Read Xitsonga Hosea 13 Bible Online

Hosea 13 - Xitsonga bible

Hosea 13

¹Kakuloko Efrayimi a vulavula, ku chava a ku ri kona; u titlakusile eIsraeleni, kambe a tiveka nandzu ha Baali, kutani a fa.

²Kambe ni sweswi, va ha tiyisela ku dyoha; hi silivhere ya vona va tiendlela swifaniso leswi chuluriweke, swi nga swifaniso swa swikwembu hilaha va tianakenyeleke hakona; hinkwaswo leswi, i mitirho ya vafuli. Hikwalaho ka swona va ku: Lava yisaka magandzelo a va ntswontswe marhole!

³Hikwalaho, va ta kotisa hunguva ya mixo, ni mberha leyi sukaka hi ku hatlisa, va fana ni mungu lowu hahisiwaka exivuyeni, ni musi loko wu huma echimeleni.

⁴Kasi mina Yehovha, ndzi Xikwembu xa wena, ka ha ri loko u hume etikweni ra Egipta; kutani handle ka mina u nga ka u nga tivi Xikwembu xin'wana, ni muhanyisi a nga kona, loko ndzi nga ri mina.

⁵Mina, ndzi ku tivile emananga, etikweni leri omeke.

⁶Va xurhile evudyelweni bya vona, kuteloko va xurhile, timbilu ta vona ti tikukumuxa; va ndzi rivele hakona.

⁷Kutani ndzi hundzukile eka vona kukotisa nghala, kukotisa yingwe ndzi ta va rindza endleleni.

⁸Ndzi ta tiwisela ehenhla ka vona ku fana ni bere leyi lahlekeriweke hi vana va yona, ndzi handzula swifuva swa vona, ndzi va dyela kona ku fana ni nghala ya ntswele; swivandzana swa nhova swi ta va handzula.

⁹Leswi ku lahlaka, wena Israele hi loko u tiendle nala eka mina, eka loyi a ku pfunaka.

¹⁰Yi kwihi hosi ya wena? A yi ku hanyise emitini hinkwayo ya wena! Ni vaavanyisi va wena va kwihi? Kasi hi lava u nga vula ha vona, u ku: “Ndzi nyike hosi ni tindhuna!”

¹¹Ndzi ku nyikile hosi evukarini bya mina, kutani ndzi ta yi susa eku kariheni ka mina.

¹²Ku boheleriwe ku dyoha ka Efrayimi, ni xivi xa yena xi hlayisiwile.

¹³Ku vaviseka ka mbeleko ku ta n'wi humelela. Yeloyi i n'wana wa xihunguki, hikuva a nga tihumelerisi enkarhini wa kona, leswaku a tswariwa.

¹⁴Ndzi ta va kutsula exivandleni xa vafi ndzi va lamulela eku feni. Wena, rifu, ndzhombo wa wena wu kwihi? Wena, sirha, ku hlula ka wena ku kwihi? A ndzi voni hilaha ndzi nga hundzukaka hakona!

¹⁵Ni loko Efrayimi a veka mihandzu exikarhi ka vamakwavo, moya wa vuxa wu hunga, mheho ya Yehovha yi pfa emananga: ku ta phya xihlovo xa yena, miseledyana ya yena yi ta oma. Ku ta phangiwa xuma xa mitirho hinkwayo ya yena leyi pfumariwaka.

¹⁶Samariya u ta tshinyiwa hikuva u tiarisile eka Xikwembu xa yena. Va ta dlawa hi fumu; tirisana ta vona ti ta fayiwa, ni vasati va vona lava tikeke va ta handzuriwa.