Read Xitsonga Leviticus 26 Bible Online

Leviticus 26 - Xitsonga bible

Leviticus 26

¹“ ‘Mi nga tshuki mi tiendlela swifaniso swa swikwembu swahava; mi nga tshuki mi tiyimisela swifaniso leswi vatliweke, ni swifaniso swa vanhu; kambe mi nga tshuki mi yimisa etikweni ra n'wina ribye leri nga ni xifaniso ku khinsama emahlweni ka xona hikuva hi mina Yehovha, Xikwembu xa n'wina.

²Mi ta hlayisa Tisavata ta mina, mi chava vukwetsimelo bya mina. Hi mina Yehovha.

³“ ‘Loko mi famba hi milawu ya mina ni loko mi hlayisa ku lerisa ka mina mi va mi endla hakona,

⁴ndzi ta mi nyika timpfula emikarhini ya tona; misava yi ta humesa swa yona, ni mirhi ya masimu yi ta veka mihandzu ya yona.

⁵Etikweni ra n'wina, nkarhi wa ku hula wu ta hlangana ni nkarhi wa ku khuvuta ka vhinyo; ni ku khuvuta ka vhinyo ku ta hlangana ni nkarhi wa ku byala. Mi ta dya vuswa bya n'wina mi va mi xurha, mi ta aka hi ku rhula etikweni ra n'wina.

⁶Ndzi ta nghenisa ku rhula etikweni mi ta etlela mi nga tshukisiwi hi munhu; ndzi ta susa swivandzana etikweni, ni fumu ri nga ka ri nga fiki etikweni ra n'wina.

⁷Mi ta hlongorisa valala va n'wina, va wa hi matlhari emahlweni ka n'wina.

⁸Vanhu va ntlhanu va n'wina va ta hlongorisa dzana, ni dzana ra va ka n'wina va ta hlongorisa dzana ra madzana; valala va n'wina va ta dlawa hi matlhari emahlweni ka n'wina.

⁹“ ‘Ndzi ta hundzukela eka n'wina, ndzi mi andzisa mi tala, kambe ndzi ta tiyisa ntwanano wa mina na n'wina.

¹⁰Mi ta dya leswi tshoveriweke khale, mi va mi humesa mavele ya khale ku nghenisa lamantshwa.

¹¹Ndzi ta aka yindlu ya mina exikarhi ka n'wina, ni moya wa mina wu nga ka wu nga phirweki ha n'wina.

¹²Ndzi ta famba exikarhi ka n'wina, ndzi va Xikwembu xa n'wina, n'wina mi va tiko ra mina.

¹³Hi mina Yehovha, Xikwembu xa n'wina lexi mi humeseke etikweni ra Egipta, leswaku mi nga ha tshuki mi va makhumbi kona. Ndzi fayile mpingu wa joko ra n'wina, ndzi mi fambisile mi yimisa tinhamu.

¹⁴“ ‘Kambe loko mi nga ndzi yingisi, ni loko mi nga fambi hi milawu hinkwayo leyi,

¹⁵loko mi sandza ku lerisa ka mina, ni loko mimoya ya n'wina yi phiriwa hi ku lerisa ka mina, leswaku mi nga fambi hi milawu ya mina hinkwayo, ni leswaku mi tlula ntwanano wa mina,

¹⁶na mina ndzi ta mi endla leswi: ndzi ta mi rhumela nchavo, xifuva, ni ku hisa ka miri swi ta heta mahlo ya n'wina, swi ta herisa ni timbilu ta n'wina; mi ta byalela timbewu ta n'wina mahala: valala va n'wina va ta ti dya.

¹⁷Ndzi ta mi languta hi vukari; mi ta tlhaviwa hi valala va n'wina; lava mi vengaka va ta mi fuma, kutani mi ta baleka mi nga hlongorisiwi hi munhu.

¹⁸“ ‘Kutani, kwalaho, loko mi nga ndzi yingisi, ndzi ta engeta ndzi mi ba kambe eka ntlhanu na kambirhi, hikwalaho ka ku dyoha ka n'wina.

¹⁹Ndzi ta tshova ku tikukumuxa ka n'wina ni matimba ya n'wina ndzi endla tiko ra n'wina ri fana ni nsimbhi, ni misava ya n'wina, yi fana ni koporo.

²⁰Matimba ya n'wina ma ta helela mahala, misava ya n'wina yi nga ka yi nga nyiki swa yona, ni mirhi ya misava yi nga ka yi nga veki mihandzu ya yona.

²¹“ ‘Kutani loko mi rhandza ku lwa na mina, mi nga ndzi yingisi, ndzi ta engeta ndzi mi ba kambe kantlhanu na kambirhi ku ringanisa ku dyoha ka n'wina.

²²Ndzi ta mi nyiketa swivandzana, swi mi hlongorisa, swi khoma vana va n'wina, swi heta swifuwo swa n'wina, swi mi siya mi nga ri vangani, kutani tindlela ta n'wina ti va ti tlhuma.

²³“ ‘Loko mi nga amukeri ku laya ka mina hi ku biwa loku, ni loko ma ha rhandza ku lwa na mina,

²⁴na mina ndzi ta lwa na n'wina, ndzi engeta ndzi mi ba kambe kantlhanu na kambirhi, hikwalaho ka ku dyoha ka n'wina.

²⁵Ndzi ta rhumela ehenhla ka n'wina matlhari yo rihisela ntwanano wa mina; kutani, kutakuloko mi hlengeletanile emitini ya n'wina, ndzi ta rhuma ntungu exikarhi ka n'wina kutani mi ta nyiketiwa emavokweni ya nala.

²⁶Kutakuloko ndzi mi tekerile vuswa bya n'wina, vasati va khume va ta mi swekela vuswa hi mbita yin'we va mi pimela vuswa bya n'wina hi mpimo; mi ta dya, kambe mi nga ka mi nga xurhi.

²⁷“ ‘Ku fika kwalaho, loko mi nga ndzi yingisi, kambe ma ha rhandza ku lwa na mina,

²⁸ndzi ta lwa na n'wina hi matimba, ndzi mi ba kambe kantlhanu na kambirhi, hikwalaho ka ku dyoha ka n'wina.

²⁹Mi ta dya nyama ya vana va n'wina va varisanyana, mi dya ni nyama ya vanhwanyana va n'wina.

³⁰Ndzi ta hlanhla swivandla leswi tlakukeke swa n'wina, ndzi wisa maribye lama yimiseriweke dyambu, kutani ndzi veka mitsumbu ya n'wina ehenhla ka mitsumbu ya swikwembu swa n'wina swa swifaniso, moya wa mina wu va wu mi nyenyetsa.

³¹Ndzi ta onha miti ya n'wina, ma va marhumbi ndzi hlanhla vukwetsimelo bya n'wina; ndzi nga ka ndzi nga nun'hweteli mirhi ya risuna ya mihlengo ya n'wina.

³²Ndzi ta herisa tiko, kutani valala va n'wina lava nga ta aka kona, va ta hlamala ngopfu.

³³Loko mi ri n'wina, ndzi ta mi hangalasa ematikweni, ndzi humesa matlhari endzhaku ka n'wina, tiko ra n'wina ri ta sala ri kotisa mananga, ni miti ya n'wina yi va marhumbi.

³⁴“ ‘Kavaloko tiko ri ta tsakela Tisavata ta rona emikarhini hinkwayo ya ku onhaka ka rona, hambiloko mi hangalakile ematikweni ya valala va n'wina; hakona tiko ri nga ta wisa ni ku titsakela eTisavateni ta rona.

³⁵Hi masiku hinkwawo ya ku onhaka ka rona, ri ta wisa, hikuva a ri nga wisanga eTisavateni ta n'wina, enkarhini lowu ngi mi akile eka rona.

³⁶Loko va ri lava nga ta pona, ndzi ta va endla matoya etikweni ra valala va vona; pongo ra tluka leri tsekatsekisiwaka ri ta va hlongola va ta baleka kukotisa loko va baleka emahlweni ka matlhari; va ta wa va nga hlongorisiwi.

³⁷Va ta khunguvanyeka va wa ingi va ri emahlweni ka matlhari, va nga hlongorisiwi hi munhu, mi nga ka mi nga yimi emahlweni ka valala va n'wina.

³⁸Mi ta lova ematikweni, kutani misava ya valala va n'wina yi ta mi heta.

³⁹Lava nga ta sala exikarhi ka n'wina, va ta tshwa hikwalaho ka ku dyoha ka vona etikweni ra valala va n'wina; va ta tshwa ni hikwalaho ka ku dyoha ka vatata wa vona, loku nga eka vona.

⁴⁰“ ‘Kutakuloko va tivula swidyoho swa vona, ni swidyoho swa vatata wa vona eku dyoheni loku va ndzi dyoheleke hakona;

⁴¹(kambe na mina ndzi lwile na vona, kutani ndzi va nghenisile etikweni ra valala va vona); kutakuloko timbilu ta vona leta ku ka ti nga yimbanga ti titsongahata, ni loko va amukela ku biwa ka milandzu ya vona,

⁴²ndzi ta tsundzuka ntwanano wa mina na Yakobo, kambe ndzi ta tsundzuka ntwanano wa mina na Isaka, ni ntwanano wa mina na Abrahama, ndzi va ndzi tsundzuka ni tiko;

⁴³kambe tiko ri ta sala ntsena vona va nga ri kona, kutani ri ta titsakela eTisavateni ta rona, hi nkarhi lowu ri nga ta tshama ntsena va nga ri kona, kutani va ta amukela ku biwa ka milandzu ya vona, hikuva va sandzile ku lerisa ka mina ni mimoya ya vona yi vengile milawu ya mina.

⁴⁴Kambe, hambi va nghenile etikweni ra valala va vona, ndzi nga ka ndzi nga va cukumeti, ndzi nga ka ndzi nga va tshiki ndzi ko ndzi va heta, ndzi va ndzi tlula ntwanano wa mina na vona: hikuva hi mina Yehovha, Xikwembu xa vona.

⁴⁵Ndzi ta tsundzuka ntwanano lowo ndzi wu endleke ni vatata wa vona lava ndzi va humeseke ha wona etikweni ra Egipta, emahlweni ka matiko, leswaku ndzi va Xikwembu xa vona: hi mina Yehovha.’ ”

⁴⁶Hi wona marito, ni ku lerisa, ni milawu leyi Yehovha a yi vekeke ha Muxe, exikarhi ka yena ni vana va Israele, entshaveni ya Sinayi.