Read Xitsonga Ezekiel 30 Bible Online

Ezekiel 30 - Xitsonga bible

Ezekiel 30

¹Kutani rito ra Yehovha ri ta eka mina, ri ku:

²“N'wana wa munhu, profeta u ku: Hosi Yehovha u ri: Rilani! Yo esikwini lero!

³Hikuva siku ri kusuhi, rona siku ra Yehovha ri kusuhi, siku ra munyama; wu ta va nkarhi wa vona vamatiko.

⁴Fumu ri ta ehenhla ka Egipta, ku vaviseka lokukulu ku ta va le Kuxi loko lava tlhaviweke va ta wa le Egipta, ni siku ku khomiwaka vunyingi bya vanhu va kona, ni loko masungulo ya kona ma ta va ma mbundzuxiwile.

⁵Vakuxi, ni Vaputu ni Valudu, ni Maarabu hinkwavo, ni Vakubu, ni vanhu va tinxakaxaka, ni vana va tiko ra xinakulobye va ta wa hi fumu kun'we na vona.

⁶“Yehovha u ri: Loko va ri lava tiyisaka Egipta, va ta wa, ku tikukumuxa ka kona loka matimba ku ta tsongahatiwa; ku suka eMigidolo ku fika eSeyene, vanhu va ta wa hi fumu, ku vula Hosi Yehovha.

⁷Na swona va ta hangalaka exikarhi ka matiko lama hangalasiweke, ni miti ya rona yi ta va exikarhi ka miti leyi onhiweke.

⁸Vona va ta swi tiva leswaku hi mina Yehovha, siku ndzi tshivelaka ndzilo eEgipta, ni loko vapfuni va rona hinkwavo va ta va va tshoviwile.

⁹Esikwini lero, ku ta huma varhumiwa hi mabyatso emahlweni ka mina ku chavisa Kuxi la tshameke hi ku tshemba; na swona ku vaviseka ku ta va kona eka vona kukotisa esikwini ra le Egipta; hikuva vona, makhombo lawa ma ta.

¹⁰“Hosi Yehovha u ri: Ndzi ta heta vunyingi bya le Egipta hi voko ra Nebukadnetsara hosi ya le Babilona.

¹¹Yena, kun'we ni vanhu va yena, va nga vanhu lava chavisaka exikarhi ka matiko, va ta tisiwa ku lovisa tiko, va ta koka mafumu ya vona eka Egipta, va tata tiko hi lava tlhaviweke.

¹²Ndzi ta phyisa milambu, ndzi xavisa tiko emavokweni ya lavo biha; ndzi ta onha tiko hi mavoko ya vamatiko; ni hinkwaswo leswi nga eka rona; hi mina Yehovha la vuleke sweswo.

¹³“Hosi Yehovha u ri: Ndzi ta lovisa ni swifaniso, ndzi herisa swikwembu swahava eNofu; a ku nga ha vi na hosi ya tiko ra Egipta; na swona ndzi ta veka ku chava etikweni ra Egipta.

¹⁴Ndzi ta endla Patroso rhumbi, ndzi veka ndzilo eSowani, ndzi endla ku avanyisa eNofu.

¹⁵Ndzi ta chela vukari bya mina ehenhla ka Sini, khokholo ra le Egipta, ndzi heta vunyingi bya vanhu va Nofu.

¹⁶Ndzi ta tshivela ndzilo Egipta; Sini u ta va ni ku vaviseka lokukulu, na No u ta handzuriwa na Nofu u ta ngheniwa ninhlekanhi hi valala.

¹⁷Vavanuna lavantshwa va le Avene ni le Pi-Besete va ta wa hi fumu; yona miti yi ta ya evukhumbini.

¹⁸Loko a ri Tahapanese, nhlekanhi wu ta hundzuka munyama, siku ndzi tshovaka joko ra Egipta kona, ku tikukumuxa ka kona loka matimba ku ta hela eka yena. Papa lera ntima ri ta funengeta muti wolowo, kutani vanhwanyana va rona va ta ya evukhumbini.

¹⁹Ndzi ta endla ku avanyisa ehenhla ka Egipta, va ta swi tiva leswaku hi mina Yehovha.”

²⁰Kute hi lembe ra vukhume na rin'we, hi n'hweti yo sungula, hi siku ra ntlhanu na mambirhi ra n'hweti, rito ra Yehovha ri ta eka mina, ri ku:

²¹“N'wana wa munhu, ndzi tshove voko ra Faro, hosi ya Egipta; kutani vona, a ri nga boheleriwi ku cheriwa mirhi, hambi ri ri lapi, leswaku ri tiya ku khoma fumu.

²²Hikwalaho, Hosi Yehovha u ri: Vona, ndzi le ka Faro hosi ya le Egipta, ndzi ta tshova mavoko ya yena, lero tiya, ni leri ingi ri tshovekile; kutani ndzi ta wisa fumu evokweni ra yena;

²³ndzi ta hangalasa Vaegipta exikarhi ka matiko, ndzi va hangalasela ematikweni.

²⁴Ndzi ta tiyisa mavoko ya hosi ya le Babilona ndzi veka fumu ra mina evokweni ra yena; ndzi tshova mavoko ya Faro, a hefemuteka emahlweni ka yena hi mahika ya munhu la tlhaviweke.

²⁵“Ndzi ta tiyisa mavoko ya hosi ya le Babilona, kutani mavoko ya Faro ma ta wa, va ta swi tiva leswaku hi mina Yehovha, siku ndzi vekaka fumu ra mina evokweni ra hosi ya Babilona, a ri tshalambutelaka tiko ra Egipta.

²⁶Ndzi ta hangalasa Vaegipta exikarhi ka matiko, ndzi va hangalasela ematikweni, va ta swi tiva leswaku hi mina Yehovha.”