Read Xitsonga Ezekiel 32 Bible Online

Ezekiel 32 - Xitsonga bible

Ezekiel 32

¹Kute hi lembe ra vukhume na mambirhi, hi n'hweti ya vukhume na timbirhi, hi siku ro sungula ra n'hweti, vito ra Yehovha ri ta eka mina, ri ku:

²“N'wana wa munhu, rilela Faro hosi ya Egipta, u ku eka yena: U fana ni nghala leyintshwa ya matiko, na swona u fana ni ngwenya elwandle, u hlambela emilambyeni ya wena, u tsekatsekisa mati hi milenge ya wena, u pfindlusa milambu ya wona.

³“Hosi Yehovha u ri: Ndzi ta andlala rikoka ra mina ehenhla ka wena enhlengeletanweni ya vanhu lavanyingi, va ta ku humesa ematini hi rikoka ra mina.

⁴Kutani ndzi ta ku tshika ehenhla ka misava, ndzi ku cukumeta etikweni, ndzi akisa tinyanyana ta tilo hinkwato ehenhla ka wena, ndzi xurhisa swivandza swa tiko hinkwaro ha wena.

⁵Ndzi ta aneka nyama ya wena ehenhla ka tintshava, ndzi tata mikova hi ku bola ka wena.

⁶Na swona, ndzi ta tsakamisa tiko ra ku hlamba ka wena hi ngati ya wena, ku fika etintshaveni; ni milambyana yi ta tala ha wena.

⁷Siku ndzi ku timaka, ndzi ta pfala matilo, ndzi endla tinyeleti ntima; ndzi ta funengeta dyambu hi papa, kutani n'weti a yi nga ha tisi n'weti wa yona.

⁸Mavoningo hinkwawo ya tilo ndzi ta ma endla munyama hikwalaho ka wena, ndzi veka munyama ehenhla ka tiko ra wena, ku vula Hosi Yehovha.

⁹Na swona ndzi ta vavisa timbilu ta vanhu lavanyingi siku ndzi tivisaka ku onhaka ka wena exikarhi ka matiko, ematikweni lawa wena u nga ma tivangiki.

¹⁰Kambe, mina ndzi ta hlamarisa vanhu lavanyingi ha wena tihosi ta vona ti rhurhumela hikwalaho ka wena, loko ndzi ta hatimisa fumu ra mina emahlweni ka tona; ti ta tsekatseka hi mikarhi hinkwayo, un'wana ni un'wana ematshan'weni ya vutomi bya yena, esikwini ra ku wa ka wena.

¹¹“Hikuva Hosi Yehovha u ri: Fumu ra hosi ya le Babilona ri ta ta ehenhla ka wena.

¹²Hi mafumu ya lava matimba, ndzi ta visa vunyingi bya vanhu va wena lavo chavisa hinkwavo exikarhi ka vamatiko; va ta lovisa vuhosi bya le Egipta, ni vunyingi hinkwabyo bya rona byi ta lovisiwa.

¹³Na swona, ndzi ta herisa swifuwo swa rona hinkwaswo ematini lamakulu; a ma nga ha pfindlusiwi hi nenge wa munhu, ni masondzo ya swifuwo a ma nga ha ma pfindlusi.

¹⁴Esikwini lero ndzi ta miyeta mati ya vona, ndzi khulukisa milambu ya vona yi famba kukotisa mafurha, ku vula Hosi Yehovha,

¹⁵loko ndzi ta endla tiko ra Egipta rhumbi, ni mananga, tiko leri pfumalaka hinkwaswo, ni siku ndzi baka hinkwavo lava akeke eka rona, va ta swi tiva leswaku hi mina Yehovha.

¹⁶“Hi rona risimu ra swirilo; va ta ri rilela. Vanhwana va vamatiko va ta ri rilela; va ta rilela Egipta, ni vunyingi bya vanhu va kona, ku vula Hosi Yehovha.”

¹⁷Kute hi lembe ra khume na mambirhi, hi siku ra khume na ntlhanu ra n'hweti, rito ra Yehovha ri ta eka mina, ri ku:

¹⁸“N'wana wa munhu rilela vunyingi bya le Egipta, u byi cukumeta ehansi, byona, ni vanhwana va vamatiko lama twaleke, ehansi ka misava, kun'we ni lava nghenaka emiceleni.

¹⁹‘Xana u tlula mani hi ku saseka na? Rhelela, u etlela ni lava nga yimbangiki.’

²⁰Va ta wela exikarhi ka lava tlhaviweke hi fumu; va nyiketiwa fumu; kokani Egipta ni vunyingi bya yena hinkwabyo.

²¹Lavo tiya exikarhi ka lava matimba va ta vulavula eka yena ni lava n'wi tataka, va ri exivandleni xa vafi; va ye hansi, va etlele va nga yimbanga, va tlhaviwe hi fumu.

²²“Asiriya, na yena, u kona ni vunyingi hinkwabyo bya yena; u rhendzeriwe hi masirha ya vona; hinkwavo va dlayiwile, hinkwavo va wisiwile hi fumu.

²³Masirha ya vona ma vekiwile enceleni, ni vunyingi bya yena byi rhendzele sirha ra yena exikarhi; lava dlayiweke hinkwavo, va wisiwile hi fumu, va nga lava ingi va pfuxa ku chavisa etikweni ra lava hanyaka.

²⁴“Elamu, na yena, u kona, ni vunyingi bya yena hinkwabyo, byi rhendzele sirha ra yena, hinkwavo va dlayiwile va wisiwe hi fumu, lava nghenaka va nga yimbanga emisaveni leyi nga ehansi, va nga lava ingi va pfuxa ku chavisa etikweni ra lava hanyaka, kutani va rhwala tingana ta vona kun'we ni lava nghenaka enceleni.

²⁵U veke vulawu exikarhi ka lava dlayiweke, kun'we ni vunyingi bya yena hinkwabyo; u rhendzeriwe hi masirha ya yena; hinkwavo ka vona va nga yimbanga, va ri lava dlaweke hi fumu hikuva ku chaviwa ka vona ku endliwe etikweni ra lava hanyaka, kambe va rhwala tingana ta vona kun'we ni lava nghenaka enceleni; va vekiwe exikarhi ka lava dlayiweke.

²⁶“Mexeke u kona, na yena Tubala, ni vunyingi bya yena hinkwabyo; va rhendzeriwe hi masirha ya vona; hinkwavo ka vona va nga yimbanga, va dlayiwile hi fumu, hikuva ku chaviwa ka vona ku endliwile etikweni ra lava hanyaka.

²⁷A va nga etleri ni lava matimba lava weke exikarhi ka lava nga yimbangiki, lava ngheneke exivandleni xa vafi va ri ni mafumu ya vona ya ku lwa; va veke mafumu ya vona ehansi ka tinhloko ta vona, kambe ku dyoha ka vona ku ta va ehenhla ka marhumbu ya vona, hikuva a va ri vona vachavisi va matimba etikweni ra lava hanyaka.

²⁸Na wena u ta tshoviwa exikarhi ka lava nga yimbangiki, u ta etlela na vona lava dlaweke hi fumu.

²⁹“Hi loyi Edomu, tihosi ta yena, ni tihosana ta yena hinkwato, leti vekiweke ni lava dlayiweke hi fumu, hambi leswi ingi va ri va matimba; va ta etlela ni lava nga yimbangiki, na vona lava nghenaka enceleni.

³⁰“Ni tihosi ta le n'walungwini, ti kona hinkwato, ni Vasidoni hinkwavo, lava ngheneke kun'we ni lava dlaweke va ri ni tingana, hambi matimba ya vona ma chavisa; va etlela ni lava nga yimbangiki ni lava dlayiweke hi fumu, va rhwala tingana ta vona na vona lava nghenaka enceleni.

³¹“Faro u ta va vona, u ta va a chaveleriwile hikwalaho ka vunyingi bya yena hinkwabyo, ni nyimpi ya yena hinkwayo ya lava dlaweke hi fumu, ku vula Hosi, Yehovha.

³²Hikuva ndzi veke ku chavisa ka mina etikweni ra lava hanyaka; va ta etlerisiwa exikarhi ka lava nga yimbangiki, kun'we ni lava dlaweke hi fumu, yena Faro ni vunyingi bya yena hinkwabyo, ku vula Hosi Yehovha.”