Read Xitsonga Jeremiah 33 Bible Online

Jeremiah 33 - Xitsonga bible

Jeremiah 33

¹Rito ra Yehovha ri tlhela ri ta eka Yeremiya loko a ha pfaleriwile exivaveni xa khotso, ri ku:

²“Ku vula Yehovha la nga ta endla swoleswo, Yehovha la swi lunghisaka leswaku a swi tirha, loyi Yehovha ri nga vito ra yena.

³Vitana eka mina, ndzi ta ku hlamula, ndzi ku komba leswikulu, leswi fihliweke, leswi u nga swi tiviki.

⁴“Hikuva ku vula Yehovha, Xikwembu xa Israele, hikwalaho ka tindlu ta muti ni hikwalaho ka tindlu ta hosi ya Yuda, ti ta hahluriwa hi tinhulu ni matlhari.

⁵Va ta nghena eka tona; ku lwa ni Vakalediya, kambe ti ta tala mitsumbu ya vanhu lava ndzi nga ta va ba eku kariheni ka mina, ni ku leva ka mina, lava ndzi fihleleke muti lowo mombo wa mina hikwalaho ka vumbabva bya vona.

⁶Vona, ndzi ta wu bohelela ndzi wu wongola, ndzi va horisa, ndzi va nyika ndzalo ya ku rhula, ni yo tsaka;

⁷ndzi vuyisa va Yuda lava khomiweke, ni va Israele lava khomiweke, ndzi tlhela ndzi va akisa kukotisa emikarhini ya khale.

⁸Ndzi ta va basisa eku hombolokeni hinkwako ka vona loku va ndzi dyoheleke hakona, ndzi va tshikela swidyoho hinkwaswo leswi va ndzi dyoheleke ha swona, leswi va nga ndzi pfukela ha swona.

⁹Muti lowu eka mina, wu ta va vito ro tsaka, ni tinsimu, ni ku kwetsima emahlweni ka matiko hinkwawo ya misava, lama nga ta twa vunene hinkwabyo lebyi ndzi nga ta va endlela byona; va ta chava, va rhurhumela hikwalaho ka vunene hinkwabyo ni ku tsaka hinkwako leswi ndzi nga ta va endlela swona.

¹⁰“Hikuva, ku vula Yehovha: Loko xi ri xivandla lexi n'wina mi nge xi onhiwile, a ku na munhu, hambi swi ri swifuwo, hambi wu ri muti wa Yuda, ni mitsendzele ya Yerusalema, leyi onhiweke, laha ku nga riki na munhu kona, hambi a ri muaki, hambi yi ri homu;

¹¹ku ta yingisiwa kona rito ro tsaka, ni rito ra mitsako, ni rito ra muteki, ni rito ra mutekiwa, ni rito ra lava nge: Khensani Yehovha wa mavandla, hikuva Yehovha hi lonene, hikuva tintswalo ta yena hi leti nga heriki! ‘Ku ri loko va neha ku khensa ka vona endlwini ya Yehovha.’ Hikuva ndzi ta vuyisela lava khomiweke va le tikweni leri, va ta kotisa emikarhini yo rhanga, ku vula Yehovha.

¹²“Ku vula Yehovha: Exivandleni lexi xa mananga lexi nga riki na munhu, hambi yi ri homu, ni le mitini ya kona hinkwayo ku ta va ni madyelo ya varisi lava vundzisaka mitlhambi ya vona.

¹³Emitini ya le ntshaveni, ni le mitini ya mananga, ni le mitini ya tlhelo ra dzonga, ni le tikweni ra Benjamini, ni le matlhelweni ya Yerusalema, ni le mitini ya Yuda, ka ha ta hundza mitlhambi ehansi ka voko ra loyi a yi hlayaka, ku vula Yehovha.

¹⁴“Vona, ku vula Yehovha, ma ta masiku lawa ndzi nga ta hetisa rito ra vunene leri ndzi ri vuleke hikwalaho ka yindlu ya Israele, ni hikwalaho ka yindlu ya Yuda.

¹⁵Emasikwini walawo, ni le mikarhini yoleyo ndzi ta humesela Davhida hluke ra ku lulama, ri ta endla ku avanyisa ni ku lulama ematikweni.

¹⁶Hi masiku walawo, Yuda u ta pona, na Yerusalema, a tiakela hi ku tsaka, kutani hi rona vito leri va nga ta n'wi vula ha rona: ‘Yehovha ku lulama ka hina!’

¹⁷Hikuva ku vula Yehovha: Davhida a nga ka a nga pfumali munhu loyi a tshamaka exiluvelweni xa yindlu ya Israele;

¹⁸ni vaprista, va nga Valevhi, va nga ka va nga pfumali munhu emahlweni ka mina la nga ta humesa tiholokosta, ni ku hisa mirhi ya risuna ni tinyiko, ni ku humesa magandzelo hi masiku.”

¹⁹Rito ra Yehovha ri ta eka Yeremiya, ri ku:

²⁰“Ku vula Yehovha: Loko mi swi kota ku herisa ntwanano wa mina ninhlekanhi, ni ntwanano wa mina nivusiku, leswaku ku nga tshami ku va ni nhlekanhi ni vusiku enkarhini wa kona;

²¹na wona ntwanano wa mina na Davhida, nandza wa mina, wu nga hela, leswaku a nga tshuki a va ni n'wana la fumaka exiluvelweni xa yena; hi sweswo ni ntwanano wa mina ni Valevhi, va nga vaprista lava ndzi tirhelaka.

²²Kukotisa mavandla ya le matilweni lama nga hlayiwiki, ni sava ra lwandle leri nga ringanisiwiki; ndzi ta andzisa vatukulu va Davhida, nandza wa mina sweswo, ni Valevhi lava ndzi tirhelaka.”

²³Rito ra Yehovha ri ta eka Yeremiya, ri ku:

²⁴“Xana a ku voni lexi tiko leri ri xi vulavulaka, loko va ku: ‘Tinxaka timbirhi leti Yehovha a nga ti hlawula u tlhele a ti tshika’? Va sandza tiko ra mina swonghasi, leswaku emahlweni ka vona, a ra ha ri tiko.”

²⁵“Ku vula Yehovha: Loko ndzi nga endlanga ntwanano ni nhlekanhi ni vusiku, loko ndzi nga tiyisangi milawu ya le tilweni, ni swa le misaveni,

²⁶na kona ndzi ta tshika vatukulu va Yakobo ni va Davhida, nandza wa mina ndzi nga ha tshuki ndzi teka evaneni va yena la nga ta fuma vatukulu va Abrahama, ni va Israele, ni va Yakobo; hikuva ndzi ta vuyisa vakhomiwa va vona, ndzi va tsetselela.”