Read Xitsonga Jeremiah 41 Bible Online

Jeremiah 41 - Xitsonga bible

Jeremiah 41

¹Hi n'hweti ya ntlhanu na timbirhi, Iximaele, n'wana Netaniya, n'wana Elixama, wa rixaka ra tihosi, ni ndhuna ya hosi, a ta eka Gedaliya, n'wana Ahikama, eMispa, a ri ni vanhu va khume, va tshama eswakudyeni swin'we eMispa.

²Kutani Iximaele, n'wana Netaniya, ni vanhu va khume lava ngi a ri na vona, va yima, va tlhava Gedaliya, n'wana Ahikama, n'wana Xafani hi fumu, va n'wi dlaya, a ri loyi hosi ya Babilona yi n'wi vekeke ku risa tiko.

³Na vona Vayuda hinkwavo lava ngi va ri kona eka Gedaliya eMispa, ni Vakalediya lava ngi va ri kona, ti ri tinhenha, Iximaele a va dlaya.

⁴Hi siku ra vumbirhi, loko Gedaliya a file, swi nga tiviwi hi vanhu,

⁵ku fika vanhu va Xikeme, ni va Xilo, ni va Samariya va 80, va byewurile malebvu, ni swiambalo swa vona swi handzukile va va va titlhavele miri, va tamele tinyiko, ni maakha, va swi tisa endlwini ya Yehovha.

⁶Kutani Iximaele, n'wana Netaniya, a huma eMispa ku ya hlangana na vona a famba a ri karhi a rila; ekule loko a hlangana na vona, a va byela, a ku: “Tanani eka Gedaliya, n'wana Ahikama.”

⁷Kuteloko va fikile exikarhi ka muti, Iximaele, n'wana Netaniya, a va dlaya, a va hoxela ekheleni, a ri ni vanhu va yena.

⁸Kambe vanhu va khume a va ri kona eka vona, va byela Iximaele, va ku: “U nga tshuki u hi dlaya, hikuva hi ni laha hi fihleke kona timbuva enhoveni, yi ri koro, ni barley, ni mafurha, ni vulombe,” kutani a va tshika a nga va dlayi ni varikwavo.

⁹Khele rolero Iximaele a lahleke eka rona mitsumbu hinkwayo ya vanhu valavo a va dlayeke swin'we na Gedaliya, hi leri hosi Asa a ri endleke hi ku chava Baaxa, hosi ya ka Israele, hi rona khele leri Iximaele n'wana Netaniya a nga ri tata hi mitsumbu.

¹⁰Kutani Iximaele a famba ni lava seleke va tiko va le Mispa, ni vanhwanyana va hosi, ni va tiko lava ngi va sele eMispa, lava Nebuzaradani ndhuna ya valanguteri, ingi a va vekile eku tiyiseni ka Gedaliya, n'wana Ahikama; Iximaele, n'wana Netaniya a famba na vona va bohiwile, a suka kona, a kongoma tiko ra vana va Amoni.

¹¹Kambe Yohanani, n'wana Kariyaka, ni tindhuna hinkwato ta mavandla lawa ingi ma ri na yena va twa ku endla hinkwako loko biha loku Iximaele, n'wana Netaniya, a ku endleke.

¹²Kutani va teka vanhu va vona hinkwavo! Va hloma ku ya lwa na Iximaele, n'wana Netaniya, va n'wi kuma ematini lamakulu, ekusuhi na Gibiyoni.

¹³Kuteloko tiko hinkwaro leri ngi ri le ka Iximaele i vona Yohanani, n'wana Kariyaka, ni tindhuna hinkwato ta mavandla lawa ngi ma ri na yena, va tsaka,

¹⁴kutani tiko hinkwaro leri Iximaele ingi a ri khomile eMispa, va hundzukela, va ya eka Yohanani, n'wana Kariyaka.

¹⁵Kambe Iximaele, n'wana Netaniya a phonyoka eka Yohanani a ri ni vanhu va ntlhanu na vanharhu a ya eka vana va Amoni.

¹⁶Kutani Yohanani, n'wana Kariyaka, ni tindhuna ta mavandla hinkwawo lava ngi va ri na yena, va teka masalela hinkwawo ya tiko, lawa Iximaele n'wana Netaniya ingi a ma susile eMispa loko a a dlayile Gedaliya, n'wana Ahikama, va ri vavanuna va matimba eku lweni, ni vavasati, ni vana, ni vatsheniwa, va va tlherisela eGibiyoni.

¹⁷Kutani va famba va ya tshama endlwini ya vaendzi ya Kimihama ku langutana na Betlehema, va ta ya eEgipta, hi ku chava Vakalediya;

¹⁸a va va chava, hikuva Iximaele n'wana Netaniya, a dlayile Gedaliya, n'wana Ahikama, loyi hosi ya Babilona ingi yi n'wi vekile ku risa tiko.