Read Xitsonga Numbers 10 Bible Online

Numbers 10 - Xitsonga bible

Numbers 10

¹Yehovha a byela Muxe, a ku:

²“Tiendlele tinanga timbirhi ta silivhere u ti endla hi silivhere leyi furiweke. U ta tirha ha tona ku vitana nhlengeletano, ni ku simurisa mitsonga.

³Kungakuloko va yimba tona, nhlengeletano hinkwayo yi ta ta eka wena enyangweni ya tabernakela ya nhlengeletano.

⁴Kutakuloko va yimba nanga yin'we ntsena, ku ta hlengeletana eka wena tihosi leti nga tindhuna ta mavandla ya Israele.

⁵“Kungakuloko mi yimba hi matimba, mixaxa leyi yimaka evuxeni yi ta suka.

⁶Kungakuloko mi yimba hi matimba ra vumbirhi, mixaxa leyi yimaka edzongeni yi ta suka. Ku ta yimbiwa hi matimba eku sukeni.

⁷Kutakuloko mi vitana nhlengeletano, mi ta yimba nanga, kambe ku nga ri hi matimba.

⁸I vaprista, vana va Aroni lava nga ta yimba tinanga. Ku ta va ku lerisa loku nga heriki eka n'wina ni ka vatukulu va n'wina.

⁹“Kutakuloko mi huma nyimpi etikweni ra n'wina ku ya lwa ni valala va n'wina, loko va mi pfuka mi ta yimba tinanga hi matimba kutani mi ta tsundzuxiwa emahlweni ka Yehovha, Xikwembu xa n'wina mi va mi ponisiwa emavokweni ya valala va n'wina.

¹⁰Emasikwini ya ku tsaka ka n'wina, ni le mikhubyeni ya n'wina, ni le ku sunguleni ka tin'hweti, mi ta yimba tinanga mi ri karhi mi humesa tiholokosta, ni magandzelo ya n'wina ya ku khensa, swi ta va xitsundzuxo emahlweni ka Xikwembu xa n'wina. Hi mina Yehovha, Xikwembu xa n'wina.”

¹¹Kute hi lembe ra vumbirhi, hi n'hweti ya vumbirhi, hi siku ra 20 papa ri suka ehenhla ka Yindlu ya vumbhoni.

¹²Kutani vana va Israele va suka emananga ya Sinayi, va famba hi mimpfhuka ya vona kutani papa ri ya yima emananga ya Parani.

¹³Va suka leswo rhanga hi nomu wa Yehovha, hilaha a leriseke Muxe hakona.

¹⁴Mfungho wa nxaxa wa Yuda wu suka eku sunguleni, va suka hi mavandla ya vona; vandla ra Yuda ri fambisiwa hi Nahaxoni, n'wana Aminadaba;

¹⁵vandla ra nyimba ya vana va Isakara, hi Netanele, n'wana Suwara;

¹⁶vandla ra nyimba ya vana va Zebuloni, hi Eliyabu, n'wana Heloni.

¹⁷Yindlu yi hlanhliwa, kutani vana va Gerixoni, ni vana va Merari va suka, va rhwele yindlu.

¹⁸Mfungho wa nxaxa wa Rhuveni wu suka hi mavandla ya vona: vandla ra Rhuveni ri fambisiwa hi Elizuri, n'wana Xedewuru;

¹⁹vandla ra nyimba ya vana va Simiyoni hi Xelumiele, n'wana Suri-Xadayi;

²⁰vandla ra nyimba ya vana va Gadi, hi Eliyasafa, n'wana Duwele.

²¹Kutani va Kohata, lava rhwalaka swilo leswi hlawuriweke va suka, kutani van'wana va yimisa Yindlu, va ko va fika.

²²Mfungho wa nxaxa wa vana va Efrayimi wu suka hi mavandla ya vona: vandla ra Efrayimi ri fambisiwa hi Elixama, n'wana Amihudi;

²³vandla ra nyimba ya vana va Manase hi Gamaliele, n'wana Pedasuru;

²⁴vandla ra nyimba ya vana va Benjamini hi Abidana, n'wana Gidiyoni.

²⁵Mfungho wa nxaxa wa vana va Dani wu suka, wu famba endzhaku ka mixaxa hinkwayo, hi mavandla ya vona: vandla ra Dani ri fambisiwa hi Ahiezere, n'wana Amixadayi;

²⁶vandla ra nyimba ya vana va Asere hi Pagiele, n'wana Okirani;

²⁷vandla ra nyimba ya vana va Neftali hi Ahira, n'wana Enana.

²⁸Hi wona mafambele ya vana va Israele hi tinyimba ta vona; kutani va suka.

²⁹Muxe a ku eka Hobabu, n'wana Rhuwele, wa Midiyani, mukon'wana wa Muxe: “Ho famba ku ya etikweni leri Yehovha a nga vula loko a te: ‘Ndzi ta mi nyika rona.’ Famba na hina, hi ta ku endlela swinene, hikuva Yehovha u hlayele Israele leswinene.”

³⁰Hobabu a ku eka yena: “Ndzi nga ka ndzi nga yi, kambe ndzi ta ya etikweni ra mina ni le ka varikwerhu.”

³¹Muxe a ku: “U nga hi tshiki, ndza ku khongela, hikuva wa tiva mimpfhuka ya hina emananga, u ta va mahlo ya hina.

³²Kutakuloko u famba na hina, swinene leswi Yehovha a nga ta hi endlela swona, hi ta avelana na wena.”

³³Kavaloko va suka entshaveni ya Yehovha, va famba ndlela ya masiku manharhu, areka ya ntwanano wa Yehovha yi ri karhi yi famba emahlweni ka vona endlela ya masiku manharhu, yi ya va lavela xivandla xa ku wisa.

³⁴Papa ra Yehovha a ri ri ehenhla ka vona ninhlekanhi eku sukeni ka vona emixaxeni.

³⁵Eku sukeni ka areka, Muxe a a ku: “Pfuka, Yehovha! Valala va wena a va hangalasiwe, lava ku vengaka a va hlongorisiwe emahlweni ka wena.”

³⁶Ni le ku vekiweni ka yona, a a ku: “Vuya, Yehovha, eka madzana ya madzana ya Israele.”