Read Xitsonga Daniel 3 Bible Online

Daniel 3 - Xitsonga bible

Daniel 3

¹Hosi Nebukadnetsara a endla xifaniso xa nsuku; xiyimo xa xona a xi ri xa swisungunhu swa ntlhanu wa makume na khume rin'we, ku anama ka xona a wu ri ntlhanu wa swisungunhu na xin'we; kutani a xi yimisa ebanyini ra Dura, etikweni ra Babilona.

²Kutani hosi Nebukadnetsara a rhamba tihosana, ni tindhuna, ni vafumi ni vaavanyisi lavakulu, ni vahlayisi va xuma xa yena, ni lava lunghisaka milawu, ni vaavanyisi, ni vafumi hinkwavo va matiko, leswaku va ta enkhubyeni wa ku khangula xifaniso lexi yimisiweke hi hosi Nebukadnetsara.

³Kavaloko ku hlengeletana tihosana, ni tindhuna, ni vafumi, ni vaavanyisi lavakulu, ni vahlayisi va xuma, ni valunghisi va milawu, ni vaavanyisi, ni vafumi hinkwavo va matiko, va ta eku khanguleni ka xifaniso lexi hosi Nebukadnetsara a xi yimiseke; va ta va yima emahlweni ka xifaniso lexi yimisiweke hi Nebukadnetsara.

⁴Kutani mutivisi wa timhaka ta hosi a huwelela hi rito leri tlakukeke, a ku: “Ma tivisiwa, n'wina vanhu va matiko, ni swivongo, ni tindzimi hinkwato, leswaku:

⁵hi nkarhi lowu mi nga ta yingisa mpfumawulo wa mhalamhala, ni wa xitiringo, ni wa ritaninga, ni wa haripa, ni wa psalteri, ni wa gupu, ni wa tinxaka hinkwato ta swa ku yimba, mi ta khinsama, mi gandzela xifaniso xa nsuku lexi yimisiweke hi hosi Nebukadnetsara.

⁶Kutani mani na mani la nga taka a nga khinsameri a gandzela xifaniso xa nsuku, u ta hoxiwa hi nomu wolowo ekheleni ra ndzilo lowo kariha.”

⁷Hi laha-ke, kuteloko va matiko hinkwawo va yingisa mpfumawulo wa mhalamhala, ni wa xitiringo, ni wa ritaninga ni wa haripa, ni wa psalteri, ni wa tinxaka hinkwato ta swa ku yimba, va matiko, ni swivongo, ni tindzimi, hinkwavo va khinsama, va gandzela xifaniso xa nsuku Lexi yimisiweke hi hosi Nebukadnetsara.

⁸Kwalaho, enkarhini wolowo, vanhu van'wana va Kalediya va tshinelela, va ta hehla Vayuda;

⁹va vulavula, va ku eka hosi Nebukadnetsara: “Hosi, hanya hilaha ku nga heriki!

¹⁰Wena, hosi, u vekile ku lerisa leswaku un'wana ni un'wana la yingisaka mpfumawulo wa mhalamhala, ni wa xitiringo, ni wa ritaninga, ni wa haripa ni wa psalteri, ni wa gupu, ni wa leswi yimbiwaka hinkwaswo, a khinsama a gandzela xifaniso xa nsuku;

¹¹ni leswaku mani na mani la nga taka a nga khinsami a gandzela, u ta hoxiwa ekheleni ra ndzilo lowo kariha.

¹²Kasi, ku ni vanhu va Vayuda, lavo u va leriseke timhaka ta tiko ra Babilona, a nga Xadraka, na Mexaka, na Abedi-Nego; vanhu lava, a va vuri nchumu hi wena, hosi; a va tirheli swikwembu swa wena, kambe a va khinsami emahlweni ka xifaniso xa nsuku lexi u nga xi yimisa.”

¹³Kavaloko Nebukadnetsara a pfuka a kariha, a lerisa leswaku ku tisiwa Xadraka, na Mexaka, na Abedi-Nego, kutani vavanuna valavo va tisiwa emahlweni ka hosi.

¹⁴Nebukadnetsara a vulavula, a ku eka vona: “N'wina, Xadraka, na Mexaka, na Abedi-Nego xana mi endle ha vomu loko mi nga tirheli swikwembu swa mina, mi nga khinsami emahlweni ka xifaniso xa nsuku lexi ndzi xi yimiseke xana?

¹⁵Sweswi, loko mi tilunghisile, hi nkarhi lowu mi yingisaka mpfumawulo wa mhalamhala, ni wa xitiringo, ni wa ritaninga, ni wa haripa, ni wa psalteri, ni wa gupu, ni wa leswi yimbiwaka hinkwaswo, mi khinsama, mi gandzela xifaniso lexi ndzi xi endleke: Loko swi nga ri tano loko mi nga gandzeli, mi ta hoxiwa hi nomu lowu, ekheleni ra ndzilo lowo leva. Kutani xikwembu hi xihi lexi nga ta mi ponisa emavokweni ya mina xana?”

¹⁶Xadraka, na Mexaka na Abedi-Nego va hlamula, va ku eka hosi: “Wee Nebukadnetsara, a hi fanelanga ku ku hlamula nchumu emhakeni leyi.

¹⁷Loko swi nga endleka leswaku Xikwembu xa hina lexi hi xi tirhelaka xi hi ponisa, xi ta hi ponisa ekheleni ra ndzilo lowo leva ni le vokweni ra wena, hosi.

¹⁸Ni loko swi nga ri sweswo, tiva, wena hosi, leswaku hi nga ka hi nga tirheli swikwembu swa wena, hi nga ka hi nga khinsami emahlweni ka xifaniso xa nsuku lexi u xi yimiseke.”

¹⁹Kutani Nebukadnetsara a kariha ngopfu, mombo wa yena wu visukela Xadraka, na Mexaka, na Abedi-Nego; kutani a vulavula, a lerisa leswaku ku tshiveleriwa khele ra ndzilo eka ntlhanu na kambirhi ku tlurisa leswi va tsundzukeke ku tshiverisa swona.

²⁰Kutani a lerisa vavanuna van'wana va nyimpi va yena lava nga ni matimba, ku boha Xadraka, na Mexaka, na Abedi-Nego, ni ku va hoxa ekheleni ra ndzilo lowo leva.

²¹Kutani vanhu valavo va bohiwa va ri ni tihembe ta vona, ni tinguvu ta vona, ni swifunengelo swa vona, ni mikhancu hinkwayo ya vona, va hoxiwa ekheleni ra ndzilo lowo leva.

²²Kutani hikuva ku lerisa ka hosi a ku nonon'hwa, ni leswi khele ri tshiveriweke ku tlurisa ngopfu, malangavi ya ndzilo ma dlaya vanhu lavo va nga hoxa Xadraka, na Mexaka, na Abedi-Nego ekheleni.

²³Kutani vanhu lavanharhu lava, Xadraka, na Mexaka na Abedi-Nego, va wela va bohiwile ekheleni ra ndzilo lowo leva.

²⁴Kavaloko hosi Nebukadnetsara a khomiwa hi ku tshuka, a hatlisa a suka, a yima. A vulavula, a ku eka vatsundzuxi va yena: “A ndzi ku hi hoxile endzilweni vavanuna vanharhu lava bohiweke xana?” Va hlamula va ku eka hosi: “Swi tano, hosi!”

²⁵A engeta a ku: “Vonani, ndzi vona mune wa vanhu va famba exikarhi ka ndzilo va tshunxekile va nga vavisiwanga; kutani nghohe ya lowa vumune yi kotisa ya n'wana wa swikwembu.”

²⁶Kutani Nebukadnetsara a tshinelela ekusuhi ni nomu wa khele ra ndzilo lowo leva, kutani a vulavula, a ku: “Xadraka, na Mexaka, na Abedi-Nego, malandza ya Xikwembu lexi nge henhlahenhla, humani, tanani halenu!” Kutani Xadraka, na Mexaka, na Abedi-Nego va huma exikarhi ka ndzilo.

²⁷Kutani masatrapi, ni valanguteri, ni tindhuna, ni vatsundzuxi va hosi va hlengeletana; kuteloko va langutisisa vanhu lava, va vona leswaku ndzilo a wu vanga na matimba emirini wa vona ni switsongo, ni leswaku nsisi, hambi wu ri wun'we wa tinhloko ta vona, a wu vavukanga, ni loko yi ri mikhancu ya vona a yi hundzukanga ni leswaku risema ra ndzilo a ku ri hava eka yona.

²⁸Kutani Nebukadnetsara a vulavula, a ku: “A ku dzunisiwe Xikwembu xa Xadraka, na Mexaka, na Abedi-Nego lexi rhumeke ntsumi ya xona, xi hlayisile malandza ya xona lama xi tshembeke, lama tluleke ku lerisa ka hosi; va tshiketile miri ya vona leswaku va nga tshuki va tirhela ni ku khongela xikwembu xin'wana, loko xi nga ri Xikwembu xa vona.

²⁹Kutani nawu wu vekiwa hi mina eka vanhu hinkwavo, ni ka matiko hinkwawo, ni ka va tindzimi hinkwato, leswaku munhu la solaka Xikwembu xa Xadraka, na Mexaka, na Abedi-Nego u ta pulukanyisiwa, kutani yindlu ya yena yi ta endliwa tala, hikuva a ku na Xikwembu ximbe lexi nga ponisaka hi mukhuva wolowo.”

³⁰Ku suka enkarhini wolowo, hosi yi humelerisa emahlweni Xadraka, na Mexaka, na Abedi-Nego evukosini bya tiko ra Babilona.