Read Xitsonga Ezekiel 24 Bible Online

Ezekiel 24 - Xitsonga bible

Ezekiel 24

¹Hi lembe ra vuntlhanu na mune hi n'hweti ya vukhume, hi siku ra vukhume ra n'hweti, rito ra Yehovha ri ta eka mina, ri ku:

²“N'wana wa munhu, titsalele vito ra siku leri, hikuva hi rona siku leri ra namuntlha, hosi ya Babilona yi tshineleke eka Yerusalema.

³U nga vulavula hi xifaniso eka yindlu ya vakaneti, u ku eka vona: Hosi Yehovha u ri: Tseleka mbita exitikweni, u yi tseleka, u yi chela mati.

⁴U tsemelela mihluvi ya nyama endzeni ka yona, yi nga mihluvi hinkwayo leyo nandziha, nenge ni voko; yi tate hi marhambu lamanene.

⁵Teka leswi hlawulekeke entlhambini, ku vekiwa ni nyandza ya tihunyi ku sweka marhambu; mbita a yi vile swinene, na wona marhambu a ma swekiwe endzeni ka yona.

⁶“Hikwalaho, Hosi Yehovha u ri: Yo! Muti wa ngati! Mbita leyo kurha, leyi ku kurha ka yona ku nga sukiki. Yi tsavule hi mihluvi ya yona yi nga hlahluviwi.

⁷Hikuva ngati leyi halatiweke hi muti lowo yi kona exikarhi ka wona, u yi veke henhla ka tamba leri omeke; a nga yi chelanga ehansi ku yi funengeta hi ntshuri.

⁸Hileswaku vukari byi humelela, leswaku ndzi byi hetisa eka wona, hilaha ndzi vekeke hakona ngati ya wona etambeni leri omeke, leswaku yi nga tshuki yi funengetiwa.

⁹“Loko swi ri tano, Hosi Yehovha u ri: Yo! Muti wa ngati! Na mina ndzi ta endla xitiko lexikulu!

¹⁰Hlengeleta tihunyi, u tshivela ndzilo, u sweka tinyama, u khula murhu, u hisa marhambu.

¹¹Kutani u yi tseleka yi nga ri na nchumu, ehenhla ka makala lama vuvumelaka, leswaku yi hisa, na yona koporo ya yona yi tshwa; thyaka ra yona ri n'oka exikarhi ka yona, ku kurha ka yona ku hisiwa.

¹²Yi hariwe ngopfu; hambiswiritano, ku kurha ka yona a ku suki; ku kurha ka yona ku tsandza ndzilo.

¹³Ku biha ku kona ethyakeni ra wena, kasi ndzi ku hlantswile, hambiswiritano, a ku tenganga; a ku nga ha hlantswiwi thyaka ra wena ku fikela loko ndzi korwise vukari bya mina ha wena.

¹⁴Mina, Yehovha, ndzi vulavurile; timhaka leto ta ta, mina ndzi ta ti endla; ndzi nga ka ndzi nga landzuri nandzu, ni loko ku ri ku ponisa, kutani ndzi nga ka ndzi nga tlheri. U ta avanyisiwa hi tindlela ta wena ni swiendlo swa wena ku vula Hosi Yehovha.”

¹⁵Rito ra Yehovha ri ta eka mina na kambe, ri ku:

¹⁶“N'wana wa munhu, vona, hi rifu ra xihluku ndzi ta ku tekela lexi rhandziwaka hi mahlo ya wena. U nga tshuki u rila, ni loko ku ri ku kolola mihloti ya wena yi nga khiriki.

¹⁷U hefemuteka u ri karhi u wisile; u nga endli xirilo xa lava feke: u boha duku ra wena enhlokweni ya wena, u vehela ni tintanghu ta wena emilengeni ya wena, u nga funengeti malebvu ya wena, u nga dyi vuswa bya vanhu.”

¹⁸Kute nimixo, ndzi vulavula eka vanhu, kutani nimadyambu, nsati wa mina a fa; nimpundzu, ndzi endla hi laha ingi ndzi lerisiwe hakona.

¹⁹Vanhu va ku eka mina: “Xana u nga ka u nga hi hlamuseri leswi timhaka leto ti hi faniselaka swona xana, loko u endla leswo tano?”

²⁰Hilaha ndzi nge eka vona: “Rito ra Yehovha ri ta eka mina, ri ku:

²¹‘U nge eka va yindlu ya Israele: Hosi Yehovha u ri: Vonani, ndzi ta nyamisa leswo kwetsima swa mina, ku nga ku tikukumuxa ka matimba ya n'wina, ni ku navela ka mahlo ya n'wina, ni leswi rhandziwaka hi mimoya ya n'wina; varisanyana va n'wina ni vanhwanyana va n'wina lava mi va siyeke va ta wisiwa hi fumu.

²²Mi ta endla kukotisa leswi ndzi endleke; mi nga ka mi nga funengeti malebvu ya n'wina, ni loko ku ri ku dya vuswa bya vanhu.

²³Mi ta tshama mi bohile duku etinhlokweni ta n'wina, mi vehele tintanghu ta n'wina emilengeni; mi nga ka mi nga rili, ni loko ku ri ku kolola; kambe mi ta tsundzuka swidyoho swa n'wina, mi rila un'wana eka un'wana.

²⁴Eka n'wina, Ezekiele u ta va xikombiso xa leswi nga ta ta; siku leri leswi swi nga ta ta, mi ta endla hinkwaswo kukotisa leswi a swi endleke; mi ta tiva leswaku hi mina Hosi Yehovha.’

²⁵“Loko u ri wena, n'wana wa munhu, kutakuloko ndzi suse matimba ya vona exikarhi ka vona, ku nga ku tsaka ka vutikukumuxo bya vona, ni ku navela ka mahlo ya vona, ni ku anakanya ka mimoya ya vona, va ri vana va vona va xinuna ni vanhwanyana va vona,

²⁶esikwini lero, la chupukaka u ta ta eka wena, a ku byela timhaka leti etindleveni.

²⁷Esikwini lero, nomu wa wena wu ta pfuleka loko ku fika la chupukeke; u ta vulavula, a ku nga ha vi mbheveve, kutani u ta va xikombiso xa leswi nga ta ta eka vona, va ta swi tiva leswaku hi mina Yehovha.”