Read Xitsonga Jeremiah 38 Bible Online

Jeremiah 38 - Xitsonga bible

Jeremiah 38

¹Xefatiya n'wana Matani, na Gedaliya n'wana Paxahuru, na Yukala n'wana Xelemiya, na Paxahuru n'wana Malikiya, va twa marito lawa Yeremiya a nga byela tiko hinkwaro a ku:

²“Ku vula Yehovha: La salaka emutini lowo u ta fa hi matlhari, kumbe hi ndlala kumbe hi ntungu, kambe la humelaka eka Vakalediya u ta hanya, vutomi bya yena byi ta va ku phanga ka yena a tshama a hanya.

³Ku vula Yehovha: Muti lowu wu ta nyiketiwa kunene emandleni ya nyimpi ya hosi ya Babilona, yi ta wu nghena.”

⁴Kutani vakulukumba va ku eka hosi: “Munhu loyi a a dlayiwe, hikuva u lolohisa mavoko yi tinhenha leti seleke emutini lowo, ni mavoko ya tiko hinkwaro, hi ku va byela timhaka toleto; hikuva munhu loyi a nga laveri tiko leri ku lulama, kambe khombo.”

⁵Kutani hosi Sedekiyasi a ku: “Vonani, u le mandleni ya n'wina hikuva hosi a yi na matimba eka n'wina.”

⁶Kavaloko va khoma Yeremiya, va n'wi hoxa ekheleni ra Malikiya, n'wana wa hosi, leri ngi ri ri erivaleni ra yindlu ya khotso, va xikisa Yeremiya kona hi tinghole; a ku nga ri na mati ekheleni kambe a ku ri ni ndzhope, kutani Yeremiya a bodlhomela endzhopeni.

⁷Kutani Ebede-Meleke, Muetiyopiya, mulanguteri loyi ingi a ri endlwini ya hosi, a twa leswaku Yeremiya u hoxiwile ekheleni; kambe hosi a yi tshamile enyangweni ya Benjamini.

⁸Kutani Ebede-Meleke a huma endlwini ya hosi, a ya vulavula ni hosi, a ku:

⁹“Oho hosi mufumi wanga! Vanhu lavo va endlile swo biha, loko va endlele muprofeta Yeremiya sweswo va n'wi hoxile ekheleni, u ta fa hi ndlala laha a nga kona, hikuva a ku na vuswa emutini.”

¹⁰Kutani hosi yi byela Ebede-Meleke, Muetiyopiya, a ku: “Teka vanhu va makume manharhu kwala, u humesa muprofeta Yeremiya ekheleni a nga si fa.”

¹¹Kutani Ebede-Meleke a teka vanhu valavo, a ya endlwini ya hosi, ehansi ka kamara yo hlayisela xuma, a teka kona swihlakati ni tinguvu ta khale kutani a swi xikisela eka Yeremiya ekheleni hi mapindza.

¹²Kutani Ebede-Meleke, Muetiyopiya a byela Yeremiya, a ku: “Tana u veka swihlakati ehansi ka makatla ya wena, ehansi ka makindza,” Yeremiya a endlisa sweswo;

¹³kutani va koka Yeremiya hi mapindza, va n'wi humesa ekheleni, kutani Yeremiya a tshama erivaleni ra yindlu ya khotso.

¹⁴Kutani hosi Sedekiyasi a va rhuma ku ya vitana muprofeta Yeremiya, a n'wi vitela eka yena enyangweni ya vunharhu ya yindlu ya Yehovha, kutani hosi yi ku eka Yeremiya: “Ndza ha ku vutisa mhaka; u nga ndzi fihleli nchumu.” Yeremiya a ku eka Sedekiyasi:

¹⁵“Loko ndzi ku byela mhaka, a wu nga ndzi dlayi xana? Hambi ndzi ku byela mhaka, u ta ala ku ndzi yingisa xana?”

¹⁶Kutani hosi Sedekiyasi a hlambanyela Yeremiya exihundleni, a ku: “Ha Yehovha la hanyaka, la hi nyikeke vutomi, a ndzi nga ku dlayi, hambi ku ri ku ku nyiketa emandleni ya vanhu lava lavaka vutomi bya wena!”

¹⁷Kutani Yeremiya a byela Sedekiyasi, a ku: “Ku vula Yehovha, Xikwembu xa mavandla, Xikwembu xa Israele: Loko u huma sweswi u ya tinyiketa eka tindhuna ta hosi ya Babilona, moya wa wena wu ta hanya, ni muti lowo wu nga ka wu nga hisiwi hi ndzilo; u ta hanya, wena, ni yindlu ya wena.

¹⁸Kambe loko u nga humi u ya tinyiketa eka tindhuna ta hosi ya Babilona, muti lowo wu ta nyiketiwa emandleni ya Vakalediya va wu hisa hi ndzilo; na wena, u nga ka u nga poni emavokweni ya vona.”

¹⁹Hosi Sedekiyasi a byela Yeremiya, a ku: “Kambe ndzi chava Vayuda lava tinyiketeke eka Vakalediya, leswaku ndzi nyiketiwa emavokweni ya vona, va ta tlanga ha mina.”

²⁰Yeremiya a n'wi hlamula, a ku: “U nga ka u nga nyiketiwi, Kambe yingisela rito ra Yehovha leri ndzi ku byelaka rona: Swi ta saseka eka wena, kutani moya wa wena wu ta hanya;

²¹kambe loko u ala ku huma, hi rona rito lero Yehovha a nga ndzi byela rona:

²²Vona, vavasati hinkwavo lava seleke endlwini ya hosi ya Yuda va ta yisiwa eka tindhuna ta hosi ya Babilona, va ta ku: ‘U kanganyisiwile, u hluriwe hi lava va ku tshembiseke ku rhula; milenge ya wena loko yi bodlhomela endzhopeni, vona va tlhelela endzhaku!’

²³Vasati va wena hinkwavo, ni vana va wena va ta yisiwa eka Vakalediya, na wena u ta tsandzeka ku pona emavokweni ya vona, kambe u ta khomiwa hi voko ra hosi ya Babilona; kutani muti lowu, wu ta hisiwa hi ndzilo, hikwalaho ka wena.”

²⁴Sedekiyasi a ku eka Yeremiya: “Ku nga tshuki ku va na munhu la tivaka timhaka toleto, leswaku u nga ti fa.

²⁵Kutakuloko vakulukumba va twa leswaku ndzi vulavule na wena, va nga ta eka wena, va ku eka wena: ‘Wa nga hi tivisa leswi u swi byeleke hosi, u nga hi fihleli swona, hi nga ka hi nga ku dlayi; ni leswi hosi yi ku byeleke swona, u hi byela swona.’

²⁶U va hlamula, u ku: ‘Ndzi khongela hosi leswaku ndzi nga tlheriseriwi endlwini ya Yonatani, ndzi ya fela kona.’ ”

²⁷Vakulukumba hinkwavo va ta eka Yeremiya va n'wi vutisa, kutani a va byela timhaka toleto hinkwato, hilaha hosi yi nga vula hakona, kutani va miyela, va n'wi sukela, hikuva timhaka a ti tiviwanga hi munhu.

²⁸Kutani Yeremiya a tshama erivaleni ra yindlu ya khotso ku fikela siku leri Yerusalema, a ngheniwaka ha rona.