Read Xitsonga Ezekiel 23 Bible Online

Ezekiel 23 - Xitsonga bible

Ezekiel 23

¹Rito ra Yehovha ri ta eka mina na kambe, ri ku:

²“N'wana wa munhu a ku ri ni vavasati vambirhi, vana va nsati un'we,

³va endle vuoswi le Egipta; evuntshweni bya vona va endle vuoswi; kona, va koka mavele ya vona, ku khomiwa mavele ya vona va ha ri vanhwana.

⁴Mavito ya vona, lonkulu a a ri Ohola, na Oholiba, ndzisana ya yena; a va ri va mina, va veleke varisanyana ni vanhwanyana; loko ma ri mavito ya vona, Ohola, i Samariya, Oholiba, i Yerusalema.

⁵“Kutani Ohola a ndzi tshika, a oswana, a rhandzana ngopfu ni varhandziwa va yena, va nga vanhu va Asiriya lava akisaneke na yena,

⁶lava ambaleke leswa nkuxe, tihosana ni tindhuna, vavanuna lavantshwa, hinkwavo lavo rhandzeka, va ri vakhandziyi, va khandziye tihanci.

⁷Evuoswini bya yena, a tinyiketa eka vanhu valavo hinkwavo lava ingi va ri vahlawuriwa eka vana va Asiriya, a tinyamisa hi hinkwavo lavo ingi a va rhandza ngopfungopfu, a tinyamisa hi swifaniso hinkwaswo swa vona.

⁸Hi ku endla sweswo, a nga tshikanga vuoswi lebyi ingi a byi endla ni Vaegipta, siku va etleleke na yena evuntshweni bya yena, a va khoma mavele ya yena loko a ha ri wanhwana, va n'wi chulula vuoswi bya vona ehenhla ka yena.

⁹“Hilaha ndzi n'wi nyiketeke emavokweni ya varhandziwa va yena, emavokweni ya vana va Asiriya, lavo ingi a va rhandza ngopfungopfu.

¹⁰Va tlomula vusweti bya yena, va teka varisanyana va yena ni vanhwanyana va yena, na yena va n'wi dlaya hi fumu; kutani a va ni ku twala exikarhi ka vavasati, siku ku hetisiweke ku avanyisa ehenhla ka yena.

¹¹Loko makwavo Oholiba a vona leswi, a borisa rirhandzu ra yena leri nga ehandle ka nawu ku tlurisa loyi, ni vuoswi bya yena ku tlurisa vuoswi bya makwavo.

¹²A a rhandza vana va le Asiriya ngopfu, tihosana ni tindhuna, lava ingi va akisane na yena, va ri lava ambaleke leswo saseka ngopfu; vakhandziyi lava khandziyaka tihanci, vavanuna lavantshwa lavo rhandzeka hinkwavo.

¹³Ndzi n'wi vona a tinyamisile, va landze ndlela yin'we, vona lavambirhi.

¹⁴Na kambe a engeta vuoswi bya yena; a vona vavanuna lava fanisiweke ekhumbini, swi ri swifaniso swa Vakalediya leswi totiweke hi ku tshwuka,

¹⁵a va bohile swifungha eswisutini swa vona, va funengele swihuku swa mavalavala leswi nembeke etinhlokweni ta vona, hinkwavo ka vona ingi i tihosi; a swi ri swifaniso swa vana va Babilona, etikweni ra Kalediya, lomu va tswariweke kona.

¹⁶A va rhandza ngopfungopfu loko a va vona, kutani a rhumela tintsumi eka vona etikweni ra Kalediya.

¹⁷Kutani vana va le Babilona va ta eka yena emasangwini ya rirhandzu, va n'wi nyamisa hi vuoswi bya vona; na yena a nyamisana na vona, kambe moya wa yena wu fularhelana na vona.

¹⁸A kombisa vuoswi bya yena, a tlomula vuxeti bya yena, kutani moya wa mina wu hambana na yena, kukotisa leswi moya wa mina wu hambaneke ni makwavo.

¹⁹Kambe a andzisa vuoswi bya yena, a ri karhi a anakanya masiku ya vuntshwa bya yena, ni ya siku a endleke vuoswi etikweni ra Egipta.

²⁰A rhandza varhandziwa va yena ngopfungopfu lava nyama ya vona yi kotisaka nyama ya timbhongolo, ni ku tshinela ka vona ingi i ku tshinela ka tihanci.

²¹U rhandze ku tlhelela evuoswini bya vuntshwa bya wena bya siku leri Vaegipta ingi va khome mavele ya wena, hikwalaho ka vuntshwa bya vunhwana bya wena.”

²²Hikwalaho, Hosi Yehovha u ri: “Oho Oholiba! Vona, ndzi ta ku pfuxela varhandziwa va wena, lava moya wa wena wu hambaneke na vona, ndzi ta va tisa va pfa ematlhelo hinkwawo ku ta ku lwisa:

²³Va ri vana va Babilona ni Vakalediya hinkwavo, tindhuna, ni vakulukumba, ni tihosana va ta ni vana va Asiriya hinkwavo, va ri vavanuna lavantshwa lavo saseka hinkwavo, tihosana ni tindhuna, ni tinhenha, ni vavanuna va huvo, va khandziye tihanci hinkwavo.

²⁴Va ta eka wena hi matlhari, ni tigolonyi ni masondzo, ni vandla ra vanhu, hi switlhangu ni switlhangwana, ni swihuku swa nsimbhi, va ta ku rhendzela. Ndzi ta veka ku avanyisa emahlweni ka vona, va ku avanyisa hi mukhuva wa vona.

²⁵Ndzi ta ku lwisa hi mona wa mina, leswaku va ta ta ku endla hi vukari; va ta ku tsema nhompfu ni tindleve, nsalo wa wena wu lovisiwa hi fumu; va ta teka vana ni vanhwanyana va wena, kutani nsalo wa wena wu lovisiwa hi ndzilo.

²⁶Va ta susa swifunengelo swa wena, va ku tekela switsimbo swo bomba ha swona.

²⁷Ndzi ta ku tshikisa vuhomboloki bya wena ni vuoswi bya wena bya le Egipta; a ku nga ha tlakusi mahlo ya wena eka vona, a ku nga ha anakanyi Egipta.

²⁸Hikuva Hosi Yehovha u ri: Vona, ndzi ta ku nyiketa emavokweni ya lavo u va vengeke, ni le mavokweni ya lavo moya wa wena wu va sukeleke.

²⁹Va ta ku endla hi rivengo ra vona, va ta teka rifuwo ra wena, va ku siya u ri ntsena, u fununguriwile; hi mukhuva wolowo, vuhava bya vuoswi bya wena, ni ku onhaka ka wena, ni vuoswi bya wena swi ta fununguriwa.

³⁰U ta endlisiwa sweswo, hikuva u endle vuoswi ni matiko hilaha u tinyamiseke hi swifaniso swa vona hakona.

³¹U fambile endleleni ya makwenu, hilaha ndzi vekeke hakona xidzuvulo xa yena evokweni ra wena.

³²“Hosi Yehovha u ri: U ta nwa hi xidzuvulo xa makwenu, xi nga xidzuvulo lexikulu, lexa ku enta; hikwalaho ka vukulu bya xona, u ta hundzuka mahleko ni xihlekiso.

³³U ta tala vupyopyi ni ku vaviseka; xidzuvulo xa Samariya, makwenu, i xidzuvulo lexi hlamarisaka, lexi lovisaka.

³⁴U ta nwela eka xona, u va u xi ntswontswa, u va u cakunha swirhengele swa xona, u vuya u tihandzula mavele ya wena; hikuva hi mina Hosi Yehovha ndzi vulavuleke sweswo.

³⁵“Hikwalaho ka swona, ku vula Hosi Yehovha: Leswi u ndzi riveleke, u ndzi cukumeteke ndzhaku ka nhlana wa wena, hikwalaho-ke, rhwala u ri wena, nandzu wa vuhava bya wena ni wa vuoswi bya wena.”

³⁶Kwalaho Yehovha a ku eka mina: “N'wana wa munhu, xana u ta avanyisa Ohola na Oholiba xana? Loko swi ri tano, va byele manyala ya vona.

³⁷Hikuva va oswanile, ngati yi le mavokweni ya vona, va oswane ni swifaniso swa vona, na kambe vana va vona lava va va velekeke eka mina, va va hundzisele endzilweni ku va hisa.

³⁸Na swona, va endle sweswo eka mina, va onhe leswo kwetsima swa mina hi siku lero, va nyamise Tisavata ta mina.

³⁹Kakuloko va tlhavela swifaniso swa vona vana va vona, esikwini lero a va nghena endlwini ya mina leyo kwetsima ku yi nyamisa, va endle sweswo endlwini ya mina.

⁴⁰Na kambe va rhumele ku vitana vanhu lava pfaka ekule; kuteloko murhumiwa u fikile eka vona, va ta. U hlambele vona, u tole mahlo ya wena, u tibombisile hikwalaho ka vona;

⁴¹u vuya u tshama emasangwini layo saseka, lawa ingi ku vekiwe tafula emahlweni ka wona laha u vekeke magandzelo ya mina, ni mafurha ya mina.

⁴²Kutani kona a ku twakala rito ra vunyingi lebyi tshameke byi tiphina; kambe, exikarhi ka rixaka ra vanhu ta vitane lava ingi va pfa Saba emananga, lava va beleke masindza emavokweni, ni swihuku swa vukosi leswo saseka va va rhwexa etinhlokweni ta vona.

⁴³“Loko ndzi vula nsati loyi la dyuhatiweke hi vuoswi bya yena, ndzi ri: xana yeloyi wa ha ta lava vuoswi xana, ni van'wana va ta ta eka yena-ke?

⁴⁴Kambe sweswi va ha ya ka yena kukotisa loko va ya eka wansati wa vuoswi; va lo yisa xisweswo eka Ohola ni ka Oholiba, vavasati va swionhi.

⁴⁵Kambe vanhu lava lulameke va ta va avanyisa hi ku avanyisa ka vavasati va vuoswi, ni ku avanyisa ka lava halataka ngati; hikuva i vaoswani, kutani ku ni ngati emavokweni ya vona.”

⁴⁶Hikuva Hosi Yehovha u ri: “Ndzi ta neha vandla ehenhla ka vona, ndzi va nyiketa ku karhateka ni ku phangiwa.

⁴⁷Kutani vandla ri ta va khandla hi maribye, ri va tlhava hi matlhari ya rona; va ta dlaya varisanyana va vona ni vanhwanyana va vona, va hisa tindlu ta vona hi ndzilo.

⁴⁸Ndzi ta herisa sweswo ku biha etikweni; na swona vavasati hinkwavo va ta dyondzisiwa, va nga endli ku fana ni ku biha ka n'wina.

⁴⁹Va ta tlherisela eka n'wina, nandzu wa ku biha ka n'wina, kutani mi ta rhwala ku biwa ka swivi swa swifaniso swa n'wina, mi ta swi tiva leswaku hi mina Hosi Yehovha.”