Read Xitsonga Ezekiel 27 Bible Online

Ezekiel 27 - Xitsonga bible

Ezekiel 27

¹Rito ra Yehovha ri ta eka mina na kambe, ri ku:

²“Oho n'wana wa munhu! Tlakusa swirilo ehenhla ka Tiri, u ku eka Tiri:

³Wena la tshameke etinyangweni ta lwandle, la bindzulaka evanhwini va swihlale leswinyingi, Hosi Yehovha u ri: Oho Tiri, u ku: Ndzi hetisekile nyanisi.

⁴Mindzilekana ya wena yi le swidziveni swa malwandle, vaaki va wena va hetisile ku saseka ka wena.

⁵Va akile mabyatso ya wena hinkwawo hi tikipresi ta Seniri, va teke tikedari ta Lebanoni ku endla timhandze ta wena ta mabyatso.

⁶Va endle swikombe swa wena hi tieike ta Baxani switshamo swa wena va swi endle hi rimhondzo ra ndlopfu leri hlanganisiweke ni murhi lowu pfaka eswihlaleni swa le Kitimi.

⁷Ntsembyana lowo saseka lowu lukiweke wa Egipta u wu endle swisirhelo ni tiseile ta wena; scarlet ni xivunguvungu swa swihlale swa Elixa swi va swifunengelo swa wena.

⁸Lava akeke eSidoni ni le Arivhadi a va ri vona vatluti va wena. Eka rikwenu, wena Tiri, a wu ri ni va vutlhari va wena; lava nga vafambisi va wena va mabyatso.

⁹Eka rikwenu a wu ri ni vakulukumba va Gebali ni lava vutlhari lava sivaka timfa va wena. Eka rikwenu a ku ta mabyatso hinkwawo ya lwandle, ni vanhu va wona, ku ta ta tirha nxavo wa wena.

¹⁰Vona va le Peresi, na Ludu, na Putu, lava ingi va ri vatlhavani va wena; va hayeka switlhangu ni swihuku swa nsimbhi endzeni ka wena; hi vona lava ingi va ri vubombi bya wena.

¹¹Vana va Arivhadi kun'we ni mavandla ya wena va yime emakhumbini ya wena hinkwako; ni tinhenha a ti ri emakhokholweni ya wena; ti hayeka switlhangu swa tona emakhumbini ya wena hinkwako; va hetisisa ku saseka ka wena.

¹²“Tarxixi a bindzula na wena hi mitirho ya tinxakaxaka; hi silivhere, ni nhumbu, ni thini, ni ntsopfu, va swi veka eswitolweni swa wena.

¹³Yavhani, na Tubala, na Mexeke a va ri vaxavisi va wena, va veka mimoya ya vanhu ni swibya swa nsuku emixabyeni ya vona.

¹⁴Va yindlu ya Togarima va tisa eswitolweni swa wena tihanci, ni vakhandziyi, ni timula.

¹⁵Vana va Dedani a va bindzula na wena, swihlale leswinyingi a swi ri emandleni ya wena ku bindzula na wena, va ku nehela timhondzo ta tindlopfu, ni xipalatsi yi va hakelo ya wena.

¹⁶Vasiriya a va bindzula na wena ku xava mitirho ya wena leyinyingi, va tisa maribye layo saseka eswitolweni swa wena, ni xivunguvungu, ni tinguvu ta vubombi, ni ntsembyana, ni korale, ni rubi.

¹⁷Yuda, ni va tiko ra Israele, na vona, a va bindzula na wena; va veka emixabyeni ya wena koro ya le Miniti, ni swimbhundzwana, ni vulombe, ni mafurha, ni balsama.

¹⁸Va Damaska a va bindzula na wena, va xava mitirho ya tinxakaxaka hi vhinyo ya Heliboni, ni voya lebyo basa bya tinyimpfu.

¹⁹Vedani na Yavhani a va famba va tisa xuma eswitolweni swa wena; ti ri tinsimbhi leti furiweke, ni kasiya, ni rihlanga ra risuna, va swi veka emixabyeni ya wena.

²⁰Dedani a a ri mubindzuri wa wena, a tisa tinguvu ta ku khandziya tihanci ha tona.

²¹Va Arabiya, ni tihosi hinkwato ta Kedari a va ri emandleni ya wena eku bindzuleni na wena; va ku xavisela swinyimpfana, ni makhuna, ni swiphongo.

²²Vabindzuri va le Xeba na Rhama, a va bindzula na wena; va veka eswitolweni swa wena swinun'hwelo hinkwaswo leswo nun'hwela, ni maribye hinkwawo layo saseka, ni nsuku.

²³Harana, na Kana, na Edeni, ni vabindzuri va le Xeba, ni Vaasuru, ni va Kilimada a va bindzula na wena.

²⁴A va bindzula na wena exivandleni xa wena xa mixavo hi swibombiso, ni tinguvu leta rihlaza, ni leti lukiweke hi vutlhari, ni mabokisi lama teleke tinguvu leti vangamaka, lama bohiweke hi tingoti leto tiya.

²⁵Mabyatso ya Tarxixi a ma fambisa bindzu ra wena. Hi mukhuva wolowo u tatile, u twale ngopfu exikarhi ka malwandle.

²⁶“Vatluti va wena va ku yise ematini lamakulu; kambe moya wa le vuxeni wu ku tshovile exikarhi ka malwandle.

²⁷Mitirho ya wena, ni switolo swa wena vanhu va mabyatso ya wena ni vafambisi va wona, lava sivaka timfa ta mabyatso ya wena, ni lava ku fambiselaka bindzu ra wena, ni valwi va wena hinkwavo, va nga varikwenu kun'we ni mavandla ya wena hinkwawo lama nga ekarikwenu, va ta wela eswidziveni swa malwandle esikwini ra ku wa ka wena.

²⁸Swivandla leswi nga ehandle swi ta tsekatseka hi mpfumawulo wa vafambisi va mabyatso ya wena.

²⁹Hinkwavo lava khomaka xihendzulo, ni vamalwandle, ni hinkwavo vafambisi va le lwandle va ta xika emabyatsweni ya vona, va yima emisaveni.

³⁰Va ta twakarisa rito ra vona eka wena, va rila hi ku vaviseka, va ta tichela ntshuri ehenhla ka tinhloko ta vona, va puluvundza eminkumeni.

³¹Va ta tiendla mimpandhla hikwalaho ka wena, va tiboha hi tinguvu leto khwaxa, va rilela wena hi ku vaviseka ka timbilu hi ku rila loku chavisaka.

³²Kutaku eku rileni ka vona, va ta tlakusa swirilo ha wena, va rila ehenhla ka wena, va ku: ‘Hi wihi muti lowu fanaka na Tiri, ku fana ni la lovisiweke exikarhi ka lwandle?

³³U xurhise vanhu lavo tala hi swa mabindzu ya wena leswi pfaka emalwandle; u fuwise tihosi ta misava hi ku tala ka mitirho ya wena ni mabindzu ya wena.

³⁴Hi nkarhi lowu u tshoviweke ha wona emalwandle ni le swidziveni swa mati, bindzu ra wena ni mavandla hinkwawo ya wena swi wile swin'we na wena.

³⁵Hinkwavo lava akeke eswihlaleni va tshukile ha wena; tihosi ta vona ta tsekatseka hi ku tshuka, tinghohe ta tona ta rhurhumela.

³⁶Loko va ri vabindzuri va matiko man'wana, va be miloti ha wena; u hundzuriwe swahava, kutani a ku nga ha vi kona ni siku ni rin'we.’ ”