Read Xitsonga Jeremiah 39 Bible Online

Jeremiah 39 - Xitsonga bible

Jeremiah 39

¹Hi lembe ra ntlhanu na mune ra Sedekiyasi, hosi ya Yuda, hi n'hweti ya khume, Nebukadnetsara, hosi ya Babilona, a ta ni mavandla ya yena hinkwawo ku lwa na Yerusalema, va wu sivelela.

²Hi lembe ra khume na rin'we ra Sedekiyasi, hi n'hweti ya vumune, esikwini ra ntlhanu na mune ra n'hweti, rirhangu ri mbundzuxiwa.

³Tindhuna hinkwato ta hosi ya Babilona ti ta yima enyangweni ya le xikarhi, a nga Nergala-Sarezere na Samigara-Nebo, na Sari-Sekimi, ndhuna ya valanguteri, Nergala-Sarezere, ndhuna ya lavo tlhariha, ni tindhuna tin'wana hinkwato ta hosi ya Babilona.

⁴Kuteloko Sedekiyasi, hosi ya Yuda ni tinhenha hinkwato va va vona, va tsutsuma, va huma emutini ni vusiku hi gondzo ra ntanga wa hosi, hi nyangwa ya le xikarhi ka marhangu mambirhi, va huma hi ndlela ya rivala.

⁵Kambe nyimpi ya Vakalediya yi va landza, yi kuma Sedekiyasi emananga ya Yeriko. Va n'wi khoma, va n'wi tisa eka Nebukadnetsara, hosi ya Babilona eRibila, etikweni ra Hamata a avanyisiwa kona.

⁶Hosi ya Babilona yi dlaya vana va Sedekiyasi emahlweni ka yena eRibila; ni vakulukumba hinkwavo va Yuda, hosi ya Babilona yi va dlaya.

⁷A va a boxa mahlo ya Sedekiyasi, a n'wi boha hi tiketana ta koporo, a n'wi yisa eBabilona.

⁸Vakalediya va hisa hi ndzilo yindlu ya hosi, ni tindlu ta va tiko, va mbundzuxa ni rirhangu ra Yerusalema.

⁹Masalela ya tiko lama seleke emutini, ni vabaleki lava nga tinyiketa yena, ni lava seleke va tiko, Nebuzaradani, ndhuna ya valanguteri a va yisa eBabilona.

¹⁰Kambe loko swi ri swisiwana swa tiko, lava nga riki na nchumu, Nebuzaradani, ndhuna ya valanguteri, a va siya etikweni ra Yuda, a va nyika siku lero tivhinya ni masimu.

¹¹Nebukadnetsara, hosi ya Babilona, a a lerisile Nebuzaradani, ndhuna ya valanguteri, hikwalaho ka Yeremiya, a ku:

¹²“N'wi teke, u n'wi langutela, u nga n'wi endli nchumu lowo biha, kambe u n'wi endla hilaha a nga ta ku byela hakona.”

¹³Kutani Nebuzaradani, ndhuna ya valanguteri, na Nebuxazibani, ndhuna ya vatsheniwa, na Nergala-Sarezere, ndhuna ya tintlhari ni tindhuna hinkwato ta hosi ya Babilona

¹⁴va rhuma ku ya humesa Yeremiya erivaleni ra yindlu ya khotso, va n'wi veka emavokweni ya Gedaliya, n'wana Ahikama n'wana Xafani, a ta n'wi yisa endlwini ya yena, kutani Yeremiya a sala exikarhi ka vanhu va tiko.

¹⁵Rito ra Yehovha ri ta eka Yeremiya loko a ha ri erivaleni ra yindlu ya khotso, ri ku:

¹⁶“Famba u ya byela Ebede-Meleke, Muetiyopiya, u ku: ‘Ku vula Yehovha wa mavandla, Xikwembu xa Israele: Vona, ndzi endlakarisa marito ya mina ehenhla ka muti lowo hi ku biha, byi nga ri vunene, ma ta endlakala emahlweni ka wena siku ro karhi.

¹⁷Kambe ndzi ta ku lamulela esikwini rolero, ku vula Yehovha, u nga ka u nga nyiketiwi emavokweni ya vanhu volavo u va chavaka.

¹⁸Hikuva ndzi ta ku lamulela, u nga ka u nga wi hi fumu, kutani vutomi bya wena byi ta va ku phanga ka wena, hikuva u ndzi tshembile, ku vula Yehovha.’ ”