Read Xitsonga Numbers 16 Bible Online

Numbers 16 - Xitsonga bible

Numbers 16

¹Kavaloko Kora, n'wana Yisihara n'wana Kohata, n'wana Levhi, a ri na Datani, na Abirama, n'wana Eliyabu, na Ono, n'wana Pelete vona lavanharhu a va ri vana va Rhuveni;

²va pfukela Muxe va ri ni vavanuna va 250 va vana va Israele, ti ri tihosi ta nhlengeletano leti vitaniwaka ehubyeni, va nga lava dzuniwaka.

³Kutani va hlengeletana va rhendzela Muxe na Aroni va ku eka vona: “Swi ringene, hikuva nhlengeletano hinkwayo yi kwetsimile, kutani Yehovha u le xikarhi ka vona! Xana mi tikurisela yini ehenhla ka nhlengeletano ya Yehova-ke?”

⁴Muxe, kuteloko a swi yingisile, a wa ehansi hi mombo.

⁵Kutani a byela Kora ni vandla ra yena, a ku: “Mundzuku Yehovha u ta tivisa loyi a nga wa yena, ni la hlawuriweke ku tshinela ekusuhi na yena; kutani loyi Yehovha a nga ta n'wi hlawula, u ta n'wi tshinetela eka yena.

⁶Wena Kora ni vandla hinkwaro ra wena endlani sweswo; mi ta titekela tinhlambeto,

⁷mundzuku mi ta okela ndzilo eka tona, mi veka ni mirhi ya risuna ehenhla ka tona, emahlweni ka Yehovha, kutani loyi Yehovha a nga ta n'wi hlawula, hi loyi a hlawuriweke. Swi ringene, vana va Levhi!”

⁸Kutani Muxe a ku eka Kora: “Yingisani vana va Levhi:

⁹Xana i mhaka leyitsongo eka n'wina, leswi Xikwembu xa Israele xi mi hlawuleke enhlengeletanweni ya Israele hi ku mi tshineta eka yena ku tirha ntirho wa yindlu ya Yehovha, ni ku yima emahlweni ka nhlengeletano ku yi tirhela-ke?

¹⁰U ku tshinetile eka yena, wena ni vamakwenu hinkwavo, vana va Levhi, kasi mi navela kambe vuprista!

¹¹Hikwalaho mi hlengeletene, wena ni vandla ra wena hinkwaro ku lwa na Yehovha! Aroni, i mani, leswi mi n'wi dzumadzumelaka xana?”

¹²Muxe a rhuma ku ya vitana Datani na Abirama, vana va Eliyabu. Kutani va ku: “Hi nga ka hi nga khandziyi.

¹³Xana i mhaka leyitsongo eka hina leswi u hi humeseke etikweni leri pfelelaka ntswamba ni vulombe, ku hi dlaya emananga u engeta u tiveka hosi ehenhla ka hina-ke?

¹⁴Kunene a ku hi nghenisanga etikweni leri pfelelaka ntswamba ni vulombe; a ku hi fuwisangi masimu ni tivhinya! Xana u rhandza ku boxa mahlo ya vanhu lava xana? Hi nga ka hi nga khandziyi.”

¹⁵Muxe a kariha ngopfu, kutani a ku eka Yehovha: “U nga ka u nga amukeli nhlengo wa vona! A ndzi va tekelanga mbhongolo ni yin'we; a ndzi dyelelanga ni un'we wa vona.”

¹⁶Kutani Muxe a ku eka Kora: “Tanani mundzuku emahlweni ka Yehovha, wena ni nhlengeletano hinkwayo ya wena, mi va na Aroni;

¹⁷tekani un'wana ni un'wana tinhlambeto ta n'wina, mi vekela eka tona mirhi ya risuna, kutani un'wana ni un'wana u ta humesa nhlambeto ya yena emahlweni ka Yehovha, ti va tinhlambeto ta 250; wena na Aroni mi ta teka un'wana ni un'wana nhlambeto ya yena.”

¹⁸Kavaloko va teka tinhlambeto ta vona, va nghenisa ndzilo eka tona, va vekela ni mirhi ya risuna endzeni ka tona, kutani va yima enyangweni ya tabernakela ya nhlengeletano, va ri na Muxe na Aroni.

¹⁹Kutani Kora a rhamba nhlengeletano hinkwayo enyangweni ya tabernakela ya nhlengeletano, kutani ku kwetsima ka Yehovha ku humelela emahlweni ka nhlengeletano hinkwayo.

²⁰Kutani Yehovha a byela Muxe na Aroni, a ku:

²¹“Hambanani ni nhlengeletano leyi, ndzi ta va hisa kan'we.”

²²Kavaloko va wa ehansi hi mimombo, va ku: “Oho! Xikwembu, Xikwembu xa mimoya ya tinyama hinkwato! Munhu un'we u dyohile, kambe u karihela nhlengeletano hinkwayo!”

²³Kutani Yehovha a byela Muxe, a ku:

²⁴“Kendlukelani tindlu ta Kora, na Datani, na Abirama.”

²⁵Kavaloko Muxe a pfuka a ya eka Datani ni ka Abirama, a landziwa hi vakulu va Israele.

²⁶Kutani a byela nhlengeletano, a ku: “Kendlukelani mitsonga ya lavo biha lava, mi nga khumbi nchumu eka leswi nga swa vona, mi chava ku lova hikwalaho ka swidyoho; hinkwaswo swa vona.”

²⁷Kutani va sukela mitsonga ya Kora ni ya Datani ni ya Abirama, ematlhelweni hinkwawo, kutani Datani na Abirama va huma, va yima etinyangweni ta mitsonga ya vona, va ri ni vasati va vona ni vana va vona, ni vatukulu va vona.

²⁸Kavaloko Muxe a ku: “Mi ta tiva hi leswi leswaku Yehovha u ndzi rhumele ku endla swilo leswi hinkwaswo, ni leswaku a swi humi embilwini ya mina.

²⁹Kungakuloko vanhu lava va fa hi rifu ra munhu un'wana ni un'wana, ni loko va humeleriwa hi leswi humelelaka eka vanhu hinkwavo, a hi Yehovha la ndzi rhumeke.

³⁰Kambe loko Yehovha a tumbulukisa xilo lexintshwa, ni loko misava yi ahlamisa nomu wa yona yi va mita ni swilo hinkwaswo swa vona, ni loko va ngirimela va ha hanya exivandleni xa vafi, mi ta tiva leswaku vanhu lava va sandzile Yehovha.”

³¹Kuteloko a hetile ku vula marito lawa hinkwawo, misava leyi ngi yi ri ehansi ka vona yi handzuka;

³²kutani misava yi ahlamisa nomu wa yona, yi va mita ni tindlu ta vona, ni vanhu hinkwavo va Kora, ni rifuwo ra vona hinkwaro.

³³Va ngirimela va ha hanya, ni swilo hinkwaswo swa vona exivandleni xa vafi; misava yi va funengeta, va lova exikarhi ka nhlengeletano.

³⁴Kutani Vaisraele hinkwavo lava va rhendzeleke va tsutsuma hi ku kolola ka vona; hikuva a va ku: “A hi chaveni leswaku misava yi nga hi miti na hina.”

³⁵Kutani ndzilo wu huma eka Yehovha, wu heta vanhu va 250, lava humeseleke mirhi ya risuna.

³⁶Kutani Yehovha a byela Muxe, a ku:

³⁷“Byela Eliyazara, n'wana Aroni, muprista, leswaku a susa tinhlambeto ta mirhi ya risuna exikarhi ka ndzilo, a hangalasa ndzilo wa tona ekule, hikuva a ti hlawulekile.

³⁸Hi tinhlambeto leti vanhu va dyoheleke mimoya ya vona ha tona, ku ta furiwa swiphepherhele ku nameka alitari ha swona; hikuva ti humeseriwe emahlweni ka Yehovha, kutani ti hlawuriwile; swi ta va xitsundzuxo eka vana va Israele.”

³⁹Kavaloko Eliyazara, muprista, a teka tinhlambeto ta koporo leti humesiweke hi lava hisiweke va ti fula ku nameka alitari ha tona xi va xitsundzuxo eka vana va Israele,

⁴⁰leswaku ku nga tshuki ku va na munhu ni un'we la nga riki wa rixaka ra Aroni la tshinelaka ku humesa mirhi ya risuna emahlweni ka Yehovha, a nga tshuki a kotisa Kora ni vandla ra yena, hilaha Yehovha a n'wi byeleke hakona ha Muxe.

⁴¹Siku leri tlhandlamaka, nhlengeletano hinkwayo ya vana va Israele yi dzumadzumela Muxe na Aroni, yi ku: “Hi n'wina lava mi dlayaka tiko ra Yehovha.”

⁴²Kutani, kutakuloko nhlengeletano yi hlengeletela Muxe na Aroni, vona va hundzukela eka tabernakela ya nhlengeletano, kutani papa ri yi funengeta, ku kwetsima ka Yehovha ku humelela.

⁴³Muxe na Aroni va ya emahlweni ka tabernakela ya nhlengeletano,

⁴⁴kutani Yehovha a byela Muxe, a ku:

⁴⁵“Sukani exikarhi ka nhlengeletano leyi, ndzi ta va heta kan'wekan'we.” Kavaloko va wa hi mimombo,

⁴⁶kutani Muxe a ku eka Aroni: “Teka nhlambeto, u nghenisa eka yona ndzilo wa alitari u vekela kona ni mirhi ya risuna, u swi yisa sweswi exikarhi ka nhlengeletano, u va phahlela mhamba; hikuva vukari byi humile emahlweni ka Yehovha, ni ntungu wu sungurile.”

⁴⁷Kutani Aroni a teka nhlambeto hilaha Muxe a nga vula hakona, a tsutsuma exikarhi ka nhlengeletano, kutani waswivo, ntungu a wu sungurile exikarhi ka tiko.

⁴⁸A vekela mirhi ya risuna ehenhla ka ndzilo, kutani a phahlela tiko mhamba a yima exikarhi ka lava feke ni lava hanyaka, kutani ntungu wu khawuka.

⁴⁹Lava feke hi ntungu lowu a va ri vanhu va 14 700, ehandle ka lava feke hikwalaho ka mhaka ya Kora.

⁵⁰Kutani Aroni a tlhelela eka Muxe enyangweni ya tabernakela ya nhlengeletano, hikuva ntungu a wu khawukile.