Read Xitsonga Numbers 21 Bible Online

Numbers 21 - Xitsonga bible

Numbers 21

¹Hosi ya Aradi, wa Kanana, la akeke edzongeni, kuteloko yi twile leswaku Israele a ta hi ndlela ya Atarimi, a ya lwa na Israele, a khoma vanhu.

²Israele a hlambanya eka Yehovha, a ku: “Loko u neha tiko leri emavokweni ya mina, ndzi ta lovisa miti ya rona, ndzi yi yirisa.”

³Yehovha a yingisa rito ra Israele, kutani a va nyiketa Vakanana ni miti ya vona va va lovisa, va va heta; kutani va thya xivandla lexi vito ra Horma (ku yila).

⁴Kutani va suka entshaveni ya Hori hi ndlela ya Lwandle ro Tshwuka, va ya rhendzeleka tiko ra Edomu. Kambe tiko ri hela timbilu endleleni leyi.

⁵Tiko ri dzumadzumela Xikwembu na Muxe, ri ku: “Mi hi humesele yini eEgipta leswaku hi ta fa emananga? Hikuva a ku na vuswa a ku na mati; timbilu ta hina ti nyenya swakudya leswi sandzekaka leswi.”

⁶Yehovha a rhumela tiko tinyoka leti hisaka, ti va luma; kutani vanhu lavo tala va fa eIsraeleni.

⁷Kavaloko tiko ri ta eka Muxe, ri ku: “Hi dyohile hikuva hi dzumadzumele Yehovha na wena; hi khongelele eka Yehovha leswaku a hlongola tinyoka ekule na hina.” Kutani Muxe a khongelela tiko.

⁸Yehovha a ku eka Muxe: “Tiendlele nyoka leyi hisaka u yi hayeka emhandzeni; leswaku, mani na mani la lumiweke, loko a languta nyoka, a ta hanya.”

⁹Kutani Muxe a endla nyoka ya koporo a yi hayeka emhandzeni kutani kuteloko munhu a lumiwile hi nyoka, a a languta nyoka ya koporo, a hanya.

¹⁰Kutani vana va Israele va suka, va ya dzima mixaxa eOboto.

¹¹Kutani va suka eOboto, va ya dzima mixaxa erhumbini ra Abarimi, emananga la languteneke na Mowabu, tlhelo ra vuxa.

¹²Kutani va suka kona, va ya gova enkoveni wa Zarede.

¹³Va suka kona, kutani va ya gova entlhandlukweni wa Arinoni, lowu nga emananga, lowu humaka etikweni ra Vaamori; hikuva nambu wa Arinoni i ndzilakana wa Mowabu, exikarhi ka Mowabu ni Vaamori.

¹⁴Hikwalaho ku vuriwile ebukwini ya Mivango ya Yehovha: “Vhahebe lowu nge ka Sufa, ni mikova ya Arinoni,

¹⁵ni ku rhelela ka mikova loku kongomaka etlhelo ra Ara, ku fika endzilakaneni wa Mowabu.”

¹⁶Loko va suka kona, va ya eswihlobyeni swa Bera. Hilaha Yehovha a nga ku eka Muxe: “Hlengeleta tiko, ndzi ta va nyika mati.”

¹⁷Kavaloko Israele a yimbelela risimu leri:

¹⁸“Pfelela xihlovo! Mi xi yimbelela! Xihlovo lexi tihosi ti xi celeke; Lexi vakulu va tiko va xi celeke Hi tinhonga ta vona ta vuhosi.”

¹⁹Loko va suka emananga, va ya eMatana; kutani va suka eMatana, va ya eNahaliele, va suka eNahaliele, va ya eBamoto;

²⁰va suka eBamoto, va ya enkoveni lowu nga emasin'wini ya Mowabu, ehenhla ka Pisga, tlhelo ra mananga.

²¹Kutani Israele a rhuma tintsumi eka Sihoni, hosi ya Vaamori, ti ku eka yena:

²²“Ndzi pfumelele ku tsemakanya etikweni ra wena; hi nga ka hi nga hambukeli emasin'wini, hambi evhinyeni hi nga ka hi nga nwi mati ya swihlovo; hi ta famba hi gondzo, hi ko hi huma etikweni ra wena.”

²³Sihoni a nga pfumelelanga Israele ku tsemakanya etikweni ra yena; kutani Sihoni a hlengeleta tiko ra yena hinkwaro, a huma ku ya hlangana na Israele emananga, a fika eYahasi, kutani a lwa na Israele.

²⁴Israele a n'wi heta hi vukari bya tlhari, kutani a teka tiko ra yena ku suka eArinoni, ku ya fika eYaboko, ku ya fika ni ka vana va Amoni; hikuva ndzilakana wa vana va Amoni a wu tiyile.

²⁵Israele a teka miti leyi hinkwayo, kutani Israele a aka emitini hinkwayo ya Vaamori, wu nga Hexiboni ni le mitini hinkwayo leyi nga ehansi ka wona.

²⁶Hikuva Hexiboni a wu ri ntsindza wa Sihoni, hosi ya Vaamori, la nga lwa ni hosi ya Mowabu leyi ngi yi ri kona emahlweni, kutani a yi tekela tiko hinkwaro ku fika eArinoni.

²⁷Hikwalaho vayimbeleri va ku: “Tanani eHexiboni! Muti wa Sihoni a wu akiwe ni ku tiyisiwa!

²⁸Hikuva ndzilo wu humile eHexiboni, Langavi ri humile emutini wa Sihoni; Ri hisile Ara-Mowabu, Ni vini va tintshava ta Arinoni.

²⁹Khombo ri na wena Mowabu! U lovile, tiko ra Kemoxi! Ri nyiketile vana va rona eku balekeni, Ni vanhwanyana va rona va va makhumbi ya Sihoni, hosi ya Vaamori.

³⁰Hi va copetele hi miseve, Ku suka eHexiboni, ku fika eDiboni, Hinkwaswo swi herisiwile, Hi hlaserile ku ya fika eNofaka; Ndzilo wu ya fika eMedeba.”

³¹Israele a aka etikweni ra Vaamori,

³²kutani Muxe a rhuma tintsumi ku ya kamba Yazere. Va teka miti leyi nga ehansi ka wona, kutani va hlongola Vaamori lava akeke eka wona.

³³Kutani va hundzuka, va khandziya hitlhelo ra Baxani. Kutani Ogo, hosi ya Baxani, a huma ku ya hlangana na vona eEdreyi, a ri ni tiko ra yena hinkwaro, a lava ku lwa na vona.

³⁴Kutani Yehovha a ku eka Muxe: “U nga n'wi chavi, hikuva ndzi n'wi nyiketile emavokweni ya wena, yena ni vanhu va yena hinkwavo, ni tiko ra yena; u ta n'wi endla kukotisa leswi u nga swi endlela Sihoni, hosi ya Vaamori, la akeke eHexiboni.”

³⁵Kutani va lwa na yena, va n'wi hlula ni vana va yena, ni tiko ra yena hinkwaro, ku nga ponanga na un'we; kutani va teka tiko ra yena.