Read Xitsonga Numbers 1 Bible Online

Numbers 1 - Xitsonga bible

Numbers 1

¹Yehovha a byela Muxe loko a ri emananga ya Sinayi, etabernakeleni ya nhlengeletano, hi siku ro rhanga ra n'hweti ya vumbirhi, hi lembe ra vumbirhi ra ku huma ka vona etikweni ra Egipta, a ku:

²“Hlayani vana hinkwavo va Israele, mi ya hi tindlu ta vona, ni swivongo swa vatata wa vona, mi hlaya mavito ya vavanuna hinkwavo hi tinhloko ta vona,

³ku sungula hi va malembe ya 20 ni lava tlulaka, mi hlaya, wanuna un'wana ni un'wana la hlomaka eIsraeleni; u ta hlaya ntsengo wa vona hi mavandla ya vona, u ri na Aroni;

⁴ku ta huma na n'wina wanuna wa nyimba yin'wana ni yin'wana, yi nga hosi ya yindlu ya vatata wa yena.”

⁵Hi wona mavito ya vavanuna lava nga ta mi pfuna: Enyimbeni, ya Rhuveni, Elizuri, n'wana Xedewuru;

⁶ya Simiyoni, Xelumiele, n'wana Suri-Xadayi;

⁷ya Yuda, Nahaxoni, n'wana Aminadaba;

⁸ya Isakara, Netanele, n'wana Suwara;

⁹ya Zebuloni, Eliyabu, n'wana Heloni;

¹⁰ya vana va Yosefa: ya Efrayimi, Elixama n'wana Amihudi; ya Manase, Gamaliele, n'wana Pedasuru;

¹¹ya Benjamini, Abidana, n'wana Gidiyoni;

¹²ya Dani, Ahiezere, n'wana Amixadayi;

¹³ya Asere, Pagiele, n'wana Okirani;

¹⁴ya Gadi, Eliyasafa, n'wana Duwele;

¹⁵ya Neftali, Ahira, n'wana Enana.

¹⁶Hi vona lava nga vitaniwa enhlengeletanweni, ti ri tihosi ta tinyimba ta vatata wa vona; hi tona tihosi ta madzanadzana ya Israele.

¹⁷Muxe na Aroni va teka vavanuna valavo lava hlayiweke hi mavito ya vona,

¹⁸kutani hi siku ro rhanga ra n'hweti ya vumbirhi, va hlengeleta nhlengeletano hinkwayo, va tsariwa hi tindlu ta vona ni tinyimba ta vona, va ri karhi va hlaya mavito hi tinhloko ku sungula hi va malembe ya 20 ni lava tlulaka,

¹⁹hilaha Yehovha a leriseke Muxe hakona; a va hlaya emananga ya Sinayi.

²⁰Vana va Rhuveni, mativula ya Israele, vatukulu va vona hi tindlu ta vona, ni tinyimba ta vona, loko va hlaya mavito hi tinhloko, vavanuna hinkwavo, ku sungula hi va malembe ya 20, ni lava tlulaka, va ri vavanuna hinkwavo lava hlomaka:

²¹lava tsariweke va nyimba ya Rhuveni, a va ri 46 500.

²²Vana va Simiyoni, vatukulu va vona hi tindlu ta vona, ni tinyimba ta tona, lava tsariweke hi ku hlaya mavito ya vavanuna hinkwavo hi tinhloko ta vona, ku sungula hi va malembe ya 20, ni lava tlulaka, va ri vavanuna hinkwavo lava hlomaka:

²³lava tsariweke va nyimba ya Simiyoni, a va ri 59 300.

²⁴Vana va Gadi, vatukulu va vona hi tindlu ta vona ni tinyimba ta vona, loko va hlaya mavito ya vavanuna hinkwavo lava hlomaka ku sungula hi va malembe ya 20 ni lava tlulaka,

²⁵lava tsariweke va nyimba ya Gadi, a va ri 45 650.

²⁶Vana va Yuda, vatukulu va vona hi tindlu ta vona, ni tinyimba ta vona, lava tsariweke hi ku hlaya mavito ya vavanuna hinkwavo lava hlomaka, ku sungula hi va malembe ya 20, ni lava tlulaka;

²⁷lava tsariweke va nyimba ya Yuda a va ri 74 600.

²⁸Vana va Isakara, vatukulu va vona hi tindlu ta vona, ni tinyimba ta vona, loko va hlaya mavito ya vavanuna hinkwavo lava hlomaka, ku sungula hi va malembe ya 20 ni lava tlulaka;

²⁹lava tsariweke va nyimba ya Isakara a va ri 54 400.

³⁰Vana va Zebuloni, vatukulu va vona hi tindlu ta vona, ni tinyimba ta vona, loko va hlaya mavito ya vavanuna hinkwavo lava hlomaka, ku sungula hi va malembe ya 20, ni lava tlulaka;

³¹lava tsariweke va nyimba ya Zebuloni a va ri 57 400.

³²Vana va Yosefa: vana va Efrayimi, vatukulu va vona hi tindlu ta vona, ni tinyimba ta vona, loko va hlaya mavito ya vavanuna hinkwato lava hlomaka, ku sungula hi va malembe ya 20, ni lava tlulaka;

³³lava tsariweke va nyimba ya Efrayimi, a va ri 40 500.

³⁴Vana va Manase, vatukulu va vona hi tindlu ta vona, ni tinyimba ta vona, loko va hlaya mavito ya vavanuna hinkwavo lava hlomaka ku sungula hi va malembe ya 20 ni lava tlulaka;

³⁵lava tsariweke va nyimba ya Manase a va ri 32 200.

³⁶Vana va Benjamini, vatukulu va vona hi tindlu ta vona ni tinyimba ta vona, loko va hlaya mavito ya vavanuna hinkwavo lava hlomaka ku sungula hi va malembe ya 20, ni lava tlulaka;

³⁷lava tsariweke va nyimba ya Benjamini a va ri 35 400.

³⁸Vana va Dani, vatukulu va vona hi tindlu ta vona, ni tinyimba ta vona, loko va hlaya mavito ya vavanuna hinkwavo lava hlomaka, ku sungula hi va malembe ya 20, ni lava tlulaka;

³⁹lava tsariweke va nyimba ya Dani a va ri 62 700.

⁴⁰Vana va Asere, vatukulu va vona hi tindlu ta vona, ni tinyimba ta vona, loko va hlaya mavito ya vavanuna hinkwavo lava hlomaka, ku sungula hi va malembe ya 20, ni lava tlulaka;

⁴¹lava tsariweke va nyimba ya Asere a va ri 41 500.

⁴²Vana va Neftali, vatukulu va vona hi tindlu ta vona, ni tinyimba ta vona, loko va hlaya mavito ya vavanuna hinkwavo lava hlomaka, ku sungula hi va malembe ya 20, ni lava tlulaka;

⁴³lava tsariweke va nyimba ya Neftali, a va ri 53 400.

⁴⁴Hi vona lava tsariweke i Muxe na Aroni va ri ni vavanuna va 12 ti nga tihosi ta Israele; wanuna un'we wa nyimba yin'wana ni yin'wana ya vatata wa vona.

⁴⁵Hinkwavo vana va Israele lava tsariweke hi tindlu ta vatata wa vona, ku sungula hi va malembe ya 20, ni lava tlulaka, va ri vavanuna hinkwavo lava hlomaka;

⁴⁶ntsengo hinkwawo wa vona lava tsariweke a va ri 603 550.

⁴⁷Loko va ri vana va Levhi, hi nyimba ya tata wa vona, a va tsariwanga na vona.

⁴⁸Yehovha a byela Muxe, a ku:

⁴⁹“Loko yi ri nyimba ya Levhi ntsena, u nga tsali tinhloko ta vona exikarhi ka vana va Israele.

⁵⁰U ta veka emavokweni ya vana va Levhi yindlu ya vumbhoni ni swibya hinkwaswo swa yona, ni hinkwaswo swa yona. Va ta rhwala yindlu ni swingolongondzwana hinkwaswo swa yona; va ta tirha ntirho wa yona, kambe va ta gova ekusuhi ni yindlu hi ku yi rhendzela.

⁵¹Kutakuloko yindlu yi suka, Valevhi va ta yi hlanhla, ni loko yindlu yi yima, Valevhi va ta yi dzima; kambe wamatiko la nga ta yi tshinelela u ta dlawa.

⁵²“Vana va Israele va ta gova un'wana ni un'wana exivandleni xa yena, ekusuhi ni mfungho wa yena hi mitlawa ya vona.

⁵³Kambe Valevhi va ta gova ekusuhi ni yindlu ya vumbhoni, va yi rhendzela, leswaku vukari bya mina byi nga tshuki byi pfurhela nhlengeletano ya vana va Israele; kutani Valevhi va ta langutela yindlu ya vumbhoni.”

⁵⁴Vana va Israele va endla hinkwaswo hilaha Yehovha a leriseke Muxe hakona; va endlisa sweswo.