Read Xitsonga Ezekiel 39 Bible Online

Ezekiel 39 - Xitsonga bible

Ezekiel 39

¹“Na wena, n'wana wa munhu, profetela Gogo, u ku: Hosi Yehovha u vulavula sweswo, a ku: Ndzi ta eka wena, Gogo, hosi leyi fumaka Mexeke na Tubala;

²ndzi ta ku susa, ndzi ku fambafambisa, ndzi ku tlhandlukisa hi le makumu ya n'walungu, ndzi ku fikisa etintshaveni ta Israele.

³Kwalaho ndzi ta damurhuta vurha bya wena evokweni ra wena ra ximatsi, ndzi va ndzi wisa miseve ya wena evokweni ra wena ra xinene.

⁴U ta wa ehenhla ka tintshava ta Israele, wena, ni mitlawa ya wena hinkwayo, ni matiko lama nga ta va na wena; ndzi ku nyikile leswaku u dyiwa hi magama, ni tinyanyana ta tinxakaxaka, ni swivandza swa nhova.

⁵U ta wa erivaleni, hikuva ndzi vulavurile, ku vula Hosi Yehovha.

⁶Kutani ndzi ta rhumela Magogo ndzilo, ni ka lava tshamisaka hi ku rhula eswihlaleni; va ta tiva leswaku hi mina Yehovha.

⁷Hilaha ndzi nga ta tivisa vito ra mina ro kwetsima exikarhi ka tiko ra mina ra Israele, ndzi nga ka ndzi nga pfumeri vito ra mina ro kwetsima ri onhiwa, matiko ma ta tiva leswaku hi mina Yehovha, la kwetsimeke eIsraeleni.

⁸Swi lava ku humelela, swi ta va kona, ku vula Hosi Yehovha esikwini leri ndzi vuleke rona.

⁹“Enkarhini wolowo, vaaki va miti ya Israele va ta huma ku ya hisa hi ndzilo timpanga, ni tinhlungula, ni switlhangu, mavurha ni miseve, tinhonga ni matlhari; va ta tshivela ndzilo hi malembe ya ntlhanu na mambirhi ha swona.

¹⁰Va nga ka va nga lavi tihunyi enhoveni, hambi ku ri ku ti tsema eswihlahleni, hikuva va ta tshivela ndzilo hi matlhari. Va ta phanga lava ingi va va phanga, va ta hlasela lava ingi va va hlasela.

¹¹“Hi siku rero, ndzi ta nyika Gogo xivandla xo lahla vafi eIsraeleni, wu nga nkova wa vahundzi, tlhelo ra vuxa eka lwandle, sirha leri ri ta siva ndlela ya vahundzi; va ta lahla kona Gogo ni ntshungu wa yena hinkwawo, va ta thya vito ra kona Hamona-Gogo, (hileswaku ntshungu wa Gogo).

¹²Yindlu ya Israele yi ta va lahla ku basisa tiko hi tin'hweti ta ntlhanu na timbirhi.

¹³Vanhu hinkwavo va tiko va ta va lahla, ri ta va eka vona siku ro twala, leri ndzi nga ta titwarisa ha rona, ku vula Hosi Yehovha.

¹⁴Va ta hlawula lava nga ta vekiwa ku fambafamba hi tiko, ku ya lahla vahundzi lava nga ta sala erivaleni leswaku va ta ri basisa. Loko ku herile tin'hweti ta ntlhanu na timbirhi, va ta huma va ya lava.

¹⁵Ni loko vahundzi va ndlela va ta hundza hi tiko, kungakuloko un'wana wa vona a vona marhambu ya vanhu, u ta yimisa ekusuhi xikombiso, valahli va kondza va ya ma lahla enkoveni wa Hamona-Gogo.

¹⁶Swi tsandza na Hamona ri ta va vito ra muti wun'wana; sweswo va ta basisa tiko.

¹⁷“Na wena, n'wana wa munhu, Hosi Yehovha u vulavula sweswo, a ku: Byela tinyanyana ta tinxaka hinkwato ni swiharhi hinkwaswo swa nhova, u ku: ‘Hlengeletanani, mi ta, hlangana ni hi matlhelo hinkwawo, egandzelweni leri ndzi mi endlelaka rona, ri nga gandzelo lerikulukumba etintshaveni ta Israele; mi ta dya nyama ni ku nwa ngati.

¹⁸I nyama ya tinhenha leyi mi nga ta yi dya, i ngati ya tihosi ta misava leyi mi nga ta yi nwa, i makhuna, ni swinyimpfana, ni swiphongo, i tihomu to nona ta Baxani ntsena,

¹⁹mi ta dya mafurha mi xurha, mi ta nwa ngati mi ko mi pyopyiwa egandzelweni rolero leri ndzi nga ta mi endlela rona.

²⁰Mi ta xurha etafuleni ra mina hi tihanci to khandziyiwa ni ta tigolonyi, hi tinhenha ni vanhu va nyimpi hinkwavo,’ ku vula Hosi Yehovha.

²¹“Kwalaho ndzi ta titwarisa exikarhi ka matiko; matiko hinkwawo ma ta vona avanyiselo ra mina leri ndzi nga ta endla ha rona, ni voko ra mina ra xinene leri ndzi nga ta ri tshambuluta ehenhla ka vona.

²²Kutani yindlu ya Israele yi ta tiva leswaku hi mina Yehovha, Xikwembu xa yona, ku suka siku rero ni le mahlweni;

²³ni matiko ma ta tiva leswaku loko va yindlu ya Israele va yisiwile evukhumbini, hi leswi va dyoheke, leswi va ndzi kanganyiseke; hikwalaho ndzi va fihlele mombo wa mina, ndzi va nyiketile valala va vona, va wile hinkwavo hi ku tlhaviwa hi fumu.

²⁴Ndzi endlile ha vona hilaha va tinyamiseke hakona, ni ku ndzi fularhela; hi kona ndzi va fihleleke mombo wa mina.

²⁵“Hikwalaho, Hosi Yehovha u vulavula sweswo, a ku: Sweswi ndzi ta tlherisa vabohiwa va Yakobo, ndzi ta tsetselela yindlu hinkwayo ya Israele, ndzi ta kombisa rilondzo ra mina hikwalaho ka vito ra mina ro kwetsima.

²⁶Va ta rivala kwalaho tingana ta vona ni swidyoho hinkwaswo leswi va ndzi dyoheleke ha swona, loko va ta aka kambe etikweni ra vona hi ku rhula, ku nga ha vi na munhu ku va karhata.

²⁷Loko ndzi ta va vuyisa exikarhi ka matiko, ndzi va hlengeleta ematikweni ya valala va vona, loko ndzi ta tikwetsimisa ha vona emahlweni ka matiko lamanyingi,

²⁸va ta tiva leswaku hi mina Yehovha, Xikwembu xa vona, lexi ingi xi va yisile ematikweni, va ri makhumbi, xi tlhela xi va hlengeleta etikweni ra vona; ndzi nga ka ndzi nga siyi na un'we endzhaku.

²⁹Ndzi nga ka ndzi nga ha va fihleli mombo wa mina, hikuva ndzi ta chela moya wa mina ehenhla ka yindlu ya Israele ku vula Hosi Yehovha.”