Read Xitsonga Numbers 24 Bible Online

Numbers 24 - Xitsonga bible

Numbers 24

¹Balaama a vona leswaku Yehovha u titsakele ku katekisa Israele, kutani a nga lavangi vungoma kukotisa mikarhi yin'wana, kambe a hundzuluxa mombo wa yena etlhelo ra mananga.

²Kutani Balaama a tlakusa mahlo a vona tiko ra Israele ri le mixaxeni hi tinyimba ta rona, kutani moya wa Xikwembu wu ta ehenhla ka yena,

³a bvumbha, a ku: “Ku bvumbha ka Balaama, n'wana Beyori; Rito ra munhu la pfuriweke tihlo;

⁴Rito ra la yingisaka marito ya Xikwembu, La vonaka mahlori ya Lowa matimba hinkwawo, La korhamaka, kutani mahlo ya yena ma pfuleka.

⁵Oho Yakobo! Ku saseka ka mixaxa ya wena!

⁶Oho Israele! Vuako bya wena byi nava kukotisa mikova, Kukotisa mitanga ekusuhi ni nambu, Kukotisa mhanga leyi byariweke hi Yehovha, Kukotisa tikedari leti nga ekusuhi ni mati.

⁷Mati ma huma eswikutswini swa yena, Mbewu ya yena yi ni mati layo tala. Hosi ya yena yi titlakusile ehenhla ka Agaga, Ku fuma ka yona ku ni matimba.

⁸Xikwembu xi n'wi humese Egipta, A heta matiko, va nga valala va yena; A faya marhambu ya vona, a khandla miseve ya vona.

⁹A khinsama, a khondla kukota nghala, kukotisa ntswele ya nghala: I mani la nga ta n'wi pfuxa? Ku katekile lava ku katekisaka, A ku rhukaniwe lava ku rhukanaka.”

¹⁰Kavaloko Balaka a karihela Balaama, kutani a phokota mandla, a ku eka Balaama: “Ndzi ku vitanile ku rhukana valala va mina; kutani waswivo, u va katekisile kanharhu.

¹¹Sweswi tifambele ekarikwenu, ndzi vurile leswaku ndzi ta ku dzunisa ngopfu; kambe Yehovha u ku sivele ku amukela nchumu.”

¹²Balaama a ku eka Balaka: “Xana a ndzi byelangi tintsumi leti u ndzi rhumeleke tona, ndzi te:

¹³‘Hambiloko Balaka a ndzi tatisela yindlu ya yena hi silivhere ni nsuku, a ndzi nyika swona, ndzi nga ka ndzi nga tluli ku lerisa ka Yehovha hi ku tisungulela ndzi ri mina, xilo lexo saseka, kumbe lexo biha, leswi Yehovha a nga ta ndzi lerisa swona, ndzi ta swi vula’?

¹⁴Kutani sweswi ndzi tiyela eka rikwerhu. Tana, ndzi ta ku tivisa leswi tiko leri ri nga ta swi endla eka tiko ra wena masiku man'wana.”

¹⁵Kavaloko a bvumbha, a ku: “Rito ra Balaama n'wana Beyori, Rito ra munhu la pfuriweke mahlo,

¹⁶Rito ra la yingisaka marito ya Xikwembu, La tivaka vutivi bya La nge henhlahenhla, La hlalelaka mahlori ya La nga ni matimba hinkwawo, La khinsamaka, kutani mahlo ya yena ma pfuleka.

¹⁷Ndzi n'wi vona, kambe a hi sweswi, Ndza n'wi hlalela, kambe ku nga ri kusuhi. Nyeleti yi hume eka Yakobo, Nhonga ya vuhosi yi hume eIsraeleni. Yi tlhava matsheve ya Mowabu, Yi heta vana hinkwavo va dzolonga.

¹⁸Edomu a fumiwa hi yena, Seyira, nala wa yena, u ta fuyiwa hi yena, Israele a kombisa matimba ya yena,

¹⁹La humaka eka Yakobo wa fuma, U va heta lava salaka emitini.”

²⁰Balaama a vona Amaleke, a bvumbha, a ku: “Amaleke i xirhangana xa matiko, Kambe siku rin'wana u ta herisiwa.”

²¹Balaama a vona Vakeni, a bvumbha, a ku: “Yindlu ya wena yi tiyile, Xisaka xa wena xi vekiwile eribyeni ra ntshava.

²²Kambe Mukeni u ta hlongoriwa, Loko Asuru a ta ku yisa ekule, u ri mubohiwa.”

²³Balaama a engeta a bvumbha, a ku: “Ku ni khombo loyi a nga ta va kona, Loko Xikwembu xi ta swi endla, ku ta sala mani?

²⁴Tingalava ti ta ta hi le Kitimi, Ti ta tsongahata Asuru, ti ta tsongahata Ebere; Kutani na yena u ta herisiwa.”

²⁵Kavaloko Balaama a pfuka, kutani a tlhelela karikwavo; na yena Balaka a tifambela hi ndlela ya yena.