misisi leya timpfu, u xixima nkulukumba, u chava Xikwembu xa wena. Hi mina Yehovha.

³³“ ‘Kutakuloko muluveri a luvela exikarhi ka n'wina, etikweni ra n'wina, mi nga tshuki mi n'wi xanisa.

³⁴Muluveri, la luvelaka exikarhi ka n'wina u ta va eka n'wina kukotisa un'wana wa n'wina; u ta n'wi rhandza kukotisa loko u tirhandza; hikuva a mi ri valuveri etikweni ra Egipta; hi mina Yehovha, Xikwembu xa n'wina.

³⁵“ ‘Mi nga tshuki mi endla leswi nga lulamangiki ehubyeni, hambi ku ri ku pimeni ka leswo leha, ni le ku pimeni ka leswo tika, ni le mpin'weni lowu tatiwaka.

³⁶Mi ta va ni xikalo lexo lulama, ni maribye ya xona yo lulama; ni efa leyi lulameke ni hino leyi lulameke: hi mina Yehovha, Xikwembu xa n'wina, la mi humeseke eEgipta.

³⁷Mi ta hlayisa milawu hinkwayo ya mina, ni ku lerisa hinkwako ka mina, mi va mi endla hakona: hi mina Yehovha.’ ”