Read Xitsonga Numbers 15 Bible Online

Numbers 15 - Xitsonga bible

Numbers 15

¹Yehovha a byela Muxe, a ku:

²“Byela vana va Israele, u ku eka vona: ‘Kutakuloko mi nghenile etikweni leri mi nga ta aka eka rona, leri ndzi mi nyikaka,

³loko mi humesela Yehovha gandzelo leri hisiwaka, hambi yi ri holokosta, hambi ri ri gandzelo ro tiyisa rito ra ku hlambanya, hambi yi ri nyiko ya ku tirhandzela ka n'wina, hambi ku ri emikhubyeni ya n'wina; loko mi rhandza ku humesela Yehovha risema leri nun'hwelaka, exikarhi ka swifuwo leswikulu kumbe leswitsongo:

⁴la nga ta humesela Yehovha nhlengo wa yena, u ta humesa nhlengo wa ku avanyisa ka vukhume bya mapa layo saseka, lama pfuviweke hi ku avanyisa ka vumune bya hini ya mafurha,

⁵ni vhinyo ya ku avanyisa ka vumune bya hini ku endla vucheleto; u ta swi humesa xin'we ni holokosta, kumbe ni gandzelo ra xinyimpfana xin'wana ni xin'wana.

⁶Loko ri ri khuna, u ta humesa nhlengo wa ku avanyisa kambirhi ka vukhume bya mapa ya ku saseka lama pfuviweke hi ku avanyisa ka vunharhu bya hini ya mafurha,

⁷ni ku avanyisa ka vunharhu bya hini ya vhinyo ya vucheleto, u ta swi humesa ri va risuna eka Yehovha.

⁸“ ‘Loko u humesa nkunzi ya ku endla holokosta, kumbe gandzelo ra ku tiyisa rito ra ku hlambanya, kumbe gandzelo ra ku khensa Yehovha,

⁹va ta humesa swin'we ni nkunzi ku avanyisa kanharhu ka vukhume bya mapa layo saseka lama pfuviweke hi hafu ya hini ya mafurha;

¹⁰u ta humesa ni hafu ya hini ya vhinyo, yi va ya vucheleto: i gandzelo leri phahliwaka hi ndzilo leri nga ni risema leri nun'hwelaka eka Yehovha.

¹¹Ku ta endleriwa sweswo nkunzi yin'wana ni yin'wana, ni khuna rin'wana ni rin'wana, ni xifuwo xin'wana ni xin'wana xa tinyimpfu ni timbuti.

¹²Mi ta endlisa sweswo eka xifuwo xin'wana ni xin'wana hi ntsengo wa xona, hambi wu ri wihi ni wihi.

¹³Un'wana ni un'wana wa tiko u ta endla swilo leswi hi mukhuva wolowo, loko a ta humesa gandzelo leri hisiwaka, leri nga ni risema leri nun'hwelaka eka Yehovha.

¹⁴“ ‘Kutakuloko muluveri a luvela exikarhi ka n'wina, hambiloko u akile khale exikarhi ka n'wina, kutani a humesa gandzelo leri hisiwaka, ri va risuna eka Yehovha, u ta ri humesa kukotisa n'wina.

¹⁵Wu ta va nawu wun'we wa nhlengeletano, hi leswaku wa n'wina ni wa muluveri la akeke eka n'wina: i ku lerisa loku nga heriki ka vatukulu va n'wina; swi ta va xilo xin'we eka muluveri ni ka n'wina emahlweni ka Yehovha.

¹⁶Wu ta va nawu wun'we, ni ku lerisa kun'we eka n'wina ni ka muluveri la luveleke eka n'wina.’ ”

¹⁷Yehovha a byela Muxe, a ku:

¹⁸“Byela vana va Israele, u ku eka vona: ‘Kutakuloko mi fikile etikweni leri ndzi mi yisaka eka rona,

¹⁹ni loko mi dya kona swakudya swa tiko, mi ta pambulela Yehovha nhlengo.

²⁰Mi ta pambula swinkwa, swi va swirhangana swa mbila ya n'wina; yi va mhamba leyi ndziwitiwaka, mi ta yi humesa kukota mhamba leyi ndziwitiwaka ya xivuya.

²¹Etinxakeni ta tinxaka, mi ta pambulela Yehovha nhlengo lowu humaka eswirhanganeni swa mbila ya n'wina.

²²“ ‘Kungakuloko mi dyoha ku nga ri ha vomu, hi ku ka mi nga hlayisi milawu hinkwayo leyi Yehovha a yi byeleke Muxe,

²³swi ri hinkwaswo leswi Yehovha a mi leriseke ha Muxe, ku sungula siku Yehovha a leriseke milawu, ni ndzhaku ka swona etinxakeni ta n'wina;

²⁴kutakuloko ku dyohiwile ku nga ri ha vomu, nhlengeletano yi nga swi tivi, nhlengeletano hinkwayo yi ta humesa nkunzi yi va holokosta ya risuna eka Yehovha, yi ri ni nyiko ya yona, ni vucheleto bya yona, hi nawu wa kona; yi ta humesa ni xiphongo, ri va gandzelo ra xidyoho.

²⁵Muprista u ta phahlela nhlengeletano hinkwayo ya vana va Israele mhamba kutani va ta khomeriwa, hikuva i ku dyoha loku endliweke ku nga ri ha vomu; naswona va tisile nhlengo wa vona, ri ri gandzelo leri hiseriwaka Yehovha, ni gandzelo ra vona ra nandzu emahlweni ka Yehovha, hikwalaho ka xidyoho xa vona lexi endliweke ku nga ri ha vomu.

²⁶Nhlengeletano hinkwayo ya vana va Israele, ni muluveri la luveleke exikarhi ka vona, va ta khomeriwa, hikuva tiko hinkwaro ri dyohile ku nga ri ha vomu.

²⁷“ ‘Kungakuloko munhu un'we ntsena a dyohile ku nga ri ha vomu, u ta humesa mbuti ya lembe rin'we yi va mhamba ya nandzu.

²⁸Muprista u ta phahlela munhu la dyoheke hi ku hoxa mhamba emahlweni ka Yehovha; kutakuloko mhamba yi phahleriwe yena, u ta khomeriwa.

²⁹Wu ta va nawu wun'we eka vana va Israele ni ka muluveri la akeke exikarhi ka vona. Loko munhu a dyoha ku nga ri ha vomu, mi ta va ni nawu wun'we.

³⁰“ ‘Kambe kungakuloko munhu, hambi a ri wa tiko, hambi muluveri a dyohile hi ku tlakusa voko, a sandza Yehovha; munhu loyi u ta susiwa etikweni ra yena.

³¹Hikuva u sandzile rito ra Yehovha, u tlurile ku lerisa ka yena; munhu loyi u ta susiwa, nandzu wa yena wu le henhla ka yena.’ ”

³²Vana va Israele a va ri mananga, kutani va kuma munhu la rhotelaka tihunyi hi siku ra Savata.

³³Lava n'wi kumeke loko a a ri karhi a rhotela tihunyi va n'wi tisa eka Muxe ni ka Aroni, ni ka nhlengeletano hinkwayo.

³⁴Va n'wi nghenisa ekhotsweni, hikuva lexi va faneleke ku n'wi endla xona a xi nga si vuriwa.

³⁵Kavaloko Yehovha a ku eka Muxe: “Munhu loyi u ta dlawa nhlengeletano hinkwayo yi ta n'wi khandla hi maribye ehandle ka mixaxa.”

³⁶Kutani nhlengeletano hinkwayo yi n'wi humesa ehandle ka mixaxa, yi n'wi khandla, kutani a fa, hilaha Yehovha a leriseke Muxe hakona.

³⁷Yehovha a ku eka Muxe:

³⁸“Byela vana va Israele, u va lerisa leswaku va tiendlela etinxakeni ta vona makhaxa, va ma rhungela emakun'wini ya tinguvu ta vona, va ma bohela ematlhelweni hinkwawo hi tingotinyana ta xivunguvungu.

³⁹Swi va eka n'wina xilo lexi vonakaka; kutakuloko mi xi languta, mi ta anakanya milawu hinkwayo ya Yehovha ku yi endla, mi nga tshuki mi lahleka hi ku landza timbilu ta n'wina ni mahlo ya n'wina, kasi swirho leswi swi mi koka evuoswini.

⁴⁰Mi ta tsundzuka milawu hinkwayo ya mina, mi yi endla, kutani mi ta va lava hlawuriweke eka Xikwembu xa n'wina.

⁴¹Hi mina Xikwembu xa n'wina lexi mi humeseke eEgipta leswaku ndzi va Xikwembu xa n'wina. Hi mina Yehovha, Xikwembu xa n'wina.”