Read Xitsonga Hosea 9 Bible Online

Hosea 9 - Xitsonga bible

Hosea 9

¹U nga tsaki, Israele, hi ku tsakisisa kukotisa matiko, hikuva u sukele Xikwembu xa wena hi ku oswana kutani u rhandzile hakelo ya vuoswi eswivuyeni hinkwaswo swa koro.

²Swivuya ni swikhuvutelo swi nga ka swi nga va xurhisi, ni vhinyo, yi ta kanganyisa ku langutela ka vona.

³Va nga ka va nga hlweri etikweni ra Yehovha; Efrayimi u ta tlhelela eEgipta, ni le tikweni ra Asiriya, va ta dya leswa thyaka.

⁴A va nga ha cheleri Yehovha vhinyo, kutani magandzelo ya vona a ma nga ha n'wi tsakisi; swakudya swa vona swi ta va eka vona kukotisa swakudya swa nkosi, hinkwavo lava swi dyaka va hundzuka thyaka, hikuva swakudya swa vona swi ta va swa vona ntsena, swi nga ka swi nga ngheni endlwini ya Yehovha.

⁵Mi ta endla yini hi siku leri hlawulekeke, hi siku ra nkhuvo wa Yehovha xana?

⁶Hikuva va ta rhurha hikwalaho ka ku onhaka; Egipta u ta va hlengeleta; Memfisi a va yimbela. Swilo leswinene swa vona swa silivhere, swi ta funengetiwa hi swigatlu, mahlwehlwe ma mila ematendeni ya vona.

⁷Masiku ya xikambelo ma fikile; masiku yo rihisela ma fikile! Israele u ta swi tiva! Muprofeta u hundzukile xihunguki, munhu wa moya u hlanya hikwalaho ka vukulu bya ku dyoha ka wena, ni hikwalaho ka vulala bya wena lebyikulu.

⁸Efrayimi u tumbelele Xikwembu xa mina. Muprofeta, i xirimbana xa muhloti, xi le tindleleni ta yena hinkwato; ni vulala endlwini ya Xikwembu xa yena.

⁹Va tionhile ni ku tionha, kukotisa siku ra Gibeya. Xikwembu xi ta tsundzuka makhombo ya vona, xi tshinya swidyoho swa vona.

¹⁰Ndzi kume Israele a ri eka mina kukotisa mihandzu ya vhinya leyi kumiwaka emananga; ndzi vonile vatata wa n'wina kukotisa swirhangana swa nkuwa lowu sungulaka ku veka. Kasi vona va ye Baala-Peyori, va tihlawulela leswa tingana, va va va hundzuka manyala kukotisa swigangu swa vona.

¹¹Ku vonakala ka Efrayimi ku ta hahela kwale kukotisa nyanyana; a ku nga ha vi mutswari, ni loko a ri mutiki, ni la an'wisaka.

¹²Kambe, ni loko va kurisa vana va vona, ndzi ta va tekela vona va nga si kula. Ina, va ni khombo vona, siku ndzi va fularhelaka!

¹³Loko a ri Efrayimi, ndzi n'wi languta hi le kule, ku fika eTiri, u tlhomiwile exitsungeni lexinene, kasi Efrayimi u ta humesa vana va yena eka loyi a va dlayaka.

¹⁴Va nyike, Yehovha! ... U ta va nyika yini? ... U va nyika tinyimba leti humaka ni mavele lama omeleleke!

¹⁵Vumbabva bya vona hinkwabyo byi le Giligala; hikuva hi kona ndzi va vengeke, Hikwalaho ka ku biha ka ku famba ka vona, ndzi ta va hlongola endlwini ya mina. A ndzi nga ha tshami ndzi va rhandza, tihosi ta vona hinkwato i vatiarisi.

¹⁶Efrayimi u biwile; timitsu ta vona ti omile; a va nga ha veki mihandzu; hambi va nga tswala, ndzi ta dlaya vana va vona lava rhandziwaka.

¹⁷Xikwembu xa mina xi ta va cukumeta, hikuva a va swi twanga, kutani va ta va vatsendzeleki exikarhi ka matiko.