Read Xitsonga Numbers 11 Bible Online

Numbers 11 - Xitsonga bible

Numbers 11

¹Tiko ri sungula ku n'unun'uta etindleveni ta Yehovha. Kuteloko Yehovha a swi twa, ku kariha ka Yehovha ku pfurha, kutani ndzilo wa Yehovha wu pfurha exikarhi ka vona, wu heta vanhu emakun'wini ya mixaxa.

²Kavaloko tiko ri huwelela eka Muxe; Muxe a khongela Yehovha, kutani ndzilo wu timeka,

³va thya xivandla lexi vito ra Tabera (ku hisa) hikuva ndzilo wa Yehovha a wu pfurhile exikarhi ka vona.

⁴Kutani vunyingi bya valuveri lava nga exikarhi ka vona, va khomiwa hi ku navela; na vona vana va Israele va engeta va rila, va ku: “I mani la nga ta hi nyika nyama, hi dya?

⁵Ha tsundzuka tinhlampfi leti hi tshamaka hi ti dya ntsena eEgipta, ni marhanga, ni makalavatla, ni tinyala, ni swinyalanyana.

⁶Sweswi timbilu ta hina ti omile; hi kala hinkwaswo; mahlo ya hina ma vona manna ntsena.”

⁷Manna a yi fana ni timbewu ta khoriyanda, nghohe ya yona a yi kotisa nghohe ya bedelium.

⁸Vanhu a va hangalaka va ya rholela yona; a va yi sila hi xisilo, kumbe va yi kandza entshurini; a va yi sweka embiteni; va endla ni swimbundzu; ku nandziha ka yona ku fana ni ku nandziha ka swimbundzu leswi swekiweke hi mafurha.

⁹Kuteloko mberha yi wele emisaveni nivusiku, na yona manna yi wela kona.

¹⁰Muxe a yingisa tiko loko ri rila emindyangwini hinkwayo, un'wana ni un'wana a ri enyangweni ya ntsonga wa yena. Kutani Yehovha a kariha ngopfu; kambe Muxe a twa ku vaviseka.

¹¹Kutani Muxe a ku eka Yehovha: “U vavisela yini nandza wa wena, a ku ndzi twelanga vusiwana ha yini, leswi u ndzi tikeriseke hi ndzhwalo wa tiko leri hinkwaro?

¹²Xana ndzi tikile ndzi ni nyimba ya tiko leri hinkwaro, xana? Kumbe xana ndzi ri tswarile, leswi u nga te eka mina: ‘Ri veleke hilaha muveleki a velekaka n'wana loyi a n'wi an'wisaka,’ ku fika etikweni leri u ri tshembiseke vatata wa vona?

¹³Ndzi ta kuma kwihi nyama ndzi yi nyika tiko hinkwaro leri xana? Hikuva va rila endzhaku ka mina, va ku: ‘Hi nyike nyama hi dya.’

¹⁴A ndzi swi koti ku rhwala tiko leri hinkwaro ndzi ri swanga hikuva ra ndzi hlula.

¹⁵Loko u ndzi endlisa sweswo, ndzi dlaye, ndza khongela, loko u ndzi twela vusiwana, ndzi dlaye, ndzi nga tshuki ndzi vona khombo ra mina.”

¹⁶Kutani Yehovha a ku eka Muxe: “Ndzi hlengeletele vavanuna va 70, vakulukumba va Israele, lava u va tivaka leswaku vakulu va tiko, ni vanhu lava vulavulaka timhaka; u va tisa etabernakeleni ya nhlengeletano va ta yima kona na wena.

¹⁷Ndzi ta xika, kutani ndzi ta vulavula na wena kona; ndzi ta pambula moya lowu nga eka wena, ndzi wu veka ehenhla ka vona, va ta rhwala na wena ndzhwalo wa tiko, u nga tshuki u wu rhwala u ri wena ntsena.

¹⁸U ta byela vanhu va tiko, u ku: ‘Tibasiseleni siku ra mundzuku, mi ta dya nyama, leswi mi nga rila etindleveni ta Yehovha, mi ku: “I mani la nga ta hi dyisa nyama? Hikuva a hi tsakile eEgipta.” Yehovha u ta mi nyika nyama, mi dya.

¹⁹Mi nga ka mi nga dyi siku rin'we ntsena, hambi masiku mambirhi, hambi masiku manharhu, hambi masiku ya ntlhanu, hambi masiku ya khume, hambi masiku ya makume mambirhi;

²⁰kambe mi ta dya n'hweti hinkwayo, yi ko yi huma etinhompfini ta n'wina, mi yi nyenya, hikuva mi sandzile Yehovha la nga exikarhi ka n'wina; mi va mi rila emahlweni ka yena, mi ku: “Hi humele yini-ke eEgipta?” ’ ”

²¹Muxe a ku: “Tiko leri ndzi nga exikarhi ka rona ri ni vavanuna va 600 000, kutani wena u ri, ‘Ndzi va nyika nyama, va dya n'hweti yi ko yi hela.’

²²Xana va ta tlhaveriwa tinyimpfu ni tihomu, va ko va xurha, kumbe xana va ta hlengeleteriwa tinhlampfi hinkwato ta lwandle va ko va xurha-ke?”

²³Yehovha a ku eka Muxe: “Xana voko ra Yehovha ri komile xana? U ta vona sweswi kumbe rito ra mina ri ta endleka, kumbe a ri nga endleki.”

²⁴Muxe a huma, a ya byela tiko marito ya Yehovha, kutani a hlengeleta vakulukumba va 70 va tiko, a va veka va rhendzela tabernakela.

²⁵Kutani Yehovha a xika epapeni, a vulavula na Muxe, kutani a pambula Moya lowu nga ehenhla ka yena, a wu veka ehenhla ka vakulukumba va 70. Kuteloko Moya wu tshamile ehenhla ka vona, va bvumbha, kambe a va tlhelanga va engeta.

²⁶Vavanuna vambirhi a va sele emixaxeni; vito ra un'wana a a ri Elidada, ra un'wana Medada, kutani Moya wu tshame ehenhla ka vona; a va ri lava tsariweke, kambe a va nga humanga ku ya etabernakeleni, kutani a va bvumbha emixaxeni.

²⁷Jaha rin'wana ri tsutsuma, ri ya byela Muxe, ri ku: “Elidada na Medada va ri karhi va bvumbha emixaxeni.”

²⁸Kavaloko Yoxuwa, n'wana Nuni, nandza wa Muxe ku sukela evuhlangini bya yena, a vulavula, a ku eka Muxe: “Hosi yanga, va tshimbise!”

²⁹Muxe a ku eka yena: “Xana u ni ritsimbo hikwalaho ka mina, xana? Mawako loko tiko hinkwaro ra Yehovha ri bvumbha ni loko Yehovha a veke moya wa yena ehenhla ka vona!”

³⁰Kutani Muxe a tlhela emixaxeni a ri ni vakulukumba va Israele.

³¹Kutani Yehovha a hungisa mheho, yi byisa switsatsatsa leswi humaka etlhelo ra lwandle, yi swi wisa emixaxeni ni matlhelo hinkwawo ya mixaxa, ku ringanisa mpfhuka wa siku rin'we, swi rhendzela mixaxa; swi lava ku ringanisa swisungunhu swimbirhi emisaveni.

³²Kutani tiko ri pfuka siku leri hinkwaro, ni vusiku hinkwabyo, ni siku hinkwaro leri tlhandlamaka, ri hlengeleta switsatsatsa; la nga swi hlengeleta swi nga ri swingani, a tatile tihomere ta khume va tianekela swona ehandle ka mixaxa.

³³Kakuloko nyama ya ha ri emenweni ya vona, yi nga si mitiwa, vukari bya Yehovha byi pfurhela tiko, kutani Yehovha a ba tiko hi khombo lerikulu ngopfu.

³⁴Kutani va thya xivandla lexi vito ra Kibroti-Hatavha, hileswaku sirha ra ku navela, hikuva va lahlile kona vanhu lava nga navela.

³⁵Tiko ri suka eKibroti-Hatavha, kutani ri famba ku ya fika eHaseroti, kutani ri tshama eHaseroti.