Read Xitsonga Jeremiah 18 Bible Online

Jeremiah 18 - Xitsonga bible

Jeremiah 18

¹Hi rona rito leri teke eka Yeremiya ri huma eka Yehovha, ri ku:

²“Suka u ngirimela endlwini ya muvumbi, ndzi ta ku tivisa kona marito ya mina.”

³Kutani ndzi ngirimela endlwini ya muvumbi, kambe ndzi n'wi kuma a tirha hi masondzo.

⁴Kambe mbita leyi ingi a endla yona yi onhaka hilaha swi humelelaka hakona eka vumba emavokweni ya muvumbi: kambe a engeta a endla mbita leyintshwa hilaha muvumbi a swi rhandzeke ku endla hakona.

⁵Kutani rito ra Yehovha ri ta eka mina, ri ku:

⁶“A ndzi ku, na mina ndzi nga endla ha n'wina, yindlu ya Israele, hilaha muvumbi yeloyi a endleke hakona, ku vula Yehovha? Vonani, kukotisa loko vumba byi ri emavokweni ya muvumbi, na n'wina, yindlu ya Israele, mi tano evokweni ra mina.

⁷Kakuloko ndzi byela tiko, kumbe ku fuma, leswaku ndzi ta ri yimbula, ndzi ri kandziyela, ndzi ri heta;

⁸loko tiko leri ndzi ri tshinyeke ri hundzuka eku biheni ka rona, na mina ndzi tlhela eku kariheni kuloku ingi ndzi anakanyile ku va endlela hakona.

⁹Kambe kungakuloko ndzi byele tiko kumbe vuhosi, leswaku ndzi ta va akisa, ndzi va ndzi va simeka.

¹⁰Loko va endla leswo biha emahlweni ka mina, va ala ku yingisa rito ra mina, na mina, ndzi ta tlhela etintswalweni leti ngi ndzi va byerile leswaku ndzi ta va endlela tona.

¹¹“Kutani sweswi, byela vavanuna va Yuda ni vaaki va Yerusalema, u ku: ‘Yehovha u ri: “Vonani, ndzi mi lunghiserile khombo, kambe ndzi mi endlele makungu layo biha; hundzukani un'wana ni un'wana emikhuveni ya yena leyo biha, kutani mi sasekisa ku famba ka n'wina ni ku endla ka n'wina.” ’

¹²Kambe va ku: ‘A swi pfuni! Hi ta famba hi ku tirhandzela ka hina, leswaku un'wana ni un'wana a endla hi ku nonon'hwa ka mbilu ya yena leyo biha.’

¹³“Loko swi ri tano, Yehovha u ri: ‘Vutisisani sweswi matiko, mi ku: “Xana un'wana a nga va kona la tshamaka a yingisa lexo tano-ke? Kambe nhwanyana wa Israele u endlile mhaka leyi chavisaka ngopfu.

¹⁴Xana gamboko ra Lebanoni ri nga tshika ribye ra nhova xana? Xana mati lama khulukaka lama sasekeke, lama humaka ekule, ma nga phya xana?

¹⁵Kambe tiko ra mina ri ndzi rivele va fambile va ya hisela swilo swahava magandzelo va hambukisiwile etindleleni ta vona ta khale va fambisiwa emitileni ya tindlela leti nga vandziwangiki;

¹⁶kutani va endla tiko ra vona xihlamariso ni xisandzu hilaha ku nga heriki; hileswaku un'wana ni un'wana la nga ta hundza eka rona a hlamala, kutani a nikinisa nhloko ya yena.

¹⁷Kukotisa moya wa vuxa, ndzi ta va hangalasa emahlweni ka valala; ndzi va languta hi xikosi, ku nga ri hi mombo, hi siku ra ku onhaka ka vona.” ’ ”

¹⁸Va ri karhi va ku: “Tanani, hi endla makungu ku lovisa Yeremiya; hikuva nawu wu nga ka wu nga heri eka muprista, ni ku tsundzuxa ku nga ka ku nga heri eka la tlhariheke, ni loko ri ri rito eka muprofeta. Tanani, a hi n'wi tlhaveni hi ririmi, kutani hi nga anakanyi ku vulavula ka yena, ni kun'we.”

¹⁹Yehovha, ndzi hlayise, u yingisela rito ra lava ndzi tengisaka.

²⁰Xana ku nga fuma ku biha ematshan'weni ya ku lulama, hilaha va nga celela vutomi bya mina rindzi xana? Tsundzuka leswaku a ndzi ri karhi ndzi yima emahlweni ka wena ku va vulavulela, leswaku ndzi hambukisa vukari bya wena eka vona!

²¹Hikwalaho, nyiketa ndlala vana va vona, u va tshiketela fumu; vasati va vona a va feriwe hi vana va ve tinoni, kutani vanuna va vona a va dlawe hi rifu, ni majaha ya rikwavo a ma tlhaviwe hi fumu enyimpini!

²²Mukhosi a wu twakale etindlwini ta vona siku u tisaka mavandla hi xipuku ku ta lwa na vona; hikuva va cerile rindzi ra ku ndzi weta, kutani va ndzi rhiyile milenge hi ntlhamu.

²³Kambe, wena Yehovha, u tiva leswaku makungu hinkwawo ya vona ehenhla ka mina ku ndzi dlaya; u nga tshuki u funengeta nandzu wa vona, kutani u nga susi xidyoho xa vona emahlweni ka wena; a va susumetiwe emahlweni ka wena! Hi siku ra vukari bya wena u endlisa sweswo na vona.