Read Xitsonga Jeremiah 19 Bible Online

Jeremiah 19 - Xitsonga bible

Jeremiah 19

¹Yehovha u vurisile a ku: “Yana, u ya tixavela mbita ya vumba eka muvumbi, kambe u ya ni vakulukumba van'wana va tiko ni vakulukumba va vaprista;

²kutani u humela enkoveni wa n'wana Hinomu lowu nga emahlweni ka nyangwa ya vavumbi, kutani u ya va byela kona marito lawa ndzi nga ta ku byela wona,

³u ku: ‘Yingisani rito ra Yehovha, n'wina tihosi ta Yuda ni vaaki va Yerusalema! Yehovha wa tinyimpi, Xikwembu xa Israele u vula a ku: “Langutani, ndzi ta tisa exivandleni lexi ku biha loku, un'wana ni un'wana la ku yingisaka, tindleve ta yena ti ta ku ntswunu,

⁴hikuva va ndzi tshikile, kutani va sandzile xivandla lexi, hikuva kona, mirhi ya risuna, va yi hisele swikwembu swin'wana leswi nga ka swi nga tiviwi hi vona, ni vatata wa vona, ni tihosi ta Yuda, kutani va tatile xivandla lexi hi ngati ya lava nga riki na nandzu;

⁵kutani va akele Baali swivandla leswi tlakukeke ku hisa kona vana va vona endzilweni yi va holokosta ya Baali, swi nga leswi ndzi nga va lerisangiki, ndzi nga va byelangiki swona, leswi swi nga ka swi nga humi embilwini ya mina.

⁶Hikwalaho langutani, ku vula Yehovha, ku ta ta masiku lawa va nga ha tiki va vula xivandla lexi Tofete, hambi wu ri nkova wa n'wana Hinomu, kambe va ta wu vula nkova wa rifu.

⁷Ndzi ta herisa makungu ya Yuda ni ya Yerusalema, exivandleni lexi, ndzi va wisa hi fumu emahlweni ka lava nga valala va vona, ni le vokweni ra lava lavaka vutomi bya vona; kambe mitsumbu ya vona, ndzi ta yi nyika tinyanyana ta tilo ni swivandzana swa misava leswaku yi dyiwa hi swona.

⁸Kutani ndzi ta endla muti lowu xihlamariso ni xisandzu, leswaku un'wana ni un'wana la nga ta hundza kona a hlamala a ba noti hikwalaho ka makhombo hinkwawo ya kona.

⁹Kutani ndzi ta va dyisa nyama ya vana va vona va xinuna, ni nyama ya vana va vona va xisati, kambe un'wana ni un'wana u ta dya nyama ya warikwavo hi masiku ya ku xaniseka koloku va nga ta xanisiwa hakona hi valala va vona, lava lavaka vutomi bya vona.” ’

¹⁰“Kwalaho u ta faya mbita emahlweni ka vanhu lava ngi va yile na wena,

¹¹kutani u va byela, u ku: ‘Ku vula Yehovha wa tinyimpi a ku: “Ndzi ta fayisa sweswo tiko leri ni muti lowu, kukotisa loko ku fayiwa mbita ya muvumbi, leyi nga tiki tlhela yi hlanganisiwa. Kutani ku ta yimberiwa mitsumbu eTofete hi ku pfumala ndhawu laha ku lahliwaka kona.

¹²Ndzi ta endlisa sweswo xivandla lexi ni vaaki va kona, ku vula Yehovha, ndzi ta endla muti lowu ku fana na Tofete.

¹³Kutani tindlu ta Yerusalema, ni tindlu ta tihosi ta Yuda ti ta va thyaka kukotisa xivandla xa Tofete; ti nga tindlu leti hinkwato va khandziyaka ehenhla ka tona ku hisela vandla hinkwaro ra le tilweni mirhi ya risuna, ni ku chululela swikwembu swin'wana tinyiko.” ’ ”

¹⁴Kutani Yeremiya a sukela Tofete laha Yehovha ingi a n'wi rhumele kona ku ya profeta; a ta, a ta yima erivaleni ra Yindlu ya Yehovha, kambe a ku eka tiko hinkwaro:

¹⁵“Ku vula Yehovha wa tinyimpi, Xikwembu xa Israele: ‘Vonani, ndzi ta tisela muti lowu ni miti hinkwayo ya lomu makhombo hinkwawo lawa ndzi ma vuleke ehenhla ka yona, hikuva va nonon'hwisile tinhamu ta vona, va nga ti tshuka va yingisa rito ra mina.’ ”