Read Xitsonga Ezekiel 31 Bible Online

Ezekiel 31 - Xitsonga bible

Ezekiel 31

¹Kute hi lembe ra vukhume na rin'we, hi n'hweti ya vunharhu, hi siku ro sungula ra n'hweti, rito ra Yehovha ri ta eka mina, ri ku:

²“N'wana wa munhu, u nge eka Faro, hosi ya Egipta, ni ka vunyingi bya vanhu va yena. U fana na mani evukulwini bya wena xana?

³Vona, Asiriya a a ri kedari ya Lebanoni, lowu sasekeke hi marhavi ya wona, ni ku khuma loku nga ni ndzhuti; nsinya wa wona a wu lehile, manangwanangwa ya wona a ma ri exikarhi ka mapapa.

⁴Mati ma wu mirisile, xidziva xi wu kurisile hi milambu ya xona, a yi famba hi ku rhendzelekela ximila xa wona, yi rhumela milambyana ya yona emirhini hinkwayo ya tiko.

⁵Hikwalaho nsinya wa wona wu tikukumuxeke ehenhla ka mirhi hinkwayo ya tiko, ni marhavi ya wona a ma andza, ni matluka ya wona a ma kula, hikuva a wu mirisiwa hi mati lamanyingi.

⁶Tinyanyana hinkwato ta tilo ti akela emarhavini ya wona, ni swiharhi hinkwaswo swa tiko swi tswalela ehansi ka matluka ya wona, ni le hansi ka ndzhuti wa wona ku ake matiko layo tala, lamakulu.

⁷A wu sasekile evukulwini bya wona, ni le ku leheni ka marhavi ya wona hikuva rimitsu ra wona a ri ri ematini lamanyingi.

⁸Tikedari ta nsimu ya Xikwembu a ti nga wu hundzi; tikipresi, na tona, a ti nga ri na ku ringanisiwa ni marhavi ya wona, ni mikuwa a yi nga fani ni marhavi ya wona; a ku nga ri na murhi ensin'wini ya Xikwembu lowu ingi wu fana na wona eku sasekeni ka wona.

⁹Ndzi wu sasekisile hi vunyingi bya marhavi ya wona; mirhi hinkwayo ya Edeni, leyi ngi yi ri ensin'wini ya Xikwembu, a yi ri ni mona eka wona.

¹⁰“Loko swi ri tano, Hosi Yehovha u ri: Hikuva wu titlakusile hi vukulu bya wona, wu lehise xicapila xa wona exikarhi ka swihlahla leswo tlhuma, kutani mbilu ya wona yi tikukumuxile hi ku leha ka wona,

¹¹ndzi wu nyiketile emavokweni ya lowa matimba wa matiko; yena u ta wu endla hi ku biha ka yena; ndzi wu hlongorile hikwalaho ka vudyohi bya wona.

¹²Vamatiko lava chavisaka va wu tsemile va wu cukumeta; marhavi ya wona ma wele etintshaveni, ni le mikoveni hinkwayo, mahlampfu ya wona lama tshoviweke ma wele emilambyeni hinkwayo ya tiko, vanhu hinkwavo va misava va humele endzhutini wa wona, va wu siye kona.

¹³Ehenhla evuonhakweni bya wona ku ta tshama tinyanyana hinkwato ta tilo, ni swivandza hinkwaswo swa tiko swi ta va exikarhi ka marhavi ya wona;

¹⁴swi ri leswaku mirhi hinkwayo leyi nga ekusuhi ni mati yi nga tshuki yi tikukumuxa hi ku leha ka yona, yi nga tshuki yi vonakarisa swicapila swa yona exikarhi ka swihlahla leswo tlhuma, kutani mirhi hinkwayo leyi nwaka mati yi nga tshuki yi tiyisela eku tikukumuxeni ka yona; hikuva hinkwayo yi nyiketiwe eku feni, ehansi ka misava, exikarhi ka vana va vanhu, kun'we ni lava nghenaka ekheleni.

¹⁵“Hosi Yehovha u ri: Esikwini ra ku ngirimela ka yena exivandleni xa vafi, ndzi endle nkosi; ndzi funengete lwandle hikwalaho ka yena, ndzi sivele milambu ya rona, ni mati lamanyingi ma pfaleriwa; ndzi endle leswaku Lebanoni a rila ehenhla ka yena ni mirhi hinkwayo ya tiko yi karhala hikwalaho ka yena.

¹⁶Hi mpfumawulo wa ku wa ka yena ndzi tsekatsekise matiko siku ndzi n'wi cukumeteke exivandleni xa vafi kun'we ni lava nghenaka enceleni; na swona mirhi hinkwayo ya le Edeni, leyo saseka, ni leyo lulama ya le Lebanoni, hinkwayo leyi nwaka mati emisaveni, yi tichavelele ehansi.

¹⁷Na yona yi nghene exivandleni xa vafi kun'we na yena, eka lava tlhaviweke hi fumu, kun'we ni lava ingi va ri voko ra yena, lava tshamaka endzhutini wa yena exikarhi ka matiko.

¹⁸“U fana na mani eku kwetsimeni, ni le vukulwini exikarhi ka mirhi ya le Edeni xana? U ta nghenisiwa ni mirhi ya le Edeni ehansi ka misava, u ta etlela exikarhi ka lava nga yimbangiki, kun'we ni lava dlayiweke hi fumu. Faro u ta tshamisisa sweswo kun'we ni vunyingi bya vanhu va yena; ku vula Hosi Yehovha.”