Read Xitsonga Hosea 8 Bible Online

Hosea 8 - Xitsonga bible

Hosea 8

¹Veka nanga enon'wini wa wena. Xirha xi haha kukotisa gama, xi wela ehenhla ka yindlu ya Yehovha hikuva va tlule ntwanano wa mina va hundzukele milawu ya mina.

²Va ta huwelela eka mina, va ku: “Xikwembu xa hina, hina, Israele, hi ku tivile!”

³Israele u sandze leswi lulameke, xirha xi ta n'wi landzelela.

⁴Vona va vekile tihosi, kambe ku nga ri hi ku lerisa ka mina; va veke tindhuna, kasi a ndzi swi tivi. Hi nsuku wa vona, ni silivhere ya vona va tiendlele swifaniso, va kondza va herisiwa.

⁵Rhole ra wena, Samariya, ra ndzi nyenyetsa! Vukari bya mina bya va pfurhela. Va ta ala ku tibasisa ku yisa kwihi?

⁶Hikuva lero ri hume eka Israele; ri endliwe hi mufuri, a hi Xikwembu; rhole ra Samariya ri ta pfotlotiwa.

⁷Va byala moya, kambe va ta tshovela xidzedze. Mavele, wona, a ma nga vi kona; nchocho wu nga ka wu nga veki swakudya, ni loko wu nga veka, swi ta dyiwa hi vamatiko.

⁸Israele u mitiwile; exikarhi ka matiko, va kotisa mbita leyi nga rhandziwiki.

⁹Hikuva vona va ye eAsiriya. Hanci, yona, yi tisalela yi ri yoxe; kambe Efrayimi u tilavela lava n'wi rhandzaka hi tinyiko.

¹⁰Hambiloko va rhumela tinyiko exikarhi ka matiko, ndzi ta va hlengeleta kona, va ta sungula ku tsana hi ku tikeriwa hi hosi ya tihosi tin'wana.

¹¹Hikuva Efrayimi u tiyisile ku aka tialitari hi ku dyoha, tialitari ti ta n'wi dyohisa.

¹²Hambi ndzi n'wi tsalerile leswo tala swa milawu ya mina, va yi endle xilo lexi nga tivikaniki.

¹³Va ri va endla magandzelo, swi va switlhavelo swa mina; e-e, va tlhavela ku dya nyama ntsena; Yehovha a nga tsakisiwi hi vona. Sweswi, u ta tsundzuka ku homboloka ka vona, a avanyisa swidyoho swa vona; vona va ta tlhelela eEgipta.

¹⁴Israele u rivele muvumbi wa yena, kutani u akile tindlu ta vuhosi; na Yuda u andzisile ku aka miti leyi biyiweke; kambe ndzi ta rhuma ndzilo emitini ya vona, wu hisa tindlu ta vona ta vuhosi.