Read Xitsonga Jeremiah 50 Bible Online

Jeremiah 50 - Xitsonga bible

Jeremiah 50

¹Hi rona rito ra Yehovha leri tshamaka ri byeriwa hikwalaho ka Babilona, ni tiko ra Vakalediya hi muprofeta Yeremiya.

²“Tivisani sweswo exikarhi ka matiko, mi ti twarisa, mi yimisa mujeko; va byeleni, mi nga fihli, mi ku: ‘Babilona u khomiwile, Bele u khomisiwe tingana, Merodaka u tshoviwile; swifaniso swa yena swi khomisiwile tingana, swikwembu swa yena swi tshoviwile.’

³Hikuva tiko leri humaka en'walungwini, ri humele eka rona ku endla tiko ra kona emananga, leswaku ku nga vi na muaki eka rona; hambi va ri vanhu ni tihomu, va chavile va sukile.

⁴Emikarhini yoleyo ni le nguveni yoleyo, ku vula Yehovha, vana va Israele va ta ta ni vana va Yuda, kutani va ta ya va ri karhi va rila, va lava Yehovha, Xikwembu xa vona.

⁵Va ta vutisa ndlela ya Siyoni, va langutisa mimombo ya vona kona: ‘Tanani, mi namarhela Yehovha hi ntwanano lowu nga heriki, lowu nga riki na ku rivariwa!’

⁶“Tiko ra mina a ri kotisa ntlhambi wa tinyimpfu leti lahlekeke, varisi va tona a va ti hambuxa, va ti fambisa etintshaveni ni le switsungeni, ti kondza ti rivala tshanga ra tona.

⁷Hinkwavo lava nga ti kuma va ti dya, lava ngi va ri valala eka tona a va ku: ‘A hi na nandzu, hikuva va dyohele Yehovha, vuako byo lulama, ni ku tshemba ka vatata wa vona, a nga Yehovha!’

⁸“Balekani eBabilona, ni le tikweni ra Vakalediya, mi va kukota swiphongo leswi rhangelaka ntlhambi emahlweni.

⁹Hikuva ndzi ta pfuxa, ndzi humesela Babilona nhlengeletano ya matiko lamakulu ya le misaveni ya n'walungu, kutani va ta n'wi phalalela; ku va kona a khomiwaka. Miseve ya vona yi kotisa ya tinhenha leto tlhariha, ti nga ka ti nga vuyi mahala.

¹⁰Kutani Kalediya u ta phangiwa, vaphangi va yena hinkwavo va ta xurha eka yena, ku vula Yehovha.

¹¹“Mi nga tsaka kunene, mi va mi tsakisisa, n'wina vaonhi va ndzhaka ya mina, mi tlula kukotisa thokazi erilambyaneni, mi rila kukota tihanci leta matimba.

¹²Mana wa n'wina va n'wi khomisile tingana ngopfungopfu; loyi a mi tswaleke u hundzukile mavala: vonani u le ndzhaku ka matiko; i mananga ni tiko ra ntlhava, ni tiko ra makwandzasi!

¹³Hikwalaho ka ku kariha loku hisaka ka Yehovha, a ku nga ha akiwi, kutani ma ta va mananga hinkwako; un'wana ni un'wana la nga ta hundza eBabilona u ta hlamala, a ba miloti hi makhombo hinkwawo ya yena.

¹⁴“Yimani emahlweni ka Babilona hi nyimpi, mi n'wi rhendzela, hi n'wina lava copaka hi vurha: copani, mi nga tsoneni miseve, hikuva u dyohele Yehovha!

¹⁵Phalalani hinkwako, mi n'wi rhendzela! U tlakuse mavoko ya yena; masungulo ya yena ma tsekatseka, rirhangu ra mbundzuka, hikuva ku rihisa ka Yehovha ku fikile; mi tirihisela eka yena, hilaha a nga mi endla hakona n'wi endleni sweswo.

¹⁶Mi herisa eBabilona varimi ni loyi a khomaka sikela enkarhini wa ku tshovela; emahlweni ka fumu leri onhaka, un'wana ni un'wana a a tlhelele etikweni ra rikwavo, un'wana ni un'wana a a tsutsumele etikweni ra yena.

¹⁷“Israele i nyimpfu leyi lahlekeke leyi hlongorisiweke hi tinghala; eku sunguleni, hosi ya Asiriya yi tshama yi n'wi dya; wa le ndzhaku, Nebukadnetsara, hosi ya Babilona, u n'wi tshovelele marhambu.

¹⁸Hikwalaho, ku vula Yehovha wa tinyimpi, Xikwembu xa Israele: Vonani, ndzi ya holovela hosi ya Babilona, ni tiko ra yena, hilaha ndzi holoveleke hosi ya Asiriya hakona.

¹⁹Ndzi ta tlherisela Israele evuakweni bya yena: u ta kuma vudyelo Karmele ni le Baxani, kutani moya wa yena wu ta xurha, ni le ntshaveni ya Efrayimi ni le Giliyadi.

²⁰Emikarhini yoleyo, ni le nguveni yeleyo, ku vula Yehovha, ku ta laviwa ku homboloka ka Israele, kambe a ku nga ha vi kona, ni swidyoho swa Yuda kutani a swi nga ha kumiwi, hikuva ndzi ta khomela lava ndzi va siyeke.

²¹“Tlhandlukela etikweni ra vatiarisi, u ri hlasela, ni vaaki va rona, u va holovela; u va tsutsumela hi fumu u va nyiketa ku herisiwa, ku vula Yehovha; kutani u endla hinkwaswo leswi ndzi nga ku lerisa swona.

²²Nkosi wa nyimpi wu kona etikweni ra ku dlayiwa lokukulu.

²³Yi dlayiwile, yi tshoviwile ha yini, nyundzu ya misava hinkwayo? Babilona u onhisiwile ku yini exikarhi ka matiko xana?

²⁴“Ndzi ku rhiyele ntlhamu, kutani u khomiwile, Babilona, u khomiwile u nga swi tivi, u phasiwile, hikuva u lwile na Yehovha.

²⁵Yehovha u pfurhile vuhlayiselo bya yena, u humesile kona matlhari ya ku kariha ka yena hikuva i Hosi, Yehovha wa tinyimpi la nga ni mhaka ni tiko ra Vakalediya.

²⁶Nghenani kona ematlhelweni hinkwawo, pfulani switlati swa yena, mi hlengeleta, mi kotisa nhulu ya tinyandza, mi n'wi nyiketa ndzhukano, mi nga n'wi siyeri nchumu.

²⁷Tlhavani tinkunzi hinkwato ta vona ti xikiseleni eku dlaweni. Ku ni khombo vona hikuva ku tile siku ra vona, nkarhi wo holoveriwa ka vona.

²⁸Rito ra lava balekeke ni ra lava poneke etikweni ra Babilona ri twakala eSiyoni, vanhu va kona va byeriwa ku rihisa ka Yehovha Xikwembu xa hina, ku tirihisela tempele ya yena.

²⁹“Vitanani Babilona, vuvutelani hinkwavo lava copaka hi vurha; mi n'wi rhendzela ku nga poni nchumu; mi tlherisela eka yena hi ku endla ka yena, hinkwaswo leswi a swi endleke, n'wi endleni sweswo, hikuva u tiarisile eka Yehovha, Mukwetsimi wa Israele.

³⁰Hikwalaho majaha ya yena ma ta wa emitsendzeleni, ni tinhenha hinkwato ta yena ti ta hetiwa siku rero, ku vula Yehovha.

³¹“Vona, ndzi ta eka wena, mutikukumuxi, ku vula Hosi, Yehovha wa tinyimpi, hikuva ri tile siku ra wena, nkarhi lowu ndzi ku holovelaka ha wona.

³²Mutikukumuxi wa dedeleka, u ta wa, kutani a ku na munhu la nga ta n'wi pfuxa; ndzi ta tshivela ndzilo emitini ya yena, wu ta herisa matlhelo ya yena hinkwawo.

³³Yehovha wa tinyimpi u te: Vana va Israele ni vana va Yuda va xanisiwa swin'we, kutani hinkwavo lava va yiseke evukhumbini va va tiyisela hi matimba, va ala ku va tshika va famba.

³⁴Kambe mukutsuri wa vona u ni matimba, Yehovha wa tinyimpi i vito ra yena. Kunene, u ta va avanyisela ku nyika tiko ku wisa, kutani a pfilunganya vaaki va Babilona.

³⁵“Fumu a ri ve ehenhla ka Vakalediya, ku vula Yehovha, ni le henhla ka vaaki va Babilona, ni le henhla ka tihosi ta yena, ni le henhla ka va vutlhari va yena.

³⁶Fumu a ri ve ehenhla ka lava vulavulaka mavunwa, leswaku va fana ni swihunguki! Fumu a ri ve ehenhla ka tinhenha, leswaku va ta va ni gome!

³⁷Fumu a ri ve ehenhla ka tihanci ta yena, ni le henhla ka tigolonyi ta yena, ni le henhla ka valuveri hinkwavo lava nga exikarhi ka yena, va ta hundzuka vavasati! Fumu a ri ve ehenhla ka xuma xa yena, leswaku xi ta tekiwa!

³⁸Dyandza a ri ve ehenhla ka mati ya yena; leswaku ma phya; hikuva i tiko ra swifaniso leswi vatliweke, kutani va huhela swikwembu swa vona.

³⁹Hikwalaho swiharhi swa mananga swi ta tshama kona ni timhungubye; tiyimbhu ti ta aka kona, kutani a ku nga ha akiwi hilaha ku nga heriki a ku nga ha vi na vanhu hilaha ku nga heriki.

⁴⁰Kukotisa enkarhini lowu Xikwembu xi khandlaka Sodoma na Gomora, ni matlhelo ya kona, ku vula Yehovha, hi mukhuva wolowo a ku nga aki munhu kona, hambi a ri n'wana wa munhu, ku tiakela kona.

⁴¹“Vonani, ri ta ta tiko leri humaka en'walungwini, kutani tiko lerikulu ni tihosi to tala ti ta huma emakun'wini ya misava.

⁴²Va tamele mavurha ni mafumu, va kariha, a va tsetseleli munhu; rito ra vona ri pfuma kukota lwandle va khandziyile tihanci, va humile nyimpi kukota munhu a ri un'we la taka ku lwa na wena n'wana wa Babilona.

⁴³Hosi ya Babilona yi yingisa mhaka ya vona, kutani mavoko ya yona ma hela matimba; khombo ri yi khomile, ni ku vava loku fanaka ni ka wansati loko a veleka.

⁴⁴“Vonani, kukota nghala loko yi huma eswihlahleni swa Yordani, u tlhandlukela evuakweni lebyo tiyisiwa; kambe ndzi ta n'wi hlongola kan'we; kutani loyi ndzi n'wi hlawuleke, ndzi ta n'wi lerisa byona; hikuva i mani la kotaka mina? I mani la nga ndzi vitelaka ehubyeni? I mani hosi leyi nga yimaka emahlweni ka mina?

⁴⁵“Hikwalaho, yingisani makungu ya Yehovha lawa a ma kaneleleke eBabilona, ni mianakanyo ya yena leyi a yi anakanyeleke tiko ra Kalediya: Kunene va ta va koka kukota leswitsanana swa ntlhambi, kunene u ta onha vuako bya vona swin'we na vona.

⁴⁶Siku va huwelelaka, va ku: Babilona u phangiwile! Tiko ra tsekatseka, rito ra mikosi ri twala ematikweni!”