Read Xitsonga Numbers 19 Bible Online

Numbers 19 - Xitsonga bible

Numbers 19

¹Yehovha a byela Muxe na Aroni, a ku:

²“Hi kona ku lerisa ni nawu lowu Yehovha a wu leriseke loko a ku: ‘Byela vana va Israele va ku tisela homu ya ntswele ya ribungu, leyi nga riki na xisandzu ni xivati, leyi nga rhwalangiki joko.

³Mi ta yi nyika Eliyazara, muprista, kutani va ta yi humesa emixaxeni, va yi tlhava emahlweni ka yena.

⁴Eliyazara, muprista, u ta teka ngati ya homu hi ritiho ra yena, u ta xuva ha yona kantlhanu ni kambirhi etlhelweni ra nyangwa ya tabernakela ya nhlengeletano.

⁵Kutani va ta hisa homu emahlweni ka wena; va ta hisa dzovo ra yona ni nyama, ni ngati, ni swanyi wa yona.

⁶Muprista u ta teka murhi wa kedari ni hisopa ni karmesi a swi hoxa endzilweni, laha homu yi hisiwaka kona.

⁷Muprista u ta hlantswa tinguvu ta yena, a hlamba miri ematini, kutani u ta nghena emixaxeni; kambe muprista u ta va la nga tengangiki ku fika nimadyambu.

⁸Munhu la hiseke homu u ta hlantswa tinguvu ta yena ematini, a hlamba miri, kutani u ta va la nga tengangiki ku fika nimadyambu.

⁹Munhu la tengeke u ta ola nkuma wa homu, a wu veka endhawini leyi tengeke, ehandle ka mixaxa, kutani wu ta hlayiseriwa nhlengeletano ya vana va Israele kukotisa mati ya ku basisa; i gandzelo ra ku dyoha.

¹⁰La oleleke nkuma wa homu, u ta hlantswa tinguvu ta yena, kutani u ta va la nga tengangiki ku fika nimadyambu. Ku ta va ku lerisa loku nga heriki ka vana va Israele, ni ka muluveri la luvelaka exikarhi ka vona.

¹¹“ ‘La khumbeke mufi hi leswaku miri wihi ni wihi wa munhu, u ta va la nga tengangiki hi masiku ya ntlhanu na mambirhi.

¹²U ta tibasisa hi mati lawa hi siku ra vunharhu, ni siku ra ntlhanu na mambirhi, kutani u ta tenga; kambe loko a nga tibasisi hi siku ra vunharhu ni ra ntlhanu na mambirhi, a nga ka a nga tengi.

¹³La khumbeke mufi, hileswaku miri wa munhu la feke, a va a nga tibasisi, u nyamisa Yindlu ya Yehovha. Munhu loyi, u ta susiwa eIsraeleni hikuva mati ya ku basisa a ma cheriwangi ehenhla ka yena; wa ha ri la yilaka; thyaka ra yena ra ha ri ehenhla ka yena.

¹⁴“ ‘Hi wona nawu: Kutakuloko munhu a file entsongeni, mani na mani la nghenaka entsongeni, ni swilo hinkwaswo leswi nga entsongeni, swi ta va leswi yilaka hi masiku ya ntlhanu na mambirhi.

¹⁵Mbita yin'wana ni yin'wana leyi fununguriweke, leyi nga riki na xifunengeto lexi bohiweke ehenhla ka swona, yi ta va leyi yilaka.

¹⁶Mani na mani la khumbeke munhu la dlayiweke hi tlhari emasin'wini, kumbe mufi, kumbe marhambu ya vanhu, kumbe sirha u ta va la yilaka hi masiku ya ntlhanu na mambirhi.

¹⁷Va ta tekela la yilaka nkuma wa gandzelo leri hiseriweke ku dyoha, kutani va ta chela mali layo basa ehenhla ka wona ma ri enhlambetweni;

¹⁸kutani munhu la tengeke u ta teka hisopa, a yi peta ematini, kutani u ta xuva ntsonga ni swibya hinkwaswo, ni vanhu hinkwavo lava nga kona, ni loyi a khumbeke marhambu, hambi munhu la dlayiweke, hambi mufi, hambi sirha.

¹⁹La tengeke u ta xuva la yilaka hi siku ra vunharhu ni ra ntlhanu na mambirhi, kutani ku yila ka yena ku ta susiwa hi siku ra ntlhanu na mambirhi, U ta hlantswa tinguvu ta yena, a hlamba ematini, kutani nimadyambu u ta tenga.

²⁰La tinyamiseke, a va a nga tibasisi; munhu loyi u ta susiwa enhlengeletanweni, hikuva u nyamisile vukwetsimelo bya Yehovha; mati ya ku basisa a ma cheriwanga ehenhla ka yena, u nyamile.

²¹Ku ta va eka vona ku lerisa lo ku nga heriki. La nga xuva hi mati ya ku basisa, u ta hlantswa tinguvu ta yena; kutani la khumbeke mati ya ku basisa, u ta va la yilaka ku fika nimadyambu.

²²Hinkwaswo leswi khumbeke la yilaka swi ta va leswi yilaka; ni loyi a n'wi khumbeke u ta va la yilaka ku fika nimadyambu.’ ”