Read Xitsonga Ezekiel 19 Bible Online

Ezekiel 19 - Xitsonga bible

Ezekiel 19

¹Wena vula mahlomulo ehenhla ka tihosana ta Israele, u ku:

²Mana wa wena ingi a ri mani? Nghala ya ntswele. Yi etlele exikarhi ka tinghala; exikarhi ka swinghalana yi an'wisile swinghalana swa yona.

³Yi kurisile xinghalana xin'we, xi kula xi va nghala, yi dyondza ku handzula swiharhi ni vanhu.

⁴Ku twala ka yona ku fika ematikweni; yi phasiwa hi marindzi ya vona, va yi bela nsimbhi etinhompfini, va yi koka etikweni ra Egipta.

⁵Loko nghala ya ntswele yi vonile leswaku ku langutela ka yona ingi ku hundzukile swahava, yi teka xinghalana xin'wana, yi xi kurisa leswaku yi va nghala leyintshwa.

⁶Yi fambafamba exikarhi ka tinghala, yi hundzuka nghala yinene, yi dyondza ku handzula swiharhi, yi dya ni vanhu.

⁷Yi nghena etindlwini ta vona ta vuhosi, yi onha miti ya vona. Tiko hinkwaro, ni hinkwaswo leswi ngi swi ri eka rona swi lova hi ku dzumadzuma ka yona.

⁸Kambe matiko ya matlhelo hinkwawo ma yi pfukela, ma yi rhiya hi mitlhamu, kutani yi phasiwa emarindzini ya vona.

⁹Va yi boxa tinhompfu hi xingwavila, va yi khotsa ebokisini, va yi tekela eka hosi ya Babilona. Kutani yi nghenisiwa ekhotsweni, leswaku rito ra yona ri nga ha twakali ehenhla ka tintshava ta Israele.

¹⁰Mana wa wena a a ri tanihi wena, a fana ni vhinya leyi byariweke ekusuhi ni mati; yi vekile ngopfu, a yi ri ni marhavi layo tala hikwalaho ka ku tala ka mati.

¹¹Yi hlukise marhavi lamakulu, lama ringanaka tinhonga ta vuhosi. Vanhu a va yi languta hikwalaho ka ku tlakuka ka yona, ni ku tala ka marhavi ya yona.

¹²Kambe yi susiwile hi vukari, yi cukumetiwile ehansi; mheho ya le vuxeni yi omise mihandzu ya yona, marhavi ya yona layo tiya ma omile, ma tshoviwile: kutani ma hisiwa hi ndzilo.

¹³Sweswi, yi byariwile emananga laha ku omeke, emisaveni leyi nga ni torha.

¹⁴Ndzilo wu humile emarhavini, wu hisile mihandzu; yi nga ha ri na marhavi lamanene lama ringanaka nhonga ya vuhosi. Hi rona rito ra nhlomulo, ri ta va rito ra nhlomulo.