Read Xitsonga Amos 5 Bible Online

Amos 5 - Xitsonga bible

Amos 5

¹Yingisani rito leri ndzi mi yimbelelaka ha rona mahlomulo, n'wina va yindlu ya Israele:

²“U wile, wanhwana wa Israele a nga ha tlheli a yima, u tlatlalatiwile ehansi, a ku na la n'wi pfuxaka.”

³Hikuva Hosi Yehovha u ri: “Muti lowu ngi wu humesela yindlu ya Israele khume ra madzana ya valwi, wu ta salelwa hi dzana ntsena, ni lowu ngi wu humesela va dzana, wu ta salelwa hi khume.”

⁴Hikuva Yehovha u te eka yindlu ya Israele: “Ndzi laveni, kutani mi ta hanya.

⁵“Mi nga tshuki mi lava Betele, mi nga tshuki mi ya eGiligala, mi nga tshuki mi hundzela eBerexeba; hikuva Giligala u ta yisiwa evukhumbini, Betele a endliwa swahava.”

⁶Lavani Yehovha, mi ta hanya, leswaku a nga tshuki a wela yindlu ya Yosefa tanihi ndzilo, kutani ndzilo wolowo wu herisa Betele, ku nga ri na munhu la wu timaka.

⁷N'wina lava dyisaka mbitsi eku avanyiseni ka n'wina, mi wisela vunene ehansi;

⁸kasi hi yena la endleke Xirimela ni Nhlahle; la hundzuluxaka munyama wu endla ku vonakala ka mixo, ninhlekanhi wu hundzuka munyama; u vitana mati ya lwandle, kutani u ma chululela ehenhla ka misava; Yehovha i vito ra yena.

⁹U pfukela lowa matimba ku onhaka, kutani ku onhaka ku fikela muti wa matimba.

¹⁰Va venga la tsundzuxaka ehubyeni, va yila lava vulavulaka hi ku lulama.

¹¹Hikwalaho, leswi mi kandziyelaka lontsongo, mi teka koro ya yena hi nsele; hambiloko mi akile tindlu hi maribye lama vatliweke, mi nga ka mi nga tshami eka tona; ni loko mi simekile tivhinya leto saseka, mi nga ka mi nga nwi vhinyo ya tona.

¹²Hikuva ndza swi tiva leswaku ku dyoha ka n'wina ku tele ni leswaku swidyoho swa n'wina swi andzile ngopfu; mi xanisa la lulameke, mi amukela swo yimela lavo biha ha swona, kutani vapfumari a mi va avanyiseri ehubyeni.

¹³Hikwalaho lowo tlhariha wa timiyelela emikarhini leyi, hikuva i mikarhi leyo biha.

¹⁴Lavani leswinene, swi nga ri leswo biha, leswaku mi ta hanya; leswaku Yehovha, Xikwembu xa tinyimpi u ta va na n'wina, hilaha mi vulaka hakona.

¹⁵Vengani leswo biha, mi rhandza leswinene, mi tiyisa leswi lulameke ehubyeni, kumbexana Yehovha, Xikwembu xa tinyimpi a nga tsetselela masalela ya Yosefa.

¹⁶Hikwalaho, ku vula Yehovha Xikwembu xa tinyimpi, yena Hosi: “Swirilo swi ta va kona eswivandleni hinkwaswo, kutani va ta huwelela emitsendzeleni hinkwayo, va ku: ‘Yoo! Yoo!’ Murimi u ta vitaneriwa ku rila, ni lava tivaka tinsimu ta mahlomulo va vitaneriwa mikosi.

¹⁷Emasin'wini hinkwawo ya tivhinya swirilo swi ta va kona, hikuva ndzi ta hundza exikarhi ka wena,” ku vula Yehovha.

¹⁸Mi ni khombo n'wina lava navelaka siku ra Yehovha! Siku ra Yehovha mi ri navelela yini? Ku ta va munyama, ku nga ri ku vonakala.

¹⁹Swi ta kota munhu loko a balekela nghala, kutani a hlangana ni bere; a nghena endlwini, a tiseketela hi voko ra yena ekhumbini, kutani a lumiwa hi nyoka!

²⁰Andziri siku ra Yehovha ri ta va munyama, ku nga ri ku vonakala? Ri va ni ntima wa vusiku, ku nga ri ku vonakala ka nhlekanhi?

²¹“Ndzi vengile, na swona ndza tsan'wa mikhuvo ya n'wina, a ndzi rhandzi ku nun'hwa ka leswi tlhaviwaka etinhlengeletanweni ta n'wina.

²²Hambi mi ndzi humesela leswi hisiwaka ni tinyiko ta n'wina, a ndzi swi tsakeri, ni loko ma ri magandzelo ya leswi noneke swa n'wina, a ndzi ma languti.

²³Susani huwa ya tinsimu ta n'wina kule na mina, ndzi nga ka ndzi nga yingiseri mpfumawulo wa magubu ya n'wina;

²⁴kambe ku avanyisa a ku khuluke tanihi mati, ni ku lulama tanihi nambu lowu nga phyiki.

²⁵“Xana loko mi ri emananga mi ndzi humesele magandzelo ni timhamba hi mune wa makume ya malembe n'wina, yindlu ya Israele xana?

²⁶E-e, kambe a mi rhwele tende ra hosi ya n'wina, ni swifaniso swa n'wina, nyeleti ya swikwembu leswi mi tiendleleke swona.

²⁷Hikwalaho ndzi ta mi yisa evukhumbini, halahaya ka Damaska,” ku vula Yehovha, loyi vito ra yena a nga Xikwembu xa tinyimpi.