Read Xitsonga Jeremiah 3 Bible Online

Jeremiah 3 - Xitsonga bible

Jeremiah 3

¹Va te: “Kungakuloko wanuna, a tshika nsati wa yena, kutani nsati yeloyi a suka eka yena, a ya tekiwa hi nuna un'wana, xana nuna wa yena a nga tlhela a n'wi teka xana? Tiko leri ri nga ka ri nga nyamisiwi hi ku endla sweswo-ke? Loko u ri wena, u tinyiketile vuoswi ni swigangu leswo tala xana u ta tlhelela eka mina-ke?” ku vula Yehovha.

²“Tlakusa mahlo ya wena eswitsungeni, u languta; xana hi kwihi laha u nga etleriwangiki kona xana? U tshamele swona etindleleni tanihi Muarabu la nga emananga kambe u nyamisile misava hi vuoswi bya wena ni ku biha ka wena.

³Hikwalaho mpfula yi nga siveriwa, ni mpfula ya hlovo a yi vanga kona; kambe mombo wa wena i wa muoswi, a ku khomiwi hi tingana.

⁴Ni sweswi, wa ha vitana eka mina, u ku: ‘Tatana, u nakulorhi wa vuntshwa bya mina!

⁵Xana u ta va ni mbitsi hilaha ku nga heriki? Xana u ta hlunama hilaha ku nga heriki-ke?’ Languta, u vule sweswo, kasi u tirha leswo biha u ri karhi u swi hetisa.”

⁶Emikarhini ya Hosi Yosiya, Yehovha a ku eka mina: “Xana u vonile lexi Israele muhundzuki a xi endleke? U fambile etintshaveni hinkwato leti tlakukeke, ni le hansi ka mirhi hinkwayo leyi nga ni matluka, a ri karhi a oswana kona.

⁷A ndzi ku: ‘Kutakuloko a endlile sweswo hinkwaswo, u ta tlhela a vuya eka mina,’ kambe a nga vuyanga; kutani Yuda, makwavo la nga tshembekangiki, u tshama a swi vona.

⁸Hambi ndzi tshikile Israele muhundzuki, hikwalaho ka mikhuva ya yena hinkwayo ya vuoswi, kutani ndzi n'wi nyikile papila ra ku n'wi tshika, hambiloko swi ri tano Yuda, makwavo la nga tshembekangiki, a nga chavanga; na yena a famba, a ya oswa.

⁹Hi vuoswi lebyi twakaleke bya yena, Israele u nyamisile misava. Kambe u oswanile ni ribye ni murhi.

¹⁰Hambiswiritano, Yuda, makwavo la nga tshembekangiki, a nga ha vuyanga eka mina hi mbilu hinkwayo kambe byi va hi vunwa, ku vula Yehovha.”

¹¹Yehovha a ku eka mina: “Israele muhundzuki yena u lulamile ku hundza la nga tshembekangiki.

¹²Yana, u ya vulavula marito lawa tlhelo ra n'walungu, u ku: ‘Tlhela, Israele muhundzuki, ku vula Yehovha, ndzi nga ka ndzi nga ku khwanyaleri mombo, hikuva mina ndzi ni musa, ku vula Yehovha, ndzi nga ka ndzi nga dyisi mbitsi hi masiku.

¹³Ntsena u fanele ku tivula ku biha ka wena, hikuva u tshikile Yehovha, Xikwembu xa wena, kambe u ri karhi u tsutsumela matlhelo hinkwawo eka swikwembu swa vamatiko, ehansi ka mirhi hinkwayo leyi nga ni matluka, kutani a mi yingisanga rito ra mina, ku vula Yehovha.

¹⁴“ ‘Tlhelani, n'wina vana lava hambukeke, ku vula Yehovha. A ku: Hi mina n'wini wa n'wina. Ndzi ta teka un'wana wa n'wina emutini wun'wana; vambirhi, ndzi va teka erixakeni rin'wana; kutani ndzi mi tlherisela eSiyoni.

¹⁵Ndzi ta mi nyika varisi lava tsakisaka mbilu ya mina, va ta mi risa hi ku tiva ni ku anakanya.

¹⁶“ ‘Kutakuloko mi andzile, mi tatile tiko, emikarhini yoleyo, ku vula Yehovha, a va nga ha vuli: “Areka ya ntwanano wa Yehovha.” Hikuva a yi nga ha tsundzukiwi, yi nga ka yi nga ha naveriwi. Kambe ku nga ka ku nga ha endliwi yin'wana.

¹⁷Emikarhini yoleyo va ta vula leswaku Yerusalema, i xiluvelo xa Yehovha; matiko hinkwawo ma ta hlengeletana eYerusalema, hi vito ra Yehovha, kutani a va nga ha rhambi hi ku nonon'hwa ka timbilu ta vona.

¹⁸“ ‘Emikarhini yoleyo, yindlu ya Yuda yi ta famba ni yindlu ya Israele va ta huma swin'we etikweni ra n'walungu, ku ya etikweni leri ndzi ri fumiseke vatata wa n'wina.

¹⁹Mina a ndzi ku: Ndzi nga ku vekisa ku yini exikarhi ka vana va mina? Kambe ndzi nga ku nyikisa ku yini tiko leri rhandzekaka, rifuwo lero saseka ra tinyimpi ta matiko xana? Kambe a ndzi ku: Mi ta ndzi vula “tatana,” mi nga ka mi nga ha ndzi tshiki.

²⁰Kambe kukotisa wansati la dyelelaka nakulobye hi ririmi, mi ndzi dyelele hi mukhuva wolowo, n'wina va yindlu ya Israele, ku vula Yehovha.’ ”

²¹Rito ri twakala etintshaveni leti tlakukeke, i ra swirilo ni mikhongelo ya vana va Israele, hikuva va hombolokisile tindlela ta vona, va rivele Yehovha, Xikwembu xa vona.

²²“Tlhelani, n'wina vana lava hambukeke, kutani ndzi ta horisa ku hambuka ka n'wina.” “Languta, ha ta eka wena hikuva u Yehovha, Xikwembu xa hina.

²³Kunene pongo leri humaka eswitsungeni ni le tintshaveni a ri pfuni nchumu, kambe ku hlayiseka ka Israele ku huma eka Yehovha, Xikwembu xa yena.

²⁴Tingana ti dyile nyuku wa vatata wa hina ku sungula evuntshweni bya hina, tinyimpfu ta vona ni tihomu ta vona, ni vana va vona va xinuna ni va xisati.

²⁵Hi funengerile tingana ta hina, hi ambarile xisandzu xa hina; hikuva hi dyohele Yehovha, Xikwembu xa hina, hina ni vatata wa hina, ku sungula evuntshweni bya hina ku fika siku leri, kambe a hi yingisanga rito ra Yehovha, Xikwembu xa hina.”