Read Xitsonga Jeremiah 32 Bible Online

Jeremiah 32 - Xitsonga bible

Jeremiah 32

¹Hi rona rito leri nga ta eka Yeremiya, ri huma eka Yehovha, hi lembe ra khume ra Sedekiyasi, hosi ya Yuda ri nga lembe ra 18 ra Nebukadnetsara.

²Mavandla ya hosi ya Babilona a ma sivelela Yerusalema, kutani muprofeta Yeremiya a pfaleriwile exivaveni xa khotso, endlwini ya hosi ya Yuda, laha Sedekiyasi, hosi ya Yuda, yi n'wi pfaleleke kona,

³yi ku eka yena: “U profetela yini loko u ku: ‘Ku vula Yehovha: Vona ndzi ta nyiketa muti lowo emavokweni ya hosi ya Babilona, a ta nghena eka wona.

⁴Kutani Sedekiyasi, hosi ya Yuda a nga ka a nga phonyoki emavokweni ya Vakalediya, kambe u ta nyiketiwa emavokweni ya hosi ya Babilona; a ta vulavula enon'wini wa yena, ni mahlo ya yena ma ta vona mahlo ya loyi.

⁵Kutani u ta teka Sedekiyasi, a n'wi yisa eBabilona a ya tshama kona, ndzi kondza ndzi n'wi endzela, ku vula Yehovha; loko mi lwa ni Vakalediya, a mi nga pfuni nchumu.’ ”

⁶Yeremiya a ku: “Rito ra Yehovha, ri tile eka mina, ri ku:

⁷Vona Hanamele, n'wana Xalumi, makwavo wa tatana, u ta ta eka wena, a ku: ‘Ti xavele nsimu ya mina eAnatoto hikuva hi wena la faneleke ku yi kutsula u xava.’

⁸“Kutani Hanamele, n'wana tatana lontsongo, a ta eka mina exivaveni xa khotso, hilaha Yehovha a vuleke hakona, a ku eka mina: ‘A ku ndzi xaveri nsimu ya mina, leyi nga eAnatoto, etikweni ra ka Benjamini, hikuva mfanelo ya ku hlayisa i ya wena, ni yo kutsula i ya wena; u tixavela yona.’ Kutani ndzi tiva leswaku i rito ra Yehovha.

⁹Kavaloko ndzi tixavela nsimu ya Hanamele, n'wana wa tatana lontsongo eAnatoto, ndzi n'wi pimela mali ti nga tixikele ta silivhere ta 17.

¹⁰Ndzi tsala tsalwa ra nxavo, ndzi ri tiyisa, ndzi teka timbhoni ndzi ringanisa mali exikalweni.

¹¹“Ndzi va ndzi teka tsalwa ra nxavo leri tiyisiweke hi mukhuva wa kona ni nawu, ndzi teka na rona tsalwa leri nga tiyisiwangiki;

¹²ndzi nyika tsalwa ra nxavo eka Baruku, n'wana Neriya, n'wana Mahaseya, emahlweni ka Hanamele, n'wana wa tatana lontsongo, ni le mahlweni ka timbhoni leti tiyiseke tsalwa ra nxavo, ni le mahlweni ka Vayuda, hinkwavo lava nga tshama erivaleni ra khotso:

¹³Kutani ndzi byela Baruku emahlweni ka vona, ndzi ku:

¹⁴“ ‘Ku vula Yehovha wa mavandla, Xikwembu xa Israele: Teka matsalwa lawa, tsalwa leri ra nxavo leri tiyisiweke, ni tsalwa lerin'wana u ma veka embiteni ya vumba, ma ta hlayiseka masiku yo tala.

¹⁵Hikuva ku vula Yehovha wa mavandla, Xikwembu xa Israele: Ka ha ta xaviwa tindlu, ni masimu, ni tivhinya etikweni leri.’

¹⁶“Kuteloko ndzi nyikile Baruku, n'wana Neriya, tsalwa ra nxavo, ndzi khongela Yehovha, ndzi ku:

¹⁷“ ‘Oho! Hosi Yehovha, vona, hi wena la endleke matilo ni misava hi matimba ya wena lamakulu, ni voko ra wena leri tshambulukeke; a ku na nchumu lowu ku tsandzaka.

¹⁸U endlile hi tintswalo ku yisa etinxakeni ta madzana, u vuyisile ku homboloka ka vatatana exifuveni xa vana va vona endzhaku ka vona; hi wena Xikwembu lexikulu, xa matimba, lexi vito ra xona a nga Yehovha wa mavandla.

¹⁹U nkulukumba emakungwini, u ni matimba eku endleni; mahlo ya wena ma languta mikhuva hinkwayo ya vana va vanhu ku tlherisela eka un'wana ni un'wana hi mikhuva ya yena, mihandzu ya ku endla ka yena.

²⁰“ ‘Hi wena la endleke swikombiso ni mahlori etikweni ra Egipta, ni le henhla ka Israele, ni le xikarhi ka vanhu, ku fikela siku leri, u tiendlele vito leri nga kona ni namuntlha.

²¹U humesile tiko ra wena ra Israele etikweni ra Egipta, hi swikombiso ni mahlori ni xandla xa matimba, ni voko le ri tshambulukeke, ni ku chavisa lokukulu.

²²U va nyikile tiko leri, leri u nga hlambanyela vatata wa vona leswaku u ta va nyika rona, ri nga tiko ro pfelela ntswamba ni vulombe.

²³Va vuya va ta ri fuma; kambe a va yingisangi rito ra wena, a va fambanga hi milawu ya wena, a va endlanga swilo hinkwaswo leswi u va leriseke swona, leswaku va swi endla; hilaha u va humeseleke makhombo lawa hinkwawo!

²⁴Vonani, nhulu yi fike emahlweni ka muti ku nghena eka wona, kutani muti wu ta nyiketiwa emavokweni ya Vakalediya va wu lwisa, wu hlupha hi matlhari ni ndlala ni ntungu; lexi u xi vuleke xi fikile, wa xi vona.

²⁵Hambiswiritano, Hosi Yehovha u te eka mina: “U tixavela nsimu yoleyo hi mali, u teka timbhoni,” kasi muti wu nyikiwe emavokweni ya Vakalediya!’ ”

²⁶Rito ra Yehovha ri ta eka Yeremiya, ri ku:

²⁷“Vona, hi mina Yehovha, Xikwembu xa nyama hinkwayo; xana swi kona leswi nga ndzi tsandzaka-ke?

²⁸Hikwalaho, ku vula Yehovha: Vona, ndzi ta nyiketa muti lowu, emavokweni ya Vakalediya, ni le mavokweni ya Nebukadnetsara, hosi ya Babilona, va ta nghena eka wona.

²⁹Vakalediya va ta lwa ni muti lowo, va ta nghena, va hisa muti lowo hi ndzilo va hisa ni tindlu leti va hiselaka Baali mirhi ya risuna ehenhla ka tona, va humesele swikwembu swin'wana swakunwa, va va va ndzi pfuka.

³⁰“Hikuva vana va Israele ni vana va Yuda va endlile leswo biha emahlweni ka mina ka ha ri evuntshweni bya vona; hikuva vana va Israele va ndzi pfukile ntsena hi ku endla ka mavoko ya vona, ku vula Yehovha.

³¹Hikuva muti lowu wu humesile tihanyi ni ku kariha ka mina, ku suka enkarhini lowu va wu akeke, ku fikela siku leri, leswaku ndzi wu susa emahlweni ka mina,

³²hikwalaho ka ku biha hinkwako loku vana va Israele ni vana va Yuda va ku endleke loko va ndzi pfukile va ri vona, ni tihosi ta vona, ni vakulukumba va vona, ni vaprista va vona, ni vaprofeta va vona, ni vanhu va Yuda, ni vaaki va Yerusalema.

³³Va ndzi fularhele va nga ndzi langutanga, kasi mina ndzi va dyondzisa, ndzi pfuka nimpundzu ku va dyondzisa, kambe a va yingisanga leswaku va amukela ku tshinyiwa.

³⁴Kambe va vekile manyala ya vona endlwini leyi vito ra mina ri vuriwaka ehenhla ka yona va yi nyamisa.

³⁵Va akele Baali swivandla leswi tlakukeke eriweni ra n'wana Hinomu, va ta hisela Moloko vana va vona va xinuna ni va xisati, swi nga leswi ndzi nga va byelangiki swona, kambe a swi humangi embilwini ya mina leswaku va endla manyala layo tano ku dyohisa Yuda.

³⁶“Hikwalaho Yehovha, Xikwembu xa Israele u vurile ehenhla ka muti lowo, lowu n'wina mi nge wu ta nyiketiwa emavokweni ya hosi ya Babilona, wu hluriwa hi matlhari, ni ndlala, ni ntungu.

³⁷Vonani, ndzi ta va hlengeleta ematikweni hinkwawo laha ndzi va hangalaseke kona hi vukari bya mina, ni ku leva ka mina ni ku tsuva lokukulu, ndzi ta va vuyisela exivandleni lexi, ndzi va akisa hi ku titsakela.

³⁸Ri ta va tiko ra mina, mina ndzi va Xikwembu xa vona.

³⁹Ndzi ta va nyika mbilu yin'we, ni ndlela yin'we ya ku ndzi chava hi masiku, va ta kateka vona, ni vana va vona endzhaku ka vona.

⁴⁰Ndzi ta endla ntwanano lowu nga heriki na vona, leswaku ndzi nga ka ndzi nga va fularheli, ndzi ta va endla swinene, ndzi veka xichavo xa mina etimbilwini ta vona, va nga ha ndzi fularheli.

⁴¹Ndzi ta titsakela ku va endla swinene, ndzi va simeka etikweni leri hi kunene, hi mbilu ya mina hinkwayo, ni moya wa mina hinkwawo.

⁴²“Hikuva, ku vula Yehovha: Kukotisa loko ndzi tisele ku biha lokukulu hinkwako ehenhla ka tiko leri, na swona, ndzi ta tisa eka vona vunene hinkwabyo lebyi ndzi byi vuleke eka vona.

⁴³Ka ha ta xaviwa masimu etikweni leri, leri n'wina mi nge, i rhumbi leri nga riki na vanhu, hambi swi ri swifuwo; ri nyikiwile emavokweni ya Vakalediya.

⁴⁴Masimu ma ta xaviwa hi mali, va ta tsala matsalwa ya nxavo, va ma tiyisa, va teka timbhoni, etikweni ra Benjamini ni le matlhelweni ya Yerusalema, ni le mitini ya Yuda, ni le mitini ya le ntshaveni, ni le mitini ya le rivaleni, ni le mitini ya tlhelo ra n'walungu; hikuva ndzi ta vuyisela lava khomiweke va vona, ku vula Yehovha.”