Read Xitsonga Ezekiel 16 Bible Online

Ezekiel 16 - Xitsonga bible

Ezekiel 16

¹Rito ra Yehovha ri humelela eka mina, ri ku:

²“N'wana wa munhu, tivisa Yerusalema, swidyoho swa yena! U ta ku: Ku vula Hosi Yehovha eka Yerusalema, a ku:

³Hi xivongo ni ku tswariwa ka wena u wa tiko ra Kanana; tata wa wena a a ri wa ka Amori; mana wa wena a a ri wa ka Hiti.

⁴Siku lero u nga tswariwa ha rona, nkava wa wena a wu nga tsemiwanga, a va ku hlantswanga hi mati ku ku basisa, a va ku totanga hi munyu, a va ku phutselanga engubyeni.

⁵A ku nga ri na munhu la, ku twelaka vusiwana ku ku pfuna, hambi hi xilo xin'we xa swilo leswiya, kambe hi siku ra ku tswariwa ka wena u cukumetiwile enhoveni hi lava ku nyenyeke.

⁶“A ndzi hundza ekusuhi na wena, ndzi ku vona u etlele engatini ya wena, ndzi ku: ‘Hanya engatini ya wena!’ Ndzi engeta ndzi ku: ‘Hanya engatini ya wena!’

⁷Ndzi ku andzisile hi madzana ni madzana kukotisa byanyi bya nhova, kutani u kula, u va u lehile, u sasekile ngopfu; mavele ya wena ma kula, u hundzuka wanhwana, kambe a wu ri ni vusweti u nga ambalanga nchumu.

⁸Ndzi hundza ekusuhi na wena, ndzi ku vona; nkarhi wa wena a wu fikile, nkarhi wa rirhandzu, kutani ndzi tshandzavuta nkumba wa mina ehenhla ka wena, ndzi funengeta vusweti bya wena, ndzi ku hlambanyela, ndzi endla ntwanano na wena, ku vula Hosi Yehovha, kutani u va wa mina.

⁹“Ndzi ku hlantswa ematini, ndzi susa ngati ya wena ehenhla ka wena, ndzi ku tota hi mafurha.

¹⁰Ndzi ku ambexa nguvu leyi lukiweke, ndzi ku ambexa ni tintanghu ta dzovo ra ntini, ndzi ku bohelela nguvu ya ntsembyana, ndzi ku funengeta hi nguvu ya ku saseka ngopfu.

¹¹Ndzi ku sasekisa hi swibombiso ni vusenga emavokweni, ndzi ku bohela ni sindza enhan'wini.

¹²Ndzi nghenisa xingwavila etinhompfini ta wena, ni swingwavila etindleveni, ni musingasoro lowo saseka, ndzi ku vehela enhlokweni.

¹³Hi mukhuva lowo u sasekisiwa hi nsuku ni silivhere, u funengela nguvu ya ntsembyana, ni tinguvu leto saseka ngopfu ni leto lukiwa. U xurha hi mapa lamanene ya koro, ni vulombe, ni mafurha, u va u saseka ngopfu, u fikela ni le vuhosini.

¹⁴U twarile ngopfu exikarhi ka matiko hi ku saseka ka wena, a ku vanga na xisandzu hikwalaho ka ku kwetsima ka mina loku ndzi ku funengete hakona, ku vula Hosi Yehovha.

¹⁵“Kambe u tshembile ku saseka ka wena, eku twaleni ka wena, u endlile vuoswi, u tinyiketile vaendzi hinkwavo lava nga swi rhandza.

¹⁶U tekile tinguvu ta wena, u ti rhunga swin'we ku tilunghisela tialitari ta ku gangisiwa kona. Swilo swo tano a swi nga si vonaka, kambe swi nga ka swi nga ha vonaki.

¹⁷U tekile swibombiso swa nsuku ni swa silivhere leswi ndzi nga ku nyika, u tiendlele swifaniso swa vavanuna lava u tinyamisake na vona.

¹⁸U tekile tinguvu ta wena leti lukiweke, u swi funengeta ha tona, u halatile emahlweni ka swona mafurha ya mina ni mirhi ya risuna ya mina.

¹⁹Ni vuswa lebyi ndzi ku nyikeke, ni mapa layo saseka, ni mafurha, ni vulombe, hinkwaswo leswi ndzi ku phameleke ha swona u swi vekile emahlweni ka swona, u endlile ha swona timhamba ta risuna. Kunene u swi endlile, ku vula Hosi Yehovha.

²⁰“U tekile varisanyana ni vanhwanyana lava u ndzi velekeleke vona, u gandzerile ha vona leswaku swi ta va swakudya swa swona.

²¹Xana vuoswi bya wena byi nga ringananga leswaku u engeta u dlaya vana va mina, u va nyiketa hi ku va hisa hi ndzilo-ke?

²²Exikarhi ka manyala ya wena hinkwawo, ni vugangu bya wena, u rivele masiku ya vuntshwa bya wena loko wa ha ri ni vusweti bya wena ntsena, ni loko u puluvundza engatini ya wena.

²³“Hikwalaho ka manyala ya wena hinkwawo u ni khombo, u ni khombo wena ku vula Hosi Yehovha.

²⁴U tiakele tindlu to oswana kona, u lunghisile tindhawu to gangisiwa kona entsendzeleni wun'wana ni wun'wana;

²⁵emahandzeni hinkwawo u lunghisile ndhawu ya vugangu, u nyamisile ku saseka ka wena, u tinyiketile eka muendzi un'wana ni un'wana, u engeterile ngopfu vuoswi bya wena.

²⁶U endlile vuoswi ni Vaegipta, vanakuloni va miri leyo tiya, u engetele ngopfu vugangu bya wena ku ndzi vilerisa mbilu.

²⁷Vona, ndzi tshambulutile voko ra mina ehenhla ka wena, ndzi hungutile ndzhaka ya wena, ndzi ku nyiketile valala va wena, va ri vanhwana va Vafilista lava nga ni tingana hikwalaho ka mitirho ya wena leyo biha.

²⁸U gangisile ni Vaaxuru hikuva u nga si xurha hi ku dyoha; hambiswiritano a wu kolwanga.

²⁹U andzisile kambe vuoswi bya wena etikweni ra Kanana ku fika eKalediya, hambiswiritano, a wu kolwanga.

³⁰“Yo! Vutoya bya mbilu ya wena ku vula Hosi Yehovha, leswi u endleke hinkwaswo leswiya swa vuoswi lebyi kulukumba ngopfu!

³¹Loko u akile tindlu ta vuoswi emahandzeni hinkwawo, ni loko u tilunghisele tindhawu to oswana emitsendzeleni hinkwayo, a ku fananga ni lowa vuoswi, a ku langutelanga hakelo.

³²Kambe a wu ri nsati wa vuoswi la rhurhelaka vaendzi ematshan'weni ya ku khensela nuna wa yena.

³³Vaoswi hinkwavo va tsakisiwa hi hakelo, kambe hi wena la nga tsakisa lava u gangiseke na vona, u va hakerile kunene leswaku va humelela hinkwako ku ta oswana na wena.

³⁴U hambene ni vavasati van'wana hi ku oswa ka wena, hikuva a ku tshamanga u naveriwa. Leswi u humeseke hakelo ematshan'weni ya ku yi amukela, emhakeni leyi, u hambene ni van'wana.

³⁵“Hikwalaho, wena muoswi, yingisa rito ra Yehovha!

³⁶Ku vula Hosi Yehovha a ku: Leswi u hangalaseke xuma xa wena, ni leswi u kombiseke vusweti bya wena evuoswini bya wena, ni hikwalaho ka swifaniso swa wena swa manyala, ni ngati ya vana va wena lava u nyikeke vona,

³⁷waswivo, ndzi ta hlengeleta vagangisi va wena lava u oswaneke na vona, lava u va rhandzeke, ni lava u va vengeke, ndzi ta va hlengeleta hi matlhelo hinkwawo, ndzi va kombisa vusweti bya wena kutani va ta byi vona.

³⁸Ndzi ta ku avanyisa hilaha nsati wa vuoswi ni loyi a halataka ngati va avanyisiwaka hakona. Mina ndzi ta halata ngati ya wena hi rilondzo ni vukari.

³⁹Ndzi ta ku nyiketa emavokweni ya vona va ta mbundzuxa yindlu ya wena, va hlanhla switsunga swa wena, va ku susela tinguvu, va ku tekela masindza ni swingwavila swa wena, va ku siya evuswetini bya wena.

⁴⁰Va ta rhamba vandla ku lwa na wena, va ku khandla hi maribye va ku tlhava hi matlhari.

⁴¹Va ta hisa tindlu ta wena hi ndzilo, va hetisa eka wena ku avanyisa ka mina emahlweni ka vavasati lavo tala. Hi mukhuva lowo, ndzi ta ku tshikisa vuoswi bya wena, u ta tshika ku humesa hakelo.

⁴²Ndzi ta hetisa vukari bya mina ehenhla ka wena, rilondzo ra mina ri ta suka eka wena, ndzi miyela, kutani vukari bya mina byi ta hela.

⁴³“Hikuva u rivele masiku ya vuntshwa bya wena, kambe u ndzi holovisile hi timhaka leti hinkwato, vona ndzi ta rihisa mikhuva ya wena enhlokweni ya wena, ku vula Hosi Yehovha. Kutani u nga ka u nga ha engeteli manyala ya wena hi vudlayi.

⁴⁴“Vona, un'wana ni un'wana la vulavulaka hi swivuriso u ta vula ehenhla ka wena xivuriso lexi: ‘Wanhwana u fana ni mana wakwe.’

⁴⁵U n'wana wa mana wa wena la nga fularhela nuna ni vana va yena; u makwavo wa vamakwenu lava nga fularhela vanuna ni vana va vona. Mana wa n'wina a a ri wa ka Hiti, tata wa n'wina a a ri wa ka Amori.

⁴⁶Hosi ya wena ya xisati la tshamaka eximatsini xa wena i Samariya, ni vanhwanyana va yena; ndzisana ya wena la tshamaka exineneni, i Sodoma, ni vanhwanyana va yena.

⁴⁷A ku fambanga hi mitila ya vona ntsena, ni ku landza mikhuva ya vona ntsena, a swi ri leswitsongo leswo; kambe u va tlurile emanyaleni ya wena hinkwawo.

⁴⁸Ndza hanya, ku vula Hosi Yehovha: Sodoma, makwenu ni vanhwana va yena a va endlanga hilaha u endleke hakona, wena ni vanhwana va wena.

⁴⁹Loko ku ri ku homboloka ka makwenu Sodoma ni vanhwana va yena, va tikurisile, a va hanya endzalweni, a va tirivala, a va nga tweli vusiwana lava nga ekhombyeni ni vapfumari.

⁵⁰Va tikurisile va endlile manyala emahlweni ka mina; kutani loko ndzi swi vonile ndzi va susile.

⁵¹Loko a ri Samariya, a nga dyohanga kukotisa tlhelo rin'we ra swidyoho swa wena; u n'wi tlurile ngopfu hi ku biha ka wena; u landzurile vamakwenu hi ku homboloka ka wena.

⁵²Na wena sweswi, u soriwa hilaha u nga sola vamakwenu hikwalaho ka swidyoho swa wena leswi tlulaka leswa vona, hi ku biha ka wena, u va lulamisa. Na wena u tshuka, u va ni tingana, hikuva u landzurile vamakwenu.

⁵³“Ndzi ta tlherisa vabohiwa va vona, vabohiwa va Sodoma, ni vanhwana va vona, ni vabohiwa va Samariya, ni vanhwana va vona, ni vabohiwa va wena exikarhi ka vona,

⁵⁴leswaku u rhwala tingana ta wena, u va u soriwa hikwalaho ka mitirho ya wena, kutani swi ta va chavelela.

⁵⁵Makwenu Sodoma, ni vanhwana va yena va ta tlhela ematshamelweni ya vona ya khale, na Samariya, ni vanhwana va yena, va ta tlhela ematshamelweni ya vona ya khale, na wena ni vanhwana va wena, mi ta tlhela ematshamelweni ya n'wina ya khale.

⁵⁶Hi siku ra ku tikurisa ka wena, vito ra Sodoma a ri nga ri enon'wini wa wena,

⁵⁷loko ku homboloka ka wena ku nga si tiviwa, loko u tshama u soriwa hi vanhwana va Siriya ni va matlhelo hinkwawo, ni vanhwana va Vafilista lava nga ku rhuketela hi matlhelo hinkwawo?

⁵⁸U rhwala ku homboloka ka wena ni manyala ya wena, ku vula Yehovha.

⁵⁹“Hikuva ku vula Hosi, Yehovha: Ndzi ta ku endla hilaha u endleke hakona, kasi u sorile ku hlambanya ka wena loko u onhile xinakulobye.

⁶⁰Kambe mina, ndzi ta anakanya xinakulobye xa mina, lexi ndzi nga xi endla na wena evuntshweni bya wena, ndzi ta endla na wena ntwanano lowu nga heriki.

⁶¹U ta va ni tingana loko u ta anakanya mitirho ya wena loko u ta amukela vamakwenu lavakulu ni lavatsongo, ni loko ndzi ku nyika vona, leswaku va va vanhwana va wena, kambe ku nga ri hikwalaho ka xinakulobye xa wena.

⁶²Ndzi ta tiyisa ntwanano wa mina na wena, kutani u ta tiva leswaku hi mina Yehovha,

⁶³leswaku u anakanya mikarhi leyi nga hundza, u va ni tingana, kambe u miyela, ni ku tisola, loko ndzi ta ku rivalela mitirho hinkwayo ya wena, ku vula Hosi, Yehovha.”