Read Xitsonga Daniel 11 Bible Online

Daniel 11 - Xitsonga bible

Daniel 11

¹Loko ndzi ri mina, hi lembe lero sungula ra ku fuma ka Dariyosi wa Mumeda, a ndzi ri eka yena ku n'wi yimela ni ku n'wi tiyisa.

²Kutani sweswi, ndzi ta ku byela swinene. “Waswivo, tihosi tinharhu ta ha ta va kona eka Vaperesi, kutani wa vumune u ta fuwa vukosi lebyi tlulaka bya tin'wana hinkwato, kutani kutakuloko a tinyike matimba hi rifuwo ra yena, u ta tivitanela vunyingi hinkwabyo ku ya lwa ni va ku fuma ka Yavhani.

³Kutani ku ta pfuka hosi ya vurhenha leyi nga ta va ni matimba lamakulu, yi ta endla hilaha yi rhandzaka hakona.

⁴Kutani, kutakuloko u tlakukile, ku fuma ka yena ku ta tshoviwa, ku avanyiseriwa etimhehweni ta mune ta le matilweni; kambe ku nga ka ku nga vi ka vatukulwana va yena, ni matimba ya vona ma nga ka ma nga ringani ni yo sungula, hikuva ku fuma ka yena ku ta tsuvuriwa ku ta pambuleriwa van'wana, va nga ri varikwavo.

⁵“Kutani hosi ya le dzongeni yi ta kuma matimba, kutani yin'wana ya tindhuna na ta yena yi ta n'wi tlula hi matimba, kutani yi ta fuma; ku fuma ka yona ku ta va ku fuma ka matimba lamakulu.

⁶“Endzhaku ka malembe man'wana, va ta endla xinakulobye, kutani n'wana wa wansati wa hosi ya le dzongeni u ta ta eka hosi ya le n'walungwini ku lunghisa timhaka. Kambe voko ra yena ri nga ka ri nga tiyi, hikuva ri ta tsandzeka ku tiya, ni loko yi ri nyimpi ya yena, kutani u ta nyiketiwa eku feni, yena ni lava n'wi tiseke, ni loyi a n'wi velekeke, ni loyi a n'wi seketeleke emikarhini yoleyo.

⁷“Kambe hluke rin'wana ra timitsu ta yena ri ta humelela exitshan'weni xa yena, u ta ta enyimpini, u ta nghena emakhokholweni ya hosi ya le n'walungwini, kutani a endla hi vona hilaha a rhandzaka ha kona, a va hlula.

⁸Kutani u ta yisa eEgipta swikwembu swa vona, ni swifaniso swa swona swa nsimbhi swin'we ni mitirho ya nkoka ya vona ya nsuku ni ya silivhere, kutani ku ta hundza malembe man'wana lawa a nga ta hlula hosi ya le n'walungwini ha wona.

⁹Kambe loyi a ta huma nyimpi ku ya lwa ni hosi ya le dzongeni, kambe u ta tlhelela etikweni ra yena.

¹⁰“Kambe vana va yena va ta sungula ku lwa, va hlengeleta mavandla layo tala ngopfu; un'wana wa vona u ta fika a tata hinkwako, a tlhela a vuya, a tiyisa ku sivetela khokholo.

¹¹Kutani hosi ya le dzongeni yi ta kariha ngopfu, yi ta huma nyimpi ku ya lwa na yena, yi ri hosi ya le n'walungwini, yona yi ta rhamba mavandla lamakulu; kambe mavandla lawa ma ta nyiketiwa emavokweni ya yena.

¹²Kutani mavandla ya yena ma ta tikurisa, kutani mbilu ya yena yi ta tikukumuxa ngopfu, u ta wisa makume ya madzana ya vanhu; ntsena a nga ka a nga hluri.

¹³Hikuva hosi ya le n'walungwini yi ta hlengeleta kambe mavandla layo tala lama hundzisaka yo sungula, kutakuloko ku hundzile malembe man'wana, yi ta fika, yi ri ni nyimpi leyikulu ni vuhosi lebyo tala.

¹⁴Emikarhini yoleyo lavo tala va ta hundzukela hosi ya le dzongeni hi matimba; kutani vanhu va vurhenha exikarhi ka tiko ra wena va va tiarisa, va ko va ta hetisa xikombiso lexi: kambe va ta wela ehansi.

¹⁵“Kutani hosi ya le n'walungwini yi ta ta aka rirhangu leri tlakukeke, yi ta hlula miti ya makhokholo, kutani mavandla ya le dzongeni ma nga ka ma nga yimi, hambi ma ri mavandla lama hlawuriweke, ma ta kala matimba ya ku tiyela.

¹⁶Kutani loyi a rhambiweke ku ya lwa na yena, u ta endla hilaha a rhandzaka hakona, kutani a ku na munhu la nga ta n'wi tiyela; kutani u ta yima etikweni, ri ri tiko ro saseka, kutani ku onha ku ta va kona evokweni ra yena.

¹⁷U ta phikelela ku ya lwa hi matimba hinkwawo ya ku fuma ka yena, kutani u ta endla ku rhula ni hosi ya le dzongeni; u ta n'wi nyika n'wana wa yena wa wanhwana ku va nsati wa yena, a ta n'wi lovisa hakona, kambe mhaka yoleyo yi nga ka yi nga endlakari, na swona a yi nga pfuni nchumu.

¹⁸Kutani u ta langutisa mahlo ya yena hitlhelo ra swihlale, kutani a teka swin'wana swa swona, kambe hosi yin'wana yi ta tsongahata ku sandza ka yena, yi tlherisela ku sandza eka yena.

¹⁹Kutani u ta langutisa mahlo ya yena tlhelo ra makhokholo ya tiko ra yena, kambe u ta khunguvanyeka, a wa, a nga ha kumiwi.

²⁰“Kutani, ematshan'weni ya yena, ku ta tshama un'wana la nga ta rhuma murihisi a heta tlhelo ra ku saseka ra ku fuma, ntsena u ta hela hi masiku ma nga ri mangani, kambe a swi nga endliwi hi vurhenha, ni loko yi ri nyimpi.

²¹“Ematshan'weni ya yena ku ta humelela un'wana la solekaka, la nga lulameriwiki hi vuhosi, kutani u ta tikombisa hi ku rhula, a titekela vuhosi hi mano.

²²Mavandla lama taka, ma ta kukuretiwa hi yena, ma hluriwa, swin'we ni hosi yin'wana leyi endleke xinakulobye na yena.

²³Hikuva u ta tsan'wa xinakulobye, kutani u ta avana na yena, a tirha hi mano, kutani u ta humesa nyimpi, a hlula hi vanhu va nga ri vangani.

²⁴Exikarhi ka ku rhula, u ta nghena emaaveni ya tiko leri hundzisaka hi ku nona, kutani u ta endla leswi nga ka swi nga endliwangiki hi vatata wa yena ni vakokwa wa yena; u ta pambula leswi kumiweke enyimpini, ni xuma, ni rifuwo, kutani u ta endla makungu yo wisa makhokholo, kutani u ta endlisa sweswo ku yisa enkarhini lowu pimiweke.

²⁵Kutani u ta tinyika matimba, a tiyisa mbilu ku ya lwa ni hosi ya le dzongeni hi mavandla lamakulu; kutani hosi ya le dzongeni yi ta ya lwa hi nyimpi leyikulu leyi tlurisaka hi matimba, kambe yi nga ka yi nga tiyi, hikuva va ta endla hi mano ku n'wi onha.

²⁶Lava dyaka swakudya swa yena leswi xawulaka, va ta n'wi tshova, tinyimpi ta yena ti ta hangalaka, kutani lavo tala va ta dlawa.

²⁷Tihosi letimbirhi ti ta ehleketa ku onha etimbilwini ta tona, kutani etafuleni ri ri rin'we va ta vulavula swin'we hi mavunwa. Kambe leswo swi nga ka swi nga tiyi, hikuva vuheriso byi ta fika hi nkarhi lowu hlawuriweke ntsena.

²⁸“U ta tlhelela etikweni ra yena a ri ni rifuwo lerikulu, kutani mbilu ya yena yi ta venga xinakulobye lexo kwetsima, kutani u ta lwa na xona a kondza a tlhelela etikweni ra rikwavo.

²⁹“Hi nkarhi lowu vekiweke, u ta engeta a ya lwa ni hosi ya le dzongeni, kambe nyimpi leya makumu yi nga ka yi nga fani ni leyo sungula.

³⁰Hikuva mabyatso ya Kitimi ma ta ta ku lwa na yena, kutani u ta hela mbilu, a tlhelela endzhaku. U ta engeta a karihela xinakulobye lexo kwetsima, a lwa na xona, a tlhela a languta lava tshikeke xinakulobye lexo kwetsima.

³¹Kutani mavandla lama humaka eka yena ma ta yima ma swihata xikwetsimisiso, ni khokholo, kutani ma ta herisa gandzelo ra masiku ni masiku, kutani ematshan'weni ya xona, va ta veka manyala ya muonhi.

³²Kutani hi ku xengetela ka yena, u ta tikokela lava tlulaka xinakulobye, kambe tiko ra lava tivaka Xikwembu xa vona, ri ta tiya, ri tirha.

³³Kutani lava tlhariheke, lava nga exikarhi ka tiko, va ta dyondzisa lavo tala, kambe van'wana va ta herisiwa hi matlhari, ni malangavi, ni ku bohiwa, ni ku phangiwa hi masiku man'wana.

³⁴Kutani loko va wile va ta vona ku pfuneka ku nga ri kungani, kutani lavo tala va ta namarhelana na vona hi ku kanganyisa.

³⁵Kutani exikarhi ka lava tlhariheke, van'wana va ta wa leswaku va ta ringetiwa, ni ku hlantswiwa, ni ku basisiwa, ku yisa emikarhini leyo hetelela, hikuva, na yona mhaka leyo, yi vekeriwe nkarhi lowu; vekiweke.

³⁶“Kutani hosi yi ta endla hilaha yi rhandzaka hakona, yi ta tikurisa, yi titlakusa ehenhla ka swikwembu hinkwaswo, kutani yi ta hleva Xikwembu xa swikwembu hi swisandzu leswi hlamarisaka, yi ta khuluka ku ko ku fika ku hetisekeni ka vukari, hikuva lexi lerisiweke xi ta endlakala.

³⁷A nga ka a nga hlayisi swikwembu swa vatata wa yena, ni loko xi ri xikwembu lexi tsakeriwaka hi vavasati, kutani a nga ka a nga vuri nchumu hi xikwembu xihi ni xihi, kambe u ta tikukumuxela swona hinkwaswo.

³⁸Kambe u ta gandzela xikwembu xa makhokholo exiyin'weni xa xona, a gandzela xikwembu lexi nga ka xi nga tiviwangiki hi vatata wa yena, a xi bombisa hi nsuku ni silivhere, ni maribye ya nkoka, ni swibombiso swin'wana.

³⁹U ta endlisa sweswo ni xikwembu xin'wana emakhokholweni man'wana, kutani lava nga ta xi khongela, u ta va dzunisa ngopfu, a va veka eku fumeni ka lavo tala, a va avela matiko ku va khensa.

⁴⁰“Emikarhini ya makumu, hosi ya le dzongeni yi ta himana na yena, kutani hosi ya le n'walungwini yi ta wela ehenhla ka yena kukotisa xidzedze, hi tigolonyi ni lava khandziyeke tihanci, ni mabyatso layo tala; a ta nghena ematikweni a vavamela kukota nambu.

⁴¹U ta nghena ni le tikweni ra nkoka, kutani ku ta wa lavo tala, kambe ku ta chupuka emavokweni ya yena Vaedomu, ni Vamowabu, ni lavakulu eka vana va Amoni.

⁴²U ta yisa voko ra yena ematikweni layo tala, kutani, na rona tiko ra Egipta, ri nga ka ri nga poni.

⁴³U ta teka xuma xa nsuku ni swa silivhere, ni hinkwaswo swa nkoka swa Vaegipta; kutani Valibiya ni Vakuxi va ta landzela mitila ya yena.

⁴⁴Kambe evuxeni ni le n'walungwini, ku ta huma mimpfumawulo leyi nga ta n'wi chavisa, kutani u ta rhamba mavandla a karihile ngopfu ku ya dlaya ni ku ya onha lavo tala.

⁴⁵U ta dzima matende ya vuhosi bya yena emaaveni ya malwandle ku xaxamelana ni ntshava leyo kwetsima leyi dzunekaka. Kutani, u ta ya hela, ku nga ri na loyi a n'wi pfunaka.