Read Xitsonga Lamentations 4 Bible Online

Lamentations 4 - Xitsonga bible

Lamentations 4

¹Xana nsuku wu hundzukisile ku yini ntima? Nsuku lowu nga ringiwa endzilweni wu hundzukisile mavala hi yini? Maribye ya vukwetsimelo ma hangalasile ku yini Emitsendzeleni hinkwayo xana?

²Vana va Siyoni lavanene Va ringanisiwe ni nsuku lowu lulameke, Va hlayiwile ku yini kukota makhuwana ya vumba, Yi nga mitirho ya mavoko ya muvumbi.

³Swi tsandza ni timhisi ti humesa vele Ku an'wisa vana va tona; Kambe nhwanyana wa tiko ra mina yena wa nonon'hwa ngopfu, Kukota tiyimbhu ta mananga.

⁴Ririmi ra risana ri namarhele enon'wini wa rona, Hi ku omisiwa hi torha; Lavatsongo va kombela vuswa, Kambe ku hava loyi a va phamelaka.

⁵Lava ngi va dya swo nandziha Va fa hi ndlala emitsendzeleni; Lava ngi va phutseriwile hi xivunguvungu, Va sivamile ethyakeni.

⁶Ku biwa ka nhwanyana wa tiko ra mina Ingi kukulu ku tlula ka Sodoma, La nga wisiwa hi nkarhinyana, Ku nga ri na mavoko lama rhumeriweke kona.

⁷Vafumi va kona a va tengile ku fana ni gamboko, Va basile kukota ntswamba; Mimiri ya vona a yi tshwukile ku hundzisa korale, Tinghohe ta vona a ti fana ni ribye ra safiri.

⁸Tinghohe ta vona ti nyamile ku hundzisa ntima; A va ha tiviwi emitsendzeleni; Nhlonge ya vona yi namarhele emarhambyini ya vona, Yi omelele tanihi rikunyi.

⁹Ku katekile lava dlayiweke hi tlhari, Ku tlula lava nga dlayiwa hi ndlala; Vona va wile va hele matimba Hi ku pfumala leswi vekiwaka hi nsimu.

¹⁰Mavoko ya vavasati, hambi ma ri ya lavo olova Ma swekile vana va vona, Va vile swakudya swa vona Eku onhakeni ka nhwanyana wa tiko ra mina.

¹¹Yehovha u hetisile vukari bya yena; U halatile vukari lebyi pfurhaka bya yena. Kutani u tshiverile ndzilo eSiyoni, Lowu nga dya masungulo ya yena.

¹²Tihosi ta misava, ni vaaki hinkwavo va matiko, A va pfumelanga leswaku Nala ni mukanganyisi va ta va va nghena Hi tinyangwa ta Yerusalema.

¹³Swona swi humelele hikwalaho ka swidyoho swa vaprofeta va yena, Ni vukanganyisi bya vaprista va yena, Lava nga halata exikarhi ka wona Ngati ya lava lulameke.

¹⁴A va ri karhi va rhendzeleka tanihi vo fa mahlo emitsendzeleni, Va tinyamisile hi ngati; Kutani tinguvu ta vona; A ti nga ri na ku khumbiwa.

¹⁵“Sukani, n'wina mi tinyamiseke!” Ku huweleriwe sweswo eka vona; “Sukani, sukani! Mi nga tshuki mi khumba!” Kuteloko va balekile, a ku ri ku tsendzeleka; A va ku exikarhi ka matiko: “A vanga vuyeli va aka kona.”

¹⁶Mombo wa Yehovha wu hangalasile, Evukarini bya yena a nga tlheli a va languta. A va vanga na xichavo eka vaprista, A va tsetselelanga swidyuhati.

¹⁷Ni namuntlha mahlo ya hina ma hela Hi ku langutela ku pfuniwa ka hina ka hava; Eku languteleni ka hina, a hi langutela hi ku tshemba Eka tiko leri nga riki na ku hi ponisa.

¹⁸A va xiya ku famba ka hina Leswaku hi nga tshuki hi famba etimbaleni ta ka hina; Ku hela ka hina ku kusuhi; masiku ya hina ma herile; Hikuva sweswi, ku fikile ku hela ka hina.

¹⁹Vaxanisi va hina va ni matsamba Ku tlula magama ya le henhla; Va hi hlongorisa etintshaveni; Emananga va hi celela marindzi.

²⁰Loyi a nga va ku hefemula ka hina, a ri muhlawuriwa wa Yehovha, U phasiwile erindzini ra vona, A ri loyi, a hi ku: “Hi ta hanya endzhutini wa yena exikarhi ka matiko.”

²¹Tsaka, u tsakisisa, nhwanyana wa Edomu, La akeke etikweni ra Usi! Xinwelo xi ta fika ni le ka wena; Na wena u ta pyopya, u va u hluvula tinguvu.

²²Nandzu wa wena wu hetisiwile, nhwanyana wa Siyoni; A ku nga ha vi na loyi a ku yisaka evukhumbini. Ku ta lavisisiwa ku homboloka ka wena, nhwanyana wa Edomu, Yehovha u ta funungula swidyoho swa wena.