Read Xitsonga Ezekiel 33 Bible Online

Ezekiel 33 - Xitsonga bible

Ezekiel 33

¹Rito ra Yehovha ri ta eka mina, ri ku:

²“N'wana wa munhu, vulavula eka vana va tiko ra wena, u ku eka vona: Loko ndzi tisa fumu ehenhla ka tiko, kutani vanhu va tiko va hlawula wanuna exikarhi ka vona, va n'wi veka a va mulanguteri eka vona.

³Loko a vona fumu ri ta ehenhla ka tiko, a yimba mhalamhala, a tsundzuxa vanhu;

⁴loko un'wana a twa mpfumawulo wa mhalamhala, a nga tsundzuki, ni loko fumu ri ta, ri n'wi susa, ngati ya yena yi ta va ehenhla ka nhloko ya yena.

⁵U wu twile mpfumawulo wa mhalamhala, kambe a nga tsundzukanga; ngati ya yena yi ta va ehenhla ka yena, kambe la tsundzukaka u ta ponisa moya wa yena.

⁶Kungakuloko mulanguteri a vona fumu ri ta, a nga yimbi mhalamhala kutani vanhu va nga tsundzuxiwi, loko fumu ri ta, ri susa munhu exikarhi ka vona, yeloyi u ta va a susiwile hi ku dyoha ka yena; kambe ndzi ta lava ngati ya yena evokweni ra mulanguteri.

⁷“Loko u ri wena, n'wana wa munhu, ndzi ku vekile mulanguteri wa yindlu ya Israele. U ta yingisa rito leri humaka enon'wini wa mina, u va tsundzuxa hi vito ra mina.

⁸Loko ndzi vula eka mubihi, ndzi ku: Mubihi, u ta fa hi rifu; kambe wena u nga vulavuli ku tsundzuxa mubihi a tshika ndlela ya yena; lowo biha u ta fa hi ku biha ka yena; kambe ngati ya yena ndzi ta yi lava evokweni ra wena.

⁹Kambe, loko u tsundzuxa mubihi endleleni ya yena leswaku a hundzuka, loko a nga hundzuki endleleni ya yena, u ta fela eku biheni ka yena; kambe wena u ta ponisa moya wa wena.

¹⁰“Wena n'wana wa munhu, u nge eka va yindlu ya Israele: Mi vulavula, mi ku: ‘Hakunene swionho swa hina ni swidyoho swa hina swi le henhla ka hina, kutani ha ondza hikwalaho ka swona, hi nga hanyisa ku yini xana?’

¹¹U nge eka vona: Ndza hanya, ku vula Hosi Yehovha, a ndzi tsakeri rifu ra mudyohi, kambe hileswaku a hundzuka endleleni ya yena kutani a hanya; hundzukani, mi hundzuka etindleleni ta n'wina leto biha, hikuva mi rhandza ku fa hikwalaho ka yini, n'wina yindlu ya Israele?

¹²“Loko u ri wena, n'wana wa munhu, u nge eka vana va tiko ra wena: Ku lulama ka mululami ku nga ka ku nga n'wi ponisi esikwini ra swidyoho swa yena, ni ku biha ka muhibi ku nga ka ku nga n'wi wisi ehansi esikwini lero a nga ta hundzuka eswidyohweni swa yena, na swona la lulameke a nga ka a nga vi na matimba ya ku hanya ha wona esikwini ra ku dyoha ka yena.

¹³Kungakuloko ndzi vula eka la lulameke leswaku u ta hanya, loko a tshemba ku lulama ka yena, kutani a endla leswo biha, ku lulama ka yena hinkwako ku nga ka ku nga tsundzukiwi, kambe u ta fa hi swidyoho leswi a swi endleke.

¹⁴Ni loko ndzi nga ku eka mudyohi: ‘U ta fa hakunene,’ loko a hundzuka eswidyohweni swa yena, kutani a endla ku lerisa ni ku lulama,

¹⁵loko mudyohi a vuyisa switshembiso, a tlherisela lexi a xi yiveke, a famba hi milawu ya ku hanya, a nga endli leswo biha, hakunene u ta hanya, a nga ka a nga fi.

¹⁶A ku nga ha tsundzukiwi xidyoho xa yena, ni xin'we, xa leswi a swi endleke, u endle hi nawu ni ku lulama; hakunene u ta hanya.

¹⁷Ntsena vana va tiko ra wena va ri: ‘Ndlela ya Hosi a yi lulamanga,’ kambe i tindlela ta vona leti nga lulamangiki.

¹⁸Loko mululami a hundzuka eku lulameni ka yena, kutani a endla leswo biha, u ta fa ha swona;

¹⁹swi tano ni mubihi, loko a hundzuka eku biheni ka yena, a endla hi nawu ni ku lulama, u ta hanya ha swona.

²⁰Kasi mi ri: ‘Ndlela ya Hosi a yi lulamanga!’ Un'wana ni un'wana ndzi ta n'wi avanyisa hi tindlela ta yena, n'wina, yindlu ya Israele!”

²¹Hi lembe ra khume na mambirhi ra le vukhumbini bya hina, hi n'hweti ya khume, hi siku ra ntlhanu ra n'hweti, muchupuki un'wana wa Yerusalema a fika eka mina, a ku: “Muti wu biwile.”

²²Kutani voko ra Yehovha ri va ehenhla ka mina nimadyambu, emahlweni ka ku fika ka muchupuki; kutani a ahlamisa nomu wa mina, ku fikela loko yena a ta eka mina nimixo; nomu wa mina a wu ahlamisiwile, kutani a ndza ha vanga mbheveve.

²³Kutani rito ra Yehovha ri ta eka mina, ri ku:

²⁴“N'wana wa munhu, lava akeke emarhumbini lawa ya tiko ra Israele va vula leswaku: ‘Abrahama a a ri un'we ntsena, hambiswiritano u fume tiko; hina, hi vanyingi, kutani tiko leri hi nyikiwile rona ku ri fuma.’

²⁵Loko swi ri tano, u nge eka vona: Hosi Yehovha u ri: Mi dya ni ngati, mi yimisela mahlo ya n'wina eswifanisweni swa n'wina, mi halata ngati kutani mi ri, mi ta fuma tiko leri?

²⁶Mi titiyisa hi fumu ra n'wina, mi endla manyala, un'wana ni un'wana wa n'wina u nyamisa nsati wa warikwavo; kutani mi ri, mi ta fuma tiko xana?

²⁷U nge eka vona: Hosi Yehovha u ri: Ndza hanya, hakunene lava nga emarhumbini va ta wa hi fumu, lava nga etikweni, ndzi ta va nyiketa swivandza swi va swakudya swa swona; va le makhokholweni ni le mabakweni va ta fa hi ntungu.

²⁸Ndzi ta endla tiko emananga ni rhumbi, ku tikukumuxa ka matimba ya rona ku ta hela, tintshava ta Israele ti ta onhaka, a ku nga vi na un'we la nga hundzaka eka tona.

²⁹Kutani va ta swi tiva leswaku hi mina Yehovha, loko ndzi endla tiko emananga ni rhumbi, hikwalaho ka manyala hinkwawo lawa va ma endleke.

³⁰“Loko u ri wena, n'wana wa munhu, vana va tiko ra wena va vulavula ha wena, va yime emakhumbini ni le tinyangweni ta tindlu, va vulavula un'wana eka un'wana, va byelana, va ku: ‘Tanani-ke, hi twa rito leri humaka eka Yehovha.’

³¹Va ta eka wena va tele; vanhu va tiko ra mina va tshama emahlweni ka wena, va twa marito ya wena, kambe a va endli ha wona; hikuva milomu ya vona ya ma sandza, kambe timbilu ta vona ti landzelela rifuwo ra vona.

³²“Vona-ke, wena u le ka vona kukotisa risimu leri rhandzekaka ra un'wana la nga ni rito leri tsakisaka, la tivaka ku yimba hi gubu. Hikuva va twa marito ya wena, kambe a va endli ha wona.

³³Kambe loko leswo swi tile, (kasi swa ta), va ta swi tiva kutani leswaku muprofeta a a ri kona e xikari ka vona.”