Read Xitsonga Jeremiah 36 Bible Online

Jeremiah 36 - Xitsonga bible

Jeremiah 36

¹Hi lembe ra vumune ra Yoyakimi, n'wana Yosiya, hosi ya Yuda, rito leri ri huma eka Yehovha ri ta eka Yeremiya, ri ku:

²“U titekela buku u ta tsala eka yona marito hinkwawo lawa ndzi tshamaka ndzi ku byela wona hikwalaho ka Israele ni hikwalaho ka Yuda, ni hikwalaho ka tiko hinkwaro, ka ha ri mpfhuka ndzi vulavula na wena, enkarhini wa Yosiya, ku fika siku leri.

³Kumbe va yindlu ya Yuda va ta yingisa ku biha hinkwako loku ndzi ku anakanyeke ku va endlela kona, leswaku va ta hundzuka un'wana ni un'wana emikhuveni ya yena leyo biha, ndzi ta va tshikela ku homboloka ka vona ni swidyoho swa vona.”

⁴Kutani Yeremiya a vita Baruku, n'wana Neriya, kutani Baruku a tsala ebukwini, hi nomu wa Yeremiya marito hinkwawo lawa Yehovha a nga n'wi byela wona.

⁵Yeremiya a lerisa Baruku, a ku: “Mina ndza bohiwa, ndza tsandzeka ku ya endlwini ya Yehovha.

⁶A ku ye wena u hlaya buku leyi u yi tsaleke hi nomu wa mina, ma nga marito ya Yehovha u ma hlaya etindleveni ta tiko endlwini ya Yehovha, siku ra ku titsona swakudya, u hlaya etindleveni ta va Yuda hinkwavo lava humeke emitini ya vona.

⁷Kumbe va ta veka xikhongelo xa vona emahlweni ka Yehovha, va hundzuka un'wana ni un'wana emikhuveni ya yena leyo biha, hikuva ku kariha ku kurile, na kona ku leva kukulu loku Yehovha a ku vuleke ehenhla ka tiko leri.”

⁸Baruku n'wana Neriya, a endla hinkwaswo hilaha muprofeta Yeremiya a n'wi byeleke hakona, a hlaya marito ya Yehovha ebukwini leyi endlwini ya Yehovha.

⁹Hi lembe ra vuntlhanu ra Yoyakimi, n'wana Yosiya, hosi ya Yuda, hi n'hweti ya ntlhanu na mune, ku vuriwa siku ro titsona swakudya emahlweni ka Yehovha eka tiko hinkwaro ra Yerusalema, ni tiko hinkwaro leri humaka emitini ya Yuda va te eYerusalema.

¹⁰Kutani Baruku a hlaya marito ya Yeremiya ebukwini, endlwini ya Yehovha, ekamareni ya Gemariya, n'wana Xafani, mutsari, ehubyeni ya le henhla, enyangweni leyintshwa ya yindlu ya Yehovha etindleveni ta tiko hinkwaro.

¹¹Kuteloko Mikaya, n'wana Gemariya, n'wana Xafani, a twa marito hinkwawo ya Yehovha hi buku leyi;

¹²a xikela endlwini ya hosi, ekamareni ya mutsari, kutani a vona vakulukumba va tshamile kona hinkwavo, a ri Elixama, mutsari, na Delaya n'wana Xemaya, na Elinatani n'wana Akibora, na Gemariya n'wana Xafani, na Sedekiyasi n'wana Hananiya ni vakulukumba hinkwavo.

¹³Mikaya a va tivisa marito hinkwawo lawa a ma tweke loko Baruku a ma hlaya ebukwini etindleveni ta tiko.

¹⁴Vakulukumba hinkwavo va rhuma Yehudi, n'wana Netaniya, n'wana Xelemiya, n'wana Kuxi, eka Baruku, va ku eka yena: “Teka buku leyi u yi hlayeke emahlweni ka tiko u ta haleno.” Kutani Baruku, n'wana Neriya, a teka buku evokweni ra yena, a ya eka vona.

¹⁵Va ku eka yena: “Tshamisa-ke u hlaya etindleveni ta hina,” kutani Baruku a hlaya etindleveni ta vona.

¹⁶Kuteloko va twa marito walawo hinkwawo, va tshuka, va langutana, va ku eka Baruku: “Hi ta byela hosi marito walawo hinkwawo.”

¹⁷Va engeta va vutisa Baruku, va ku: “Hi fanisele-ke hilaha u tsaleke marito lawa hinkwawo ma huma enon'wini wa yena.”

¹⁸Baruku a va hlamula a ku: “U ndzi byerile marito lawa hinkwawo hi nomu wa yena, mina ndzi ma tsala ebukwini hi inki.”

¹⁹Kutani vakulukumba va ku eka Baruku: “Famba u ya tumbela, wena, na Yeremiya, mi nga tiviwi hi munhu laha mi nga kona.”

²⁰Kutani va ya eka hosi ehubyeni, va ya veka buku ekamareni ya Elixama mutsari, va byela hosi timhaka toleto hinkwato.

²¹Kutani hosi yi rhuma Yehudi ku ya teka buku, a yi teka ekamareni ya Elixama, mutsari, kutani Yehudi a yi hlaya etindleveni ta hosi, ni le tindleveni ta vakulukumba, va yimile emahlweni ka hosi.

²²Hosi a yi tshamile endlwini ya vuxika, yi ri n'hweti ya ntlhanu na mune, kambe makala a ma ri kona ma vuvumela exitikweni, emahlweni ka yena.

²³Kuteloko Yehudi a hlayile papila ra vunharhu, kumbe ra vumune, hosi yi xeka buku hi mukwana yi yi cukumeta endzilweni, emakaleni ya xitiko, buku hinkwayo yi ko yi tshwa.

²⁴Kutani hosi ni malandza ya yena hinkwawo a va tshukanga, a va handzulangi tinguvu ta vona loko va twa marito walawo hinkwawo.

²⁵Kambe Elinatani, na Delaya, na Gemariya va khongerile hosi leswaku a nga hisi buku, kambe a nga va yingisanga.

²⁶Kutani hosi yi byela Yerahamiele, n'wana wa hosi, na Seraya n'wana Aziriele, na Xelemiya n'wana Abideli, leswaku va khoma Baruku, mutsari, ni muprofeta Yeremiya; kambe Yehovha a va fihla.

²⁷Kutani rito ra Yehovha ri ta eka Yeremiya, loko hosi yi hisile buku leyi nga ni marito lawa Baruku ingi a ma tsarile hi nomu wa Yeremiya, a ku:

²⁸“Tlhela u ya teka buku yin'wana, u tsala eka yona marito hinkwawo yo rhanga lawa ngi ma ri kona ebukwini yo rhanga, leyi hisiweke hi Yoyakimi, hosi ya Yuda.

²⁹Kutani hikwalaho ka Yoyakimi, hosi ya Yuda, u ta ku: ‘Ku vula Yehovha: U hisile buku, u ku: “Hi tsalele yini eka yona mhaka leyi nge, hosi ya Babilona yi ta ta yi onha tiko leri, yi ri pfumata vanhu, hambi swi ri swifuwo?”

³⁰Hikwalaho, ku vula Yehovha hikwalaho ka Yoyakimi, hosi ya Yuda: A nga ka a nga kumi n'wana la nga ta tshama exiluvelweni xa Davhida kutani ntsumbu wa yena, wu ta lahliwa ehandle, eku hiseni ka dyambu ni le xirhamini xa vusiku.

³¹Ndzi ta n'wi ba, yena, ni vatukulu va yena ni malandza ya yena, hikwalaho ka ku homboloka ka vona; ndzi va humesela ni vaaki va Yerusalema, ni va yindlu ya Yuda, ku biha hinkwako loku ndzi ku vuleke ehenhla ka vona, kambe a va ndzi yingisanga.’ ”

³²Kutani Yeremiya a teka buku yin'wana a yi nyika Baruku, n'wana Neriya, mutsari, a tsala eka yona hi nomu wa Yeremiya marito hinkwawo ya buku leyi Yoyakimi, hosi ya Yuda, ingi a yi hisile hi ndzilo; kambe va yi engetela hi marito yo tala kukotisa layo rhanga.